Ol man blong wokem Haos Tapolen blong Hae God wetem ol samting we i stap insaed
1 Nao Hae God i talem long Moses se, 2,3 "Moses. Mi mi jusumaot man ya Bejalehel finis, mo mi mekem we paoa blong mi i kam fulap long hem.31.2-3: Narafala rod blong tanem tok blong Hae God long fas haf blong vas ya i olsem. Mi mi jusumaot man ya Bejalehel finis, mo mi mekem we Spirit blong mi i kam fulap long hem. Man ya, papa blong hem Uri, mo bubu blong hem Huru we i laen* blong Juda,* mo mi mi givim save long hem, mo mi mekem we hem i gat gudhan blong mekem plante gudgudfala wok. 4 Hem i save mekem plan blong ol gudgudfala samting, mo i save wokem ol samting ya long gol mo long silva mo long bras. 5 Hem i save katem ol gudgudfala ston we i blong flasem ol samting, mo i save wokem ol gol blong holemgud olgeta, mo i save katem ol samting tu long wud. Mo hem i gat gudhan blong mekem evri naranarafala wok olsem. 6 Mo mi jusumaot tu Ahisamak ya we papa blong hem Oholiab we i laen blong Dan,* blong i givhan long hem. Mo mi givim bigfala save tu long olgeta narafala man we oli gat gudhan blong mekem wok olsem, blong bambae oli save wokem olgeta samting ya we mi mi talem long yu.