1 Fe, Mǝ rib: Arik ne kyak aner amaa i? Ba yi amɛ ba! Nga muŋ yi myi awonǝ Isrela, nga nŋli kɛ Ibrai, ire aŋa ayi Banyami. 2 Arik bane kyak aner amaa ba, abaŋ ndi ane mǝne hria ba ne kuti. Ba zhin ne zhi te ilɛ kɛ Arik idi ne ŋake amkpawaŋ ndi netu Iliya ne bla tɔ ti ne lɛ kɛ Arik ir keŋ ndi ne ben Arik netu aner abɛ Isrela: 3 Ŋgɔŋ, ne ŋlɔk nki aneshir abɛ bla shar mǝ te zǝr amkpa ne tsik ibaŋ; Ai nga kiki muŋ mne ndǝk, fe ana wɔb ankɔŋ ane ŋun me.>> 4 Fe Arik ne sagu ma tedi kikin? <<Bau yi kiki mi ba! Mne nyak nki aner amkpik amɛ ataŋgba abaŋ ndi bane zekuu Balaam ba.>> 5 Nǝ yeme, azizaŋa nki aner watsɔb ayime abaŋ ndi Arik ne hria ba ne na didik ma. 6 Ihria ma iyi ne na didik maa, bane iki yi na men ba. Atei yi ndi ihria yi Arik yi ne na iki na aneshir, fe ina didik maa ba yi didik ba.

7 Fe aye nii? Iki yiŋ ndi aner abɛ Isrela ne wɔ bǝ ngɔŋ bane yigǝ ba, ama abaŋ ndi Arik ne hria ba ne yik, ankime ne ku atɔŋ ne ilɛ kɛ Arik. 8 Ndi ilɛ kɛ ne di,

<<Arik ne duŋ idur men ben asusun amen akama te abliblik; ire ibɛre batei na yik te na wɔ ba:>>

9 Ankyak Doda adi:

<<Abɛ sɛr ba atyak azhɔk tena jaŋ ba ne za;

Abɛ zhaku, abɛ na nek ba iyah!

10 Duŋ ayi amene abɛ te amfik kǝr abɛ na yik ba;

Tǝ agɔŋ amen abɛ kam ate mkpɔ iyaŋ klɛtu.>>

11 Fe, M rib: Ndi Yahudawa ne azhaku ne kyak zǝ lɛ kɛ Arik, bane zhaku te na lu kai? Ba yi amɛ ba! Nena zumimin, iliru ne nyɛ ben abaŋ ndi bai ŋli kɛ Yahudawa ba, ne duŋ Yahudawa ne te ankiŋki. 12 Ilalɛ iyi Yahudawa ne Gli iliru ben anu adidik igli nyɛ gɔŋmimi, ben iyah men iyi zhu tsetser ne Gli anu adidik igli abaŋ ndi ba yi Yahudawa ba. Fe, iki didik ngɔŋ itei yi kikin ndi Yahudawa atei yi ne miŋe!

13 Mli azizaŋa ben abɛ zhin abaŋ ndi bai ŋli Yahudawa ba: Ndi myi ne du lɛ kɛ Arik ben abaŋ ndi bai Yahudawa ba, M tei ŋɔr asa ne ndum muŋ. 14 Neme M tei duŋ aneshir abaŋ ndi ayi aner amuŋ ate ankiŋki, tǝ bɛ zǝ anuŋ ne miŋ mǝne. 15 Ndi ne kyak aneshir abɛ Isrela ba, nki aneshir te kama sen nena zumimin men te kama yi akpa amaa. Fe itei yi kikini, ndi ate ta bai? Itei yi ivli ben abɛ ku!

16 Ate yi ndi mgbalak borodi kɛ kuti ne nek Arik ne kǝ, fena antsuk borodime ayi amaa; ate nek Arik iririŋ kuŋkun, anga kuŋkuno anayi amaa.

17 Teyi ndi ate tsi ngǝŋga kuŋkun inebi nuŋ ahrie, ate baŋ nga kuŋkun ikɛ izhu tsetser nuŋ adus ne yuŋɔ. Izhin abaŋ ndi bai ŋli Yahudawa ba izhin yi ndi nga kuŋkun ikɛ dus yuŋɔ, teyi ne susun kɛ izhu tsetser azizaŋa ndi aba Yahudawa ma. 18 Fe na, kǝr izhin bɛ ŋur asa ben abaŋ ndi ne tsi ba ndi ngǝŋga iyi kuŋkuno ba. U na kikin te uŋur asa i? Unak yi nga ankyak; bau zok ririŋ ŋli tiŋ kuŋkuno ba, iririŋe yi gliu.

19 Ama utei di, <<Iyime, ne sɛr angama atyak ahrie te mbǝ yik alɛla.>> 20 Ayi lɛ didik. Ne tsi ba atyak ahrie te bane tanyɛme ben Arik ba, fe uwa uklikli te une tanyɛme ben Arik. Ama kǝr ubǝ ŋur asa ba; ama, ubǝ te sǝsǝk. 21 Arik bane kam Yahudawa aŋyak ba, abaŋ ndi ayi ndi amene yi ngǝŋga kuŋkun yi izhu tsetser; izhin yik tedi atei duŋ zhin? 22 Fena izhin bǝ tɔ ir keŋ ndi Arik ayi ne sik tu tena yi ine yaŋ sik kpa: ba sik kpa ben abaŋ ndi ne zhaku ba, ama asik tu ne atu amin, atei ndi izhin Gli sik tu maa. Mba amɛ ba, ijineba imin yi atei tsi zhin ahrie. 23 Ate yi ndi Yahudawa ate tanyɛme, Arik atei gli ba akam aŋyak ne amkpa ndi neyi amen; Arik aya amɛ. 24 Nǝ yiŋɛ, izhineba ndi bai ŋli kɛ Yahudawa ba izhin yi ndi nga kuŋkun tiŋ inebi keŋ ndi ne sɛr kɛ, ndi bane men yi maa ba, ne dus kɛ tiŋ kuŋkun inebi. Yahudawa ayi yaŋ lɔmɔ te Arik abɛ dus anga kuŋkun ndi ne sɛre ne tiŋ kuŋkun kǝŋe.

25 Amunya, iki didik yi suyir iyime, ndi wɔb te izhin bǝ zhi, itei duŋ zhin ir keŋ ndi izhin yi mgbemgbeb. Aner abɛ Isrela iklik atu amen ben yaŋ atɔŋ bane baŋ mkpaŋ ba, ama itei baŋ mkpaŋ ndi abaŋ ndi bai ŋli Yahudawa ba ate ta Arik ne asusun amen. 26 Waŋa ai ir keŋ ndi Arik ai ta aner abɛ Isrela azhɔk. Ndi ilɛ kɛ Arik idi,

<<Ine ta zhɔk atei rɛ Siyona

Atei baŋ zumimin men bɔbɔk akama atibe ne ŋli kɛ Yakubu.

27 Mte kpa ilɛ kǝŋe yak bene bɛba

Ndi M tei baŋ ilalɛ mǝne ntibɛ.>>

28 Ndi Yahudawa ne kyak ta ilɛ didik kǝŋe, Yahudawa ayi abɛ te zɔr ben Arik atu ayi abaŋ ndi bai nŋli kɛ Yahudawa ba. Ama ne atu ayi hria iye Arik, ayi akpa abɛ Arik ne atu ayi atsǝntsǝm amen. 29 Tǝ Arik ba asen ne kiyi hria maa ben inǝk anu adidik maa ba. 30 Ate yi izhineba abaŋ ndi bai ŋli Yahudawa ba, izhin ne glak ilɛ kɛ Arik ikukub; fena azizaŋa izhin ne ta lɔ susun iye Arik ndi Yahudawa ane klik atu te kyak zǝ ilɛ kɛ Arik. 31 Ne ankɔŋ azhin awaŋa, ne atu ayi lɔ susun Arik Yahudawa ma ai na lɔ susun iye Arik menyi. 32 Tǝ Arik ne duŋ aneshir bɔbɔk aye abɛ kur ne jaru kɛ abɛ lalɛ, te abɛ wɔ lɔ susun mǝne bɔbɔk.

33 Adudun ki aye Arik ayi ne du! Mgbemgbeb maa ilak ben izhi maa!

Inuŋ batei bla ki kpa nyak maa ayir ba,

Ŋɔwa atei zhi ankɔŋ amaa i!

34 Ilɛ kɛ Arik ne di <<Ŋɔwa ne zhi susun kɛ Ŋgɔŋ?

Ka iŋɔwa atei ya nǝgu lɛ?

35 Ŋɔwa neka nǝgu ikinuŋǝ,

Tǝ duŋu abɛ kame anegu?>>

36 Tǝ ikiki bɔbɔk iyi na maa, ikiki bɔbɔk ne yime ne atu amaa te yi maa.

Ŋgɔŋ bǝyi kɛ Arik iyaŋ klɛtu! Bǝ yeme.