Tsǝn ne Izhu Tsetser
1 Fena azizaŋa abaŋ ndi ayi ndɔ ben Yesɔ Kristi ba atei tyak ba ahrie ba. 2 Tǝ nkanlɛ yi Izhu Tsetser, ndi inǝk ta vli, ndi izuk me zhɔk rɛ nkanlɛ yi zumimiŋ ben iku. 3 Iki ndi nkanlɛ yi Musa bane dik zhi nai ba, te kpa kɛ na bǝn azhizhi kǝŋe ne nai lak kana, Arik ne nai. Ndi ane shar Izu maa ne miŋ kɛ kpa neshir ne na zumimiŋ te abɛ kam ate tuk amkpur ane zumimiŋ. Fe te abaŋ zumimiŋ tsik acɔk ala ne miŋ kpa kɛ neshir ndi ne shar Izu maa, waŋ ndi ne nyɛ ne kpa kɛ neshir kɛ zumimiŋ, te abɛ anyɛ zir zumimiŋ aglɛ tibɛ. 4 Arik nena amɛ teduŋ iki ndi nkanlɛ yi Musa ne wɔbo ibǝ shaga ne miŋ taba ndi ta tsin ne ankɔŋ ane Izhu ba ankɔŋ ane kpa kɛ na ben azhizhi ba. 5 Abaŋ ndi aduŋ kpa kɛ na ben azhizhi igli ba tsǝne asusun amene asɔŋ ne kiki yiŋ ndi lɛk bubu yi kpa kǝŋe. Abaŋ ndi aduŋ Izhu bla ba iki yi na, ayi Izhu mɔ iyi duŋ ba ana iki yiŋ ndi wa ne tanyɛme neyi. 6 Aner abaŋ ndi azǝ men kɛ kpa kɛ na ben azhizhi kǝŋe ba yi ndɔ ben Arik ba; abaŋ ndi aduŋ Izhu Gli ba tsǝne aba ayi ndɔ ben Arik te ben zhɔk susun. 7 Fe amɛ aneshir abɛ zǝ men kɛ kpa yi abɛ te zor ben Arik; te ba zǝ nkanlɛ yi Arik, ba atei men azhi zei me ba. 8 Abaŋ ndi azǝ men kɛ bu yi kpa kǝŋe ba tei nek Arik nyɛr ba. 9 Izhineba, ba tei duŋ kpa kɛ na ben azhizhi bǝ tsar zhin iki yi na ba; Izhin bǝ duŋ Izhu yi Arik bǝ tsar zhin iki yi na; atei ndi Izhu mɔ yine miŋ min. Waŋ ndi bate yine Izhu yi Yesɔ ba, ba ayou Arik ba. 10 Ama atei ndi Kristi ayine miŋ min, Izhu mɔ iyi vli min te neka aŋɔk zhin azhɔk anenen ne ti kɛ Arik, 11 Ate yi ndi Izhu yi Arik, yiŋ ndi ne lɛk Yesɔ rɛ miŋ bɛ, iyi ne miŋ min, Iwaŋ ndi ne lɛk Yesɔ are miŋ bɛ me wa atei nek Vli ma ne miŋ kpa min ndi Vli yi ne miŋ min.