1 Ito ang Magandang Balita tungkol kay Hesus, ang Mesias,* na Anak ng Diyos. Nagsimula ito 2 ayon sa isinulat ni Propeta Isaias:

"Ipapadala ko ang aking mensahero.

Mauuna siya sa iyo

upang ihanda ang dadaanan mo."*

3 "May sumisigaw sa ilang na nagsasabi,

‘Ihanda ninyo ang daan para sa Panginoon,

tuwirin ninyo ang landas na kanyang lalakaran.’ "*

4 Dumating nga sa ilang si Juan na Tagapagbautismo. Ipinangaral niya sa mga tao na kailangan nilang pagsisihan at talikuran ang kanilang mga kasalanan, at magpabautismo para sa kapatawaran ng kanilang mga kasalanan. 5 Pinupuntahan siya ng maraming tao mula sa Jerusalem at sa buong lalawigan ng Judea. Ipinagtatapat nila ang kanilang mga kasalanan at silaʼy binabautismuhan ni Juan sa Ilog Jordan. 6 Ang damit ni Juan ay gawa sa balahibo ng kamelyo at ang sinturon niyaʼy gawa sa balat ng hayop. Ang kinakain niya ay balang at pulot-pukyutan. 7 Ito ang ipinapahayag niya, "May isang darating na kasunod ko na mas makapangyarihan kaysa sa akin. Kahit ang yumuko para magkalag ng tali ng kanyang sandalyas ay hindi ako karapat-dapat. 8 Binabautismuhan ko kayo sa tubig, ngunit babautismuhan niya kayo sa Banal na Espiritu."

9 Sa panahong iyon, dumating si Hesus mula sa Nazaret na sakop ng Galilea at nagpabautismo kay Juan sa Ilog Jordan. 10 Pagkaahon ni Hesus sa tubig, nakita niyang bumukas ang langit at bumaba sa kanya ang Espiritu tulad sa isang kalapati. 11 At may boses na narinig mula sa langit na nagsabi, "Ikaw ang minamahal kong Anak; lubos kitang kinalulugdan."

12 At noon din ay pinapunta siya ng Espiritu sa ilang. 13 Nanatili siya roon nang apatnapung araw at sa loob ng apatnapung araw na iyon, tinukso siya ni Satanas. May kasama siyang mababangis na hayop doon, at pinaglingkuran siya ng mga anghel.

14 Nang mabilanggo si Juan, pumunta si Hesus sa Galilea at ipinangaral doon ang Magandang Balita mula sa Diyos. 15 Sinabi niya, "Dumating na ang takdang panahon! Malapit na* ang paghahari ng Diyos. Pagsisihan at talikuran na ninyo ang inyong mga kasalanan, at maniwala kayo sa Magandang Balita!"

16 Isang araw, habang naglalakad si Hesus sa tabi ng Lawa ng Galilea, nakita niya si Simon at ang kapatid nitong si Andres. Naghahagis sila ng lambat sa lawa sapagkat silaʼy mga mangingisda. 17 Sinabi ni Hesus sa kanila, "Halikayo, sumunod kayo sa akin at gagawin ko kayong mangingisda ng mga tao." 18 Kaagad nilang iniwan ang mga lambat nila at sumunod sa kanya.

19 Patuloy na naglakad si Hesus, at sa di-kalayuan ay nakita naman niya ang dalawang anak ni Zebedeo na sina Santiago at Juan. Nasa bangka sila at nag-aayos ng kanilang lambat. 20 Agad silang tinawag ni Hesus. Iniwan nila sa bangka ang kanilang amang si Zebedeo at ang mga tauhan nila, at sumunod kay Hesus.

21 Pumunta sina Hesus sa bayan ng Capernaum. Nang dumating ang Araw ng Pamamahinga, pumasok sila sa sinagoga at doon ay nagturo si Hesus. 22 Namangha ang mga tao sa mga aral niya, dahil nangangaral siya nang may awtoridad, hindi tulad ng mga tagapagturo ng Kautusan. 23 May isang tao roon na sinasaniban ng masamáng espiritu ang biglang nagsisigaw: 24 "Ano ang pakay mo sa amin, Hesus na taga-Nazaret? Naparito ka ba para puksain kami? Kilala kita. Ikaw ang Banal na Sugo ng Diyos!"

25 Ngunit sinaway ni Hesus ang masamang espiritu, "Tumahimik ka at lumabas sa kanya!" 26 Pinangisay ng masamáng espiritu ang tao, at sumigaw ito habang lumalabas.

27 Namangha ang lahat ng naroon, at sinabi nila sa isaʼt isa, "Anong bagong aral ito? May kapangyarihang utusan ang mga masasamáng espiritu at sumusunod sila!" 28 At mabilis na kumalat ang balita tungkol kay Hesus sa buong Galilea.

29 Mula sa sinagoga, sumáma si Hesus kina Simon at Andres sa kanilang bahay. Kasama rin nila sina Santiago at Juan. 30 Nadatnan nilang nakahiga ang biyenang babae ni Simon dahil nilalagnat ito. Sinabi nila agad ito kay Hesus. 31 Kaya nilapitan ni Hesus ang may sakit, hinawakan ang kamay nito at ibinangon. Biglang nawala ang lagnat niya, at pinagsilbihan niya sina Hesus.

32 Pagkalubog ng araw, dinala ng mga tao kay Hesus ang mga maysakit at mga sinasapian ng demonyo. 33 Napakaraming tao sa bayang iyon ang nagkatipon-tipon sa may pintuan ng bahay. 34 Pinagaling ni Hesus ang maraming may sakit, anuman ang kanilang karamdaman, at pinalayas din niya ang maraming demonyo. Hindi niya pinayagang magsalita ang mga demonyo dahil alam nila kung sino siya.

35 Kinabukasan ng madaling-araw, bumangon si Hesus at pumunta sa ilang upang manalangin. 36 Hindi nagtagal, hinanap siya nina Simon at ng mga kasamahan niya. 37 Nang matagpuan nila si Hesus, sinabi nila, "Hinahanap po kayo ng lahat."

38 Ngunit sinabi ni Hesus sa kanila, "Pumunta naman tayo sa mga kalapit-bayan, upang makapangaral din ako roon, dahil ito ang dahilan kung bakit ako naparito sa mundo." 39 Kaya nilibot ni Hesus ang buong Galilea at nangaral sa mga sinagoga, at pinalayas ang mga demonyo sa mga taong sinapian ng mga ito.

40 Lumapit kay Hesus ang isang lalaking may malubhang sakit sa balat.* Lumuhod ito sa harap niya at nagmakaawa. Sinabi niya, "Kung gugustuhin po ninyo, mapapagaling nʼyo ako upang maituring akong malinis.*"

41 Naawa si Hesus sa kanya, kaya hinawakan niya ito at sinabi, "Gusto ko. Gumaling ka!" 42 Agad na nawala ang kanyang sakit sa balat, at siyaʼy naging malinis.

43 Pinaalis agad siya ni Hesus at mahigpit na binilinan, 44 "Huwag mo itong ipagsasabi kahit kanino. Sa halip, pumunta ka sa pari at magpasuri. Dalhin mo ang handog na hinihiling ng Kautusan ni Moises sa mga taong gumaling sa sakit sa balat. Gawin mo ito bilang patunay sa mga tao na malinis ka na." 45 Ngunit pagkaalis niya ay ipinamalita niya ang nangyari sa kanya. Kaya kumalat ang balitang ito hanggang sa hindi na lantarang makapasok si Hesus sa mga bayan dahil pinagkakaguluhan siya ng mga tao. Kaya doon na lang siya nanatili sa mga ilang. Ngunit pumupunta pa rin doon ang mga tao mula sa ibaʼt ibang lugar.