1 Naghari si Solomon sa buong Israel.

2 At ito ang kanyang matataas na pinuno:

Si Azarias ang punong pari mula sa angkan ni Sadoc.

3 Sina Elihoref at Ahias na mga anak ni Sisha, ang mga kalihim ng hari.

Si Jehosafat na anak ni Ahilud, ang namamahala ng mga kasulatan ng kaharian.

4 Si Benaias na anak ni Jehoiada ang kumander ng mga sundalo.

Sina Sadoc at Abiatar ang mga pari.

5 Si Azarias na anak ni Natan ang pinuno ng mga gobernador sa mga distrito ng Israel.

Ang paring si Zabud na anak din ni Natan ang tagapayo ng hari.

6 Si Ahisar ang tagapamahala ng palasyo.

At si Adoniram na anak ni Abda ang namamahala sa sapilitang pagtatrabaho.

7 Mayroon ding labindalawang gobernador si Solomon sa mga distrito ng buong Israel. Sila ang nagbibigay ng pagkain sa hari at sa sambahayan niya. Bawat isa sa kanila ay nagbibigay ng pagkain sa isang buwan bawat taon.

8 Ito ang kanilang mga pangalan:

Si Ben-hur, na namamahala sa kabundukan ng Efraim.

9 Si Ben-deker na namamahala sa Makaz, Saalbim, Bet-semes at sa Elon-bet-hanan.

10 Si Ben-hesed na namamahala sa Arubot, kasama na rito ang Soco at ang buong lupain ng Hefer.

11 Si Ben-abinadab na namamahala sa Nafot-dor. (Asawa siya ni Tafat na anak ni Solomon.)

12 Si Baana na anak ni Ahilud, na namamahala sa Taanac, Megido, sa buong Bet-sean malapit sa Zaretan sa ibaba ng Jezreel at sa mga lugar na mula sa Bet-sean hanggang Abel-mehola at patawid sa Jocmeam.

13 Si Ben-geber, na namamahala sa Ramot-gilead, kasama na rito ang mga bayan ni Jair na anak ni Manases, at sa mga distrito ng Argob sa Bashan, kasama na ang 60 malalaki at napapaderang bayan, na ang mga pintuan ay may tarangkahang tanso.

14 Si Ahinadab na anak ni Iddo, na namamahala sa Mahanaim.

15 Si Ahimaaz, na namamahala sa Neftali. (Asawa siya ni Basemat na anak ni Solomon.)

16 Si Baana na anak ni Husai, na namamahala sa Asher at sa Alot.

17 Si Jehosafat na anak ni Parua, na namamahala sa Isacar.

18 Si Simei na anak ni Ela, na namamahala sa Benjamin.

19 Si Geber na anak ni Uri, na namamahala sa Gilead na sakop noon ni Sihon na hari ng mga Amoreo at ni Haring Og ng Bashan. Si Geber lamang ang gobernador sa buong distritong ito.*

20 Ang bilang ng mga tao sa Juda at Israel ay tulad ng buhangin sa dalampasigan na hindi mabilang. Sagana sila sa pagkain at inumin, at masaya sila. 21 Si Solomon ang namamahala sa lahat ng kaharian mula sa Ilog Eufrates hanggang sa lupain ng mga Filisteo, hanggang sa hangganan ng Ehipto. Ang mga kahariang ito ay nagbabayad ng buwis kay Solomon at nagpapasakop sa kanya habang nabubuhay siya.

22 Ito ang mga pagkaing kailangan ni Solomon sa kanyang palasyo bawat araw: isandaang sako ng magandang klaseng harina, dalawandaang sako ng ordinaryong harina, 23 sampung pinatabang baka sa kulungan, dalawampung baka na galing sa pastulan, isang daang tupa o kambing, hindi pa kasama ang ibaʼt ibang uri ng mga usa at magandang uri ng ibon at manok. 24 Sakop ni Solomon ang buong lupain sa kanlurang Ilog Eufrates mula sa Tifsa hanggang sa Gaza. At maganda ang pakikitungo niya sa lahat ng bansa sa palibot niya. 25 Kaya habang nabubuhay si Solomon, may kapayapaan sa Juda at sa Israel, mula Dan hanggang sa Beer-seba. Ang bawat tao ay payapang nakaupo sa ilalim ng kanyang tanim na ubas at puno ng igos.

26 May apatnapung libo* kuwadra si Solomon para sa kanyang mga kabayong pangkarwahe at may 12,000 siyang mangangabayo.*

27 Ang mga gobernador sa mga distrito ang nagbibigay ng pangangailangan ni Haring Solomon at ng lahat ng nasa palasyo. Ang bawat isa sa kanila ay may responsibilidad sa pagbibigay bawat buwan. Tinitiyak nilang maibibigay ang mga pangangailangan ni Solomon. 28 Nagbibigay din sila ng sebada at dayami para sa mga kabayo. Dinadala nila ito sa lugar na dapat nitong pagdalhan sa oras na kailangan ito.

29 Binigyan ng Diyos si Solomon ng di-pangkaraniwang karunungan at pang-unawa, at kaalaman na hindi masukat. 30 Ang kaalaman niya ay higit pa sa kaalaman ng lahat ng matatalino sa silangan at sa Ehipto. 31 Siya ang pinakamatalino sa lahat. Mas matalino pa siya kaysa kay Etan na Ezrano at sa mga anak ni Mahol na sina Heman, Calcol at Darda. At naging tanyag siya sa mga nakapaligid na bansa. 32 Gumawa siya ng 3,000 kawikaan at 1,005 awit. 33 Makapagsasabi siya ng tungkol sa lahat ng uri ng pananim, mula sa malalaking punongkahoy hanggang sa maliliit na pananim.* Makapagsasabi rin siya tungkol sa lahat ng uri ng hayop na lumalakad, gumagapang, lumilipad, at lumalangoy. 34 Nabalitaan ng lahat ng hari sa mundo ang karunungan ni Solomon, kaya nagpadala sila ng mga tao para makinig sa kanyang karunungan.