1 Maraming dayuhang babae ang inibig ni Haring Solomon. Bukod pa sa anak ng Faraon, may mga asawa pa siyang Moabita, Amonita, Edomita, Sidoneo at Heteo. 2 Nagmula ang mga ito sa mga bansang tinukoy ng Panginoon sa mga Israelita nang sabihin niyang, "Huwag kayong makipag-asawa sa kanila dahil tiyak na hihikayatin nila kayong sumamba sa kanilang mga diyos-diyosan." Ngunit umibig pa rin si Solomon sa mga babaeng ito, at ayaw niya silang iwan. 3 May pitong daang asawa si Solomon na puro mga prinsesa, at may tatlong daan pa siyang asawang alipin. Ang mga asawa niya ang nagpalayo sa kanya sa Diyos. 4 Nang tumanda na si Solomon, nahikayat siya ng kanyang mga asawa na sumamba sa mga diyos-diyosan. Hindi na naging maganda ang relasyon niya sa Panginoon na kanyang Diyos; hindi tulad ng ama niyang si David. 5 Sumamba siya kay Astoret, ang diyosa ng mga Sidoneo, at kay Molec,* ang kasuklam-suklam na diyos ng mga Amonita. 6 Ginawa ni Solomon ang masama sa mata ng Panginoon. Hindi siya sumunod nang buong katapatan sa Panginoon; hindi tulad ng ama niyang si David.

7 Sa isang burol sa gawing silangan ng Jerusalem, nagpagawa si Solomon ng sambahan para kay Cemos, ang kasuklam-suklam na diyos ng mga Moabita at sambahan para kay Molec, ang kasuklam-suklam na diyos ng mga Amonita. 8 Nagpagawa rin siya ng simbahan ng mga diyos-diyosan ng lahat ng asawa niyang dayuhan at doon sila nagsusunog ng mga insenso at naghahandog para sa mga diyos-diyosan nila.

9 Nagalit ang Panginoon kay Solomon dahil tinalikuran niya ang Panginoon, ang Diyos ng Israel, na nagpakita sa kanya ng dalawang beses. 10 Kahit binalaan na niya si Solomon na huwag sumamba sa mga diyos-diyosan, hindi pa rin nakinig si Solomon sa utos ng Panginoon. 11 Kaya sinabi ng Panginoon kay Solomon, "Dahil hindi mo tinupad ang ating kasunduan at ang mga utos ko, kukunin ko sa iyo ang kaharian mo at ibibigay ko sa isa sa mga lingkod mo. 12 Ngunit dahil sa iyong amang si David, hindi ko ito gagawin habang buháy ka pa. Gagawin ko ito sa panahon ng paghahari ng iyong anak. 13 Hindi ko naman kukunin ang buong kaharian sa kanya, kundi magtitira ako ng isang angkan alang-alang sa aking lingkod na si David at dahil sa Jerusalem na aking hinirang na lungsod."

14 Pinahintulutan ng Panginoon na may kumalaban kay Solomon. Siya ay si Hadad na taga-Edom, na mula sa angkan ng isa sa mga hari ng Edom. 15 Sa nakalipas na panahon, noong nakikipagdigma si David sa Edom, si Joab na kumander ng mga sundalo ni David ay pumunta roon sa Edom para ilibing ang mga namatay sa labanan. At nang naroon na siya, pinatay niya at ng mga tauhan niya ang lahat ng lalaki sa Edom. 16 Anim na buwan silang nanatili roon. Hindi sila umalis hanggang sa mapatay nila ang lahat ng mga lalaki roon. 17 Ngunit si Hadad, na bata pa noon ay tumakas papunta sa Ehipto kasama ng ibang mga opisyal na taga-Edom na naglingkod sa kanyang ama. 18 Umalis sila sa Midian at pumunta sa Paran. At kasama ng ibang mga taga-Paran, pumunta sila sa Ehipto at nakipagkita sa Faraon, ang hari ng Ehipto. Binigyan niya si Hadad ng bahay, lupa at pagkain.

19 Nagustuhan ng Faraon si Hadad, kaya ibinigay niya ang hipag niya kay Hadad upang maging asawa nito, kapatid ito ng kanyang asawang si Reyna Tapenes. 20 Nanganak ng lalaki ang asawa ni Hadad at pinangalanan nila itong Genubat. Si Tapenes ang nagpalaki sa bata roon sa palasyo. Tumira ang bata roon kasama ng mga anak ng Faraon.

21 Nang naroon na si Hadad sa Ehipto, nabalitaan niya na patay na si David at si Joab na kumander ng mga sundalo. Sinabi ni Hadad sa Faraon, "Hayaan nʼyo na po akong umuwi sa aking bansa."

22 Nagtanong ang Faraon, "Bakit? Ano pa ba ang kulang sa iyo rito at gusto mo pang umuwi sa inyo?"

Sumagot si Hadad, "Wala po; basta pauwiin nʼyo na lang po ako."

23 May isa pang tao na pinahintulutan ng Diyos na kumalaban kay Solomon. Ito ay si Rezon na anak ni Eliada. Lumayas siya sa kanyang amo na si Haring Hadadezer ng Zoba, 24 at naging pinuno siya ng mga rebeldeng tinipon niya. Noong natalo ni David ang mga sundalo ni Hadadezer, pumunta naman si Rezon at ang mga tauhan niya sa Damasco. Sinakop nila ang lugar na ito at doon tumira. 25 Naging hari si Rezon ng Aram,* at kinalaban niya ang Israel. Naging kalaban siya ng Israel habang buháy pa si Solomon. Dinagdagan pa niya ang kaguluhan na ginawa ni Hadad sa Israel.

26 Isa pa sa mga kumalaban kay Haring Solomon ay si Jeroboam na anak ni Nebat, na isa sa mga opisyal niya. Galing siya sa lungsod ng Zereda sa Efraim. Ang ama niyang si Nebat ay patay na, ngunit ang ina niyang si Zerua ay buhay pa.

27 Ito ang nangyari kung paano siya nagrebelde sa hari: Pinatabunan noon ni Solomon ng lupa ang mababang bahagi ng bayan ng ama niyang si David at ipinaayos ang mga pader nito. 28 Maabilidad na tao si Jeroboam at nang mapansin ni Solomon ang kanyang kasipagan, itinalaga niya itong tagapamahala ng lahat ng tao na pinilit magtrabaho mula sa lahi ni Efraim at ni Manases.*

29 Isang araw, habang palabas si Jeroboam sa Jerusalem, sinalubong siya ni propetang Ahias na taga-Silo. Bago ang suot na balabal ni Ahias. Silang dalawa lang ang naroon sa kapatagan. 30 Hinubad ni Ahias ang balabal niya at pinunit ito sa labindalawang bahagi. 31 Pagkatapos, sinabi niya kay Jeroboam, "Kunin mo ang sampung piraso nito, dahil ganito ang sinasabi ng Panginoon, ang Diyos ng Israel: ‘Kukunin ko ang kaharian ni Solomon at ibibigay sa iyo ang sampung lahi nito. 32 Ngunit alang-alang kay David na aking lingkod at sa lungsod ng Jerusalem na aking hinirang sa lahat ng lungsod ng Israel, ititira ko ang isang lahi kay Solomon. 33 Gagawin ko ito dahil tinalikuran niya* ako at sinamba si Astoret, ang diyosa ng mga Sidoneo, si Cemos, ang diyos ng mga Moabita at si Molec, ang diyos ng mga Amonita. Hindi siya sumunod sa aking mga pamamaraan at hindi siya namuhay nang matuwid sa aking paningin. Hindi siya tumupad sa aking mga tuntunin at mga utos; hindi tulad ng ama niyang si David.

34 " ‘Subalit hindi ko kukunin ang buong kaharian kay Solomon. Maghahari siya sa buong buhay niya dahil sa pinili kong lingkod na si David, na tumupad sa aking mga utos at mga tuntunin. 35 Kukunin ko ang kaharian sa kanyang anak na papalit sa kanya bilang hari, at ibibigay ko ang sampung lahi ng Israel saʼyo. 36 Bibigyan ko ng isang lahi ang kanyang anak upang ang angkan ni David na aking lingkod ay magpapatuloy sa paghahari sa Jerusalem, ang lungsod na aking pinili para parangalan ang aking Pangalan. 37 At ikaw naman ay gagawin kong hari ng Israel. Pamamahalaan mo ang lahat ng gusto mo. 38 Kung tutuparin mo ang lahat ng iuutos ko sa iyo at susunod ka sa pamamaraan ko, at kung gagawa ka nang mabuti sa aking harapan sa pamamagitan ng pagtupad ng aking mga tuntunin at mga utos katulad ng ginawa ni David na aking lingkod, akoʼy makakasama mo. Mananatili sa paghahari ang iyong mga angkan tulad sa mga angkan ni David. Magiging iyo ang Israel. 39 Dahil sa mga kasalanan ni Solomon, parurusahan ko ang mga angkan ni David, pero hindi panghabang buhay.’ "

40 Nang malaman ito ni Solomon, pinagsikapan niyang patayin si Jeroboam, ngunit tumakas ito at pumunta kay Haring Shishak ng Ehipto at doon siya tumira hanggang mamatay si Solomon.

41 Ang iba pang salaysay tungkol sa paghahari ni Solomon, at ang lahat ng ginawa niya, at ang tungkol sa kanyang karunungan ay nakasulat sa Aklat ng mga Gawa ni Solomon. 42 Sa Jerusalem tumira si Solomon habang naghahari siya sa buong Israel sa loob ng apatnapung taon. 43 Nang mamatay siya, inilibing siya sa lungsod ng ama niyang si David. At ang anak niyang si Rehoboam ang pumalit sa kanya bilang hari.