EKSODAS 2

Moses i bon

1 Nao long taem ya i gat wan man long laen* blong Livae* we i mared* long wan woman long sem laen ya bakegen. 2 ✝2.2: Wok 7.20; Hib 11.23Nao woman ya i bonem wan pikinini boe blong tufala, mo i luk we pikinini ya i gud tumas, nao i stap haedem hem gogo kasem tri manis. 3 Be taem pikinini ya i kam bigwan lelebet, mama blong hem i no moa save haedem hem, nao i tekem wan bigfala basket we oli wokem long stik blong wan longlongfala gras blong wota, mo i blokem long kolta blong wota i no save go insaed. Nao hem i putum pikinini ya insaed, mo i go haedem long medel blong ol longlongfala gras we i stap gru long saed blong Nael Reva. 4 Nao sista blong pikinini ya i stap stanap longwe lelebet, blong lukluk se wanem bambae i hapen long pikinini ya.

5 Nao dota blong king wetem ol gel blong wok blong hem oli kamdaon long reva ya, blong i swim. Mo taem hem i stap swim, ol gel ya oli stap wokbaot long saed blong reva ya. Nao hem i sek long basket ya we i stap long medel blong ol longlongfala gras ya, mo i sanem wan long ol gel ya i go karem basket ya i kam long hem. 6 Nao taem hem i openem basket ya, hem i luk smol pikinini ya i stap insaed, i stap krae, mo hem i sore long hem, nao i talem se, "Hemia pikinini blong wan Hibru* ya."

7 Nao sista blong smol pikinini ya i kam askem long hem se, "?Olsem wanem? ?Yu wantem blong mi go lukaot wan woman Hibru blong i kam givim titi long pikinini ya?"

8 Mo hem i talem long gel ya se, "Yes, yu go." Nao gel ya i go, i tekem mama blong pikinini ya i kam. 9 Nao dota blong king i talem long hem se, "Yu tekem pikinini ya blong mi, yu go givim titi long hem, mo yu lukaot gud long hem. Bambae mi mi pem yu from." Nao woman ya i tekem pikinini ya i go, i stap givim titi long hem, mo i stap lukaot gud long hem. 10 ✝2.10: Wok 7.21Nao, biaen, taem pikinini ya i kam bigfala, mama blong hem i tekem hem i gobak long dota blong king, nao hem i stap lukaot long hem olsem stret pikinini blong hem nomo. Mo hem i talem se, "From we mi mi tekemaot hem long wota, bambae mi putum nem blong hem se ‘Moses’.*2.10: Moses. Long lanwis ya Hibru, nem ya klosap i olsem wan narafala tok we i min se "Tekemaot"."