1 Pagkatapos ng mahabang panahon, sa ikatlong taon ng tagtuyot, sinabi ng Panginoon kay Elias, "Pumunta ka at humarap kay Ahab. Sabihin mo sa kanya na di-magtatagal at pauulanin ko na." 2 Kaya pumunta si Elias at humarap kay Ahab.

Malubha na noon ang taggutom sa Samaria. 3 Kaya ipinatawag ni Ahab si Obadias na siyang namamahala sa kanyang palasyo. (Si Obadias ay lubos na gumagalang sa Panginoon. 4 Noong ipinapatay ni Jezebel ang mga propeta ng Panginoon, may isang daang propeta na pinagtago si Obadias sa dalawang kuweba, tig-singkwenta sa bawat kuweba, at binigyan niya sila ng pagkain at tubig doon.) 5 Sinabi ni Ahab kay Obadias, "Puntahan natin ang lahat ng bukal at lambak sa ating bansa, baka sakaling makakita tayo ng mga damo para sa ating mga kabayo at mga mola,* para hindi na natin sila kailangang katayin." 6 Kaya pinaghatian nila ang lugar kung saan sila pupunta. Agad silang pumunta sa kani-kanilang direksyon.

7 Habang naglalakad si Obadias, nakasalubong niya si Elias. Nakilala niya si Elias, kaya yumukod siya at sinabi, "Kayo po ba iyan, Ginoong Elias?"

8 Sumagot si Elias, "Oo. Ngayon, pumunta ka at sabihin mo sa iyong amo na nandito ako."

9 Ngunit sinabi ni Obadias, "Ano po ang nagawa kong kasalanan sa inyo? Huwag po sana ninyong ilagay sa panganib ang buhay ko kay Ahab. 10 Nagsasabi po ako ng totoo sa presensya ng buháy na Panginoon na inyong Diyos, na walang bansa o kahariang hindi pinadalhan ng aking amo ng tao upang hanapin kayo. Kapag sinasabi ng mga pinuno ng mga bansa at mga kaharian na wala kayo sa lugar nila, pinasusumpa pa sila ni Ahab na hindi talaga nila kayo nakita. 11 At ngayon, inuutusan nʼyo po akong pumunta sa aking amo at sabihin sa kanya na nandito kayo? 12 Paano kung sa sandaling pag-alis ko ay dalhin kayo ng Espiritu ng Panginoon sa lugar na hindi ko alam? Kapag dumating si Ahab dito na wala kayo, papatayin niya ako. Ngunit ako po, mula pa sa pagkabata ko ay naglilingkod na ako sa Panginoon. 13 Hindi nʼyo ba nabalitaan ang ginawa ko noong ipinapatay ni Jezebel ang mga propeta ng Panginoon? Pinagtago ko ang isandaang propeta ng Panginoon sa dalawang kuweba, limampu sa bawat kuweba, at binigyan ko sila ng pagkain at tubig doon. 14 At ngayon inuutusan ninyo akong pumunta sa aking amo at sabihin sa kanya na nandito kayo? Papatayin po niya ako!"

15 Sinabi ni Elias, "Sumusumpa ako sa buháy na Panginoon ng mga Hukbo, na aking pinaglilingkuran, na makikipagkita ako kay Ahab sa araw na ito."

16 Kaya pumunta si Obadias kay Ahab at sinabi sa kanya na naroon si Elias, at lumakad si Ahab upang makipagkita kay Elias. 17 Nang makita ni Ahab si Elias, sinabi niya, "Ikaw ba talaga iyan, ang nanggugulo sa Israel?"

18 Sumagot si Elias, "Hindi ako ang nanggugulo sa Israel, kundi ikaw at ang pamilya ng iyong ama. Dahil itinakwil ninyo ang mga utos ng Panginoon at sinamba ninyo ang mga diyos-diyosang si Baal. 19 Ngayon, tipunin mo ang lahat ng mamamayan ng Israel para samahan nila ako sa Bundok ng Carmel. At papuntahin mo rin ang 450 propeta ni Baal at ang 400 propeta ng diyosang si Ashera, na pinapakain ni Jezebel."

20 Kaya tinipon ni Ahab ang lahat ng mamamayang Israelita at ang mga propeta sa Bundok ng Carmel. 21 Lumapit si Elias sa mga tao at sinabi, "Hanggang kailan pa ba kayo mag-aalinlangan? Kung ang Panginoon ang totoong Diyos, sundin ninyo siya, subalit kung si Baal ang totoong Diyos, sundin ninyo ito." Ngunit hindi sumagot ang mga tao.

22 Sinabing muli ni Elias sa kanila, "Ako na lang ang natitira sa mga propeta ng Panginoon, pero si Baal ay may 450 propeta. 23 Ngayon, dalhan ninyo kami ng dalawang toro. Pagkatapos, pumili ang mga propeta ni Baal ng kanilang kakatayin at ilagay ito sa ibabaw ng gatong, ngunit hindi ito sisindihan. Ganoon din ang gagawin ko sa isang toro; ilalagay ko rin ito sa ibabaw ng gatong at hindi ko rin ito sisindihan. 24 Pagkatapos, manalangin kayo sa inyong diyos, at mananalangin din ako sa Panginoon. Ang sasagot sa pamamagitan ng apoy ang siyang totoong Diyos."

At sumang-ayon ang mga tao.

25 Sinabi ni Elias sa mga propeta ni Baal, "Kayo ang mauna dahil marami kayo. Mamili kayo ng isang toro at ihanda ninyo. Manalangin na kayo sa inyong diyos, pero huwag ninyong sisindihan ang gatong." 26 Kaya kinuha ng mga propeta ni Baal ang toro na dinala sa kanila, at inihanda ito.

Pagkatapos, nanalangin sila kay Baal mula umaga hanggang tanghali. Sumigaw sila, "O Baal, sagutin mo kami!" Sumayaw-sayaw pa sila sa paligid ng altar na ginawa nila. Pero walang sumagot.

27 Nang tanghaling-tapat na, ininsulto na sila ni Elias. Sabi niya, "Sige lakasan nʼyo pa ang pagsigaw, diyos naman siya! Baka nagbubulay-bulay lang siya, o nagpapahinga,* o may pinuntahan, o nakatulog at kailangang gisingin." 28 Kaya sumigaw pa sila nang malakas at sinugatan ang mga katawan nila ng sibat at espada ayon sa kinaugalian nila, hanggang sa dumanak ang dugo. 29 Lumipas ang tanghali, tuloy-tuloy pa rin ang pagsigaw nila hanggang dumating na ang takdang oras ng paghahandog sa hapon, ngunit wala pa ring sumagot sa kanila.

30 Nagsalita si Elias sa lahat ng tao, "Lumapit kayo sa akin." At nagsilapit ang mga tao sa kanya. Inayos niya ang altar ng Panginoon na nagiba. 31 Kumuha siya ng labindalawang bato na sumisimbolo ng labindalawang lahi ng mga anak ni Jacob, ang taong pinangalanan ng Panginoon na Israel. 32 Ginawa niyang altar para sa Panginoon ang mga bato at ginawan ng kanal ang paligid nito. Ang kanal ay kayang malagyan ng tatlong galong butil. 33 Iniayos niya nang mabuti ang panggatong sa altar, kinatay ang toro at inilapag ito sa ibabaw ng gatong. Pagkatapos, sinabi niya sa mga tao, "Buhusan ninyo ng apat na tapayang tubig ang handog at panggatong."

34 Matapos nilang gawin ito, sinabi ni Elias, "Buhusan ninyo ulit."

Pagkatapos nilang buhusan, sinabi ulit ni Elias, "Buhusan pa ninyo sa ikatlong pagkakataon." Sinunod nila ang sinabi ni Elias, 35 at umagos ang tubig sa paligid ng altar, at napuno ang kanal.

36 Nang oras na ng paghahandog, lumapit si Propeta Elias sa altar at nanalangin. Sinabi niya, "Panginoon, Diyos ni Abraham, ni Isaac at ni Jacob,* patunayan ninyo sa araw na ito, na kayo ang Diyos ng Israel at ako ang inyong lingkod, at ginawa ko ang lahat ng ito ayon sa utos ninyo. 37 Panginoon, dinggin nʼyo po ako, upang malaman ng mga tao na kayo Panginoon, ang Diyos, at nais nʼyo silang magbalik-loob sa inyo."

38 Dumating agad ang apoy na galing sa Panginoon, at sinunog nito ang handog, ang gatong, ang mga bato at ang lupa, at natuyo ang kanal.

39 Nang makita ito ng lahat ng tao, nagpatirapa sila at sinabi, "Ang Panginoon ang siyang Diyos! Ang Panginoon ang siyang Diyos!"

40 Iniutos agad ni Elias sa mga tao, "Dakpin ninyo ang mga propeta ni Baal. Dapat walang makatakas sa kanila!" Dinakip ang lahat ng propeta ni Baal at dinala sila ni Elias sa Lambak ng Kison at pinagpapatay.

41 Sinabi ni Elias kay Ahab, "Humayo ka, kumain at uminom, dahil paparating na ang malakas na ulan." 42 Kaya humayo si Ahab para kumain at uminom, pero si Elias ay umakyat sa bundok ng Carmel at nanalangin, na nakaluhod at nakayuko sa lupa.

43 Pagkatapos, sinabi niya sa kanyang utusan, "Umakyat ka at tumingin sa dagat." At sinunod ito ng utusan.

Pagbalik niya kay Elias, sinabi niya, "Wala po akong nakikita."

Pitong beses na sinabi ni Elias na bumalik siya at tumingin.

44 Nang ikapitong pagbalik niya, sinabi niya kay Elias, "May nakita po akong ulap na maitim na kasinlaki ng palad ng tao, na pumapaibabaw mula sa laot."

Kaya sinabi ni Elias, "Pumunta ka at sabihin mo kay Ahab na sumakay siya sa kanyang karwahe at umuwi bago pa siya maabutan ng ulan."

45 Di nagtagal, dumilim ang langit dahil sa makapal na ulap. Humangin at umulan nang malakas, at sumakay si Ahab sa karwahe at pumunta sa Jezreel. 46 Pinalakas ng Panginoon si Elias. Ibinigkis niya sa baywang ang balabal niya at tumakbo, at nauna pa kay Ahab papunta sa Jezreel.