1 Nao Moses i singaot ol laen* blong Isrel* oli kam wanples, mo i talem long olgeta se, "Olgeta. Ol samting we Hae God i talem blong yumi mekem, i olsem. 2 ✝Hem i talem se, ‘Evri wik, bambae yufala i stap wok sikis dei, be namba seven dei, hem i tabu dei blong yufala, i dei blong spel, we i tabu, i blong mi. Sipos wan man i mekem wok long dei ya, bambae yufala i mas kilim hem i ded. 3 Long dei ya, i tabu blong yufala i mekem faea long ples blong yufala.’ "

4 Nao Moses i talem long olgeta se, "Ol samting we Hae God i talem se yumi mas mekem i olsem. 5 Yumi mas tekem ol samting blong wokem Haos Tapolen blong hem long hem, yumi givim i go long hem. Man we tingting blong hem i glad blong givim sam samting, hem i save givim gol, no silva, no bras, 6 no waet kaliko ya linen* we i beswan, no tred we i blu no i pepol no i red, no kaliko ya we oli wokem long hea blong nani, 7 no skin blong man sipsip we oli wokem i red, no nambawan leta ya we oli wokem long skin blong sikao, no wud ya kasis,* 8 no olifoel* blong laet, no ol lif ya we i gat gudfala smel, we i blong putum long tabu oel ya we i blong makemaot man we mi mi jusumaot, mo we i blong putum long insens* 9 no gudfala ston ya kanilian,* we i red, wetem ol narafala gudgudfala ston ya we i blong putum long efod* blong hae pris,* mo long spesel paos ya we hem i hangem long jes blong hem."

10 Mo Moses i talem long olgeta se, "I gud olgeta man blong yumi we oli gat gudhan oli kam blong wokem ol samting ya we Hae God i talem se bambae yumi mas wokem. 11 Ol samting ya i olsem. I gat Haos Tapolen blong Hae God, mo tapolen blong putum antap long hem, mo narafala tapolen blong putum antap long hem bakegen, mo ol huk blong hem, mo ol frem* blong hem wetem ol stamba blong olgeta, mo ol rel blong hem, mo ol pos blong hem wetem ol stamba blong olgeta, 12 mo Bokis ya we i Saen blong Promes* blong Hae God wetem tufala stik blong karem, mo Lid blong hem we i Ples we Hae God i stap Tekemaot Sin blong yumi, mo kaliko blong blokem ples we Bokis ya bambae i stap long hem, 13 mo Tebol blong Bred we oli givim i go long Hae God wetem tufala stik blong karem mo ol narafala samting blong hem, mo bred we oli givim i go long hem, 14 mo Ples blong Putum Laet wetem ol samting blong hem, mo ol laet blong hem wetem oel blong olgeta, 15 mo Olta blong Bonem Insens wetem tufala stik blong karem, mo tabu oel we i blong makemaot man we Hae God i jusumaot, mo insens* we i gat gudfala smel blong hem, mo bigfala kaliko ya we i blong blokem Haos Tapolen ya long fran, 16 mo Olta blong Bonem Sakrefaes wetem haf blong hem daon we bambae yumi wokem netwaea blong hem long bras, mo tufala stik blong karem wetem ol narafala samting blong hem, mo Bras Besin wetem ples blong hem, 17 mo ol kaliko blong blokem fenis blong yad blong Haos Tapolen ya wetem ol pos blong fenis ya mo ol stamba blong olgeta, mo kaliko blong blokem doa blong yad ya, 18 mo ol rop blong Haos Tapolen ya wetem ol aean we bambae yumi fasem ol rop ya long olgeta, mo ol rop blong ol pos blong fenis blong yad blong Haos Tapolen ya wetem ol aean we bambae yumi fasem ol rop ya long olgeta, 19 mo ol gudgudfala klos ya we bambae ol pris* oli putum blong kam long Rum we i Tabu. Hemia ol spesel klos we Eron mo ol pikinini blong hem bambae oli putum taem oli kam pris, mo taem oli stap mekem wok blong olgeta."

20 Nao ol man ya oli aot, oli gobak long ol haos blong olgeta. 21 Nao olgeta we tingting blong olgeta i glad blong givim sam samting i go long Hae God blong mekem wok ya, olgeta oli tekem ol samting ya i kam. Olgeta oli karem ol samting blong wokem Haos Tapolen ya blong Hae God, mo blong wokem ol samting blong mekem wosip long Haos Tapolen ya, mo blong wokem ol klos blong pris.* 22 Ol man mo ol woman we oli glad blong givim ol flas samting blong olgeta i go long Hae God, oli tekem ol gol pin, mo ol iaring, mo ol ring, mo ol jen blong hangem long nek, mo ol narafala flas samting we ol man oli wokem long gol, nao oli kam givim i go long hem. 23 Mo olgeta we oli gat gudfala tred ya linen* we i waet, no tred we i blu, no i pepol, no i red, no kaliko we oli wokem long hea blong nani, no skin blong man sipsip we oli wokem i red, no nambawan leta ya we oli wokem long skin blong sikao oli karem i kam. 24 Olgeta we oli save givim silva no bras long wok ya, oli karem i kam, mo olgeta we oli gat wud ya kasis* we i stret blong yusum long wok ya oli karem i kam. 25,26 Olgeta woman we oli gat gudhan blong wokem tred ya long flakis* we i waet, we i blong wivim gudfala kaliko ya linen long hem, mo tred ya we i blu, mo tred we i pepol, mo tred we i red, mo tred ya we oli wokem long hea blong nani oli karem ol tred ya i kam. 27 Ol lida blong olgeta oli tekem ol gudfala ston ya kanilian* we i red, mo ol nara gudgudfala ston ya we oli blong putum long spesel klos ya efod,* mo long spesel paos ya we hae pris bambae i hangem long jes blong hem, nao oli karem i kam. 28 Mo oli tekem ol lif ya we i gat gudfala smel, we i blong putum long tabu oel ya we i blong makemaot man we Hae God i jusumaot, mo we i blong putum long insens,* mo oli tekem olifoel* blong putum long laet mo blong wokem tabu oel ya long hem, nao oli karem i kam. 29 Olgeta man mo woman we oli glad blong givhan long wok ya oli karem ol samting ya i kam, oli givim i go long Hae God.

30,31 Nao Moses i talemaot long ol laen* ya blong Isrel* se, "Hae God i jusumaot man ya Bejalehel finis, mo i mekem we paoa blong hem i kam fulap long hem.* blong hem i kam fulap long hem. Man ya, papa blong hem Uri, mo bubu blong hem Huru we i laen blong Juda,* mo Hae God i givim save long hem, mo i mekem we hem i gat gudhan blong mekem plante gudgudfala wok. 32 Man ya i save mekem plan blong ol gudgudfala samting, mo i save wokem ol samting ya long gol mo long silva mo long bras. 33 Hem i save katem ol gudgudfala ston we i blong flasem ol samting, mo i save wokem ol gol blong holemgud olgeta, mo i save katem ol samting tu long wud. Mo hem i gat gudhan blong mekem evri naranarafala wok olsem we i nambawan. 34 Hem wetem Oholiab, we papa blong hem Ahisamak we i laen blong Dan,* Hae God i givim save long tufala, blong tufala i save tijim ol narafala man long fasin blong wok blong tufala. 35 Hem i givim save long tufala blong tufala i save mekem ol wok blong katem ol gudgudfala ston blong flasem ol samting, mo blong mekem plan blong ol gudgudfala samting we bambae tufala i wokem, mo blong wivim waet kaliko ya linen* we i beswan, mo blong flasem kaliko ya long tred we i blu, mo tred we i pepol, mo tred we i red, mo blong wivim ol narafala kaliko tu. Tufala ya i waes gud blong mekem plan blong ol gudgudfala samting, mo tufala i save mekem evri wok tu blong mekem ol samting olsem.