1 Samantala, nabalitaan nina Sanbalat, Tobias, Gesem na taga-Arabia, at ng iba pa naming mga kalaban na natapos na namin ang pagpapatayo ng pader at wala na itong mga butas, maliban na lamang sa mga pinto nito na hindi pa naikakabit. 2 Kaya nagpadala sina Sanbalat at Gesem ng ganitong mensahe sa akin: "Gusto naming makipagkita sa iyo sa isang nayon ng kapatagan ng Ono."

Ngunit nalaman ko na may balak silang masama sa akin. 3 Kaya nagsugo ako ng mga mensahero para sabihin ito sa kanila, "Mahalaga ang ginagawa ko ngayon, kaya hindi ako makakapunta riyan. Hindi ko maaaring itigil ang paggawa para lang pumunta riyan." 4 Apat na beses nila akong pinadalhan ng ganoong mensahe at apat na beses ko rin silang pinadalhan ng parehong sagot.

5 Sa panglimang beses pinapunta ni Sanbalat sa akin ang alipin niya na may dalang sulat na nakabukas na. 6 At ito ang nakasulat:

"Ipinagtapat sa akin ni Gesem* na kahit saan siya pumunta ay naririnig niyang ikaw at ang mga Hudyo ay nagbabalak mag-alsa, at iyan ang dahilan kung bakit muli ninyong ipinapatayo ang pader. At ayon sa narinig niya, gusto mong maging hari ng mga Hudyo, 7 at pumili ka pa ng mga propeta na magpoproklama sa iyo sa Jerusalem na ikaw na ang hari ng Juda. Tiyak na malalaman ito ng hari, kaya pumarito ka upang pag-usapan natin ang mga bagay na ito."

8 Ito ang sagot ko sa kanya: "Hindi totoo ang mga sinasabi mo. Gawa-gawa mo lang iyan."

9 Alam kong tinatakot lang nila kami upang mahinto ang paggawa namin.

Ngunit nanalangin ako sa Diyos na palakasin pa niya ako.

10 Isang araw, pumunta ako kay Semaias na anak ni Delaias at apo ni Mehetabel, dahil hindi siya makaalis sa bahay niya. Sinabi niya sa akin, "Magkita tayo sa loob ng bahay ng Diyos, at ikandado natin ang mga pintuan. Dahil darating ang mga kalaban mo ngayong gabi upang patayin ka."

11 Ngunit sumagot ako, "Gobernador ako, bakit ako lalayo at magtatago sa loob ng Templo upang iligtas ang buhay ko? Hindi ako magtatago!" 12 Naisip kong hindi nangusap ang Diyos sa kanya, kundi inupahan lamang siya nina Sanbalat at Tobias para sabihin iyon sa akin. 13 Gusto lamang nila akong takutin at magkasala sa pamamagitan ng pagsunod sa sinasabi ni Semaias, upang hamakin nila ako at pintasan ng mga tao.

14 O aking Diyos, huwag nʼyo pong kalimutan si Tobias at si Sanbalat sa kanilang mga masamang ginawa, pati na ang babaeng propeta na si Noadias at ang iba pang mga propeta na naghangad na takutin ako. 15 Natapos ang pader noong ikadalawampuʼt limang araw ng buwan ng Elul, sa loob ng limampuʼt dalawang araw.

16 Nang mabalitaan ito ng aming mga kalaban sa kalapit na mga bansa, natakot sila at napahiya. Napag-isip-isip nila na natapos ang gawaing iyon sa pamamagitan ng tulong ng Diyos.

17 Nang panahong iyon, nagsusulatan sina Tobias at ang mga pinuno ng Juda. 18 Maraming taga-Juda ang sumumpa ng katapatan kay Tobias dahil manugang siya ni Secanias na anak ni Ara. At isa pa, napangasawa ng anak niyang si Jehohanan ang anak ni Mesulam na anak ni Berequias. 19 Palaging sinasabi sa akin ng mga tao ang tungkol sa mabubuting ginawa ni Tobias, at palagi ring nakakarating sa kanya ang mga sinasabi ko. At patuloy na sumusulat si Tobias sa akin upang takutin ako.