1 ✝Fastaem, Moses olgeta oli tekem plante graon long saed blong Jodan Reva long is, mo long taem ya, sam long olgeta oli stap long hem finis. Graon ya i stat long Anon Reva long saot, i folem Jodan Reva i go antap, gogo kasem bigfala hil ya Hemon long not. Olgeta oli mekem faet long tu king* blong ples ya, mo oli winim tufala. 2 Nem blong wan, King Sihon, we i king blong ol laen* blong Amoro,* we hedkwota blong hem i stap long taon ya Hesbon. Ples we hem i king long hem, haf blong distrik ya Gilead, i stat long taon ya Aroere long saot, klosap long Anon Reva saed i kam, wetem narafala taon ya klosap long reva ya, i go kasem Jabok Reva we i mak blong graon blong ol man Amon. 3 Nao mak blong graon ya i folem reva ya, i godaon kasem Jodan Reva, mo i finisim olgeta graon long ples ya, i stat long Lugun* ya long Galili,* i kamkam kasem taon ya Betsesimot, klosap long Ded* Si long saed long is, mo i go finis long bigfala hil ya Pisga long saot bakegen.

4 Mo nem blong narawan we oli winim, King Og, we i king blong distrik ya Basan. King ya i wan laswan long olgeta we oli stap singaot olgeta bifo se ol Refaem,* mo i mekem hedkwota blong hem long tufala taon ya Astarot mo Edrei. 5 Ples we hem i king long hem i haf blong distrik ya Gilead, i stat long Jabok Reva, we i mak blong graon blong King Sihon blong Hesbon long saot, i go kasem taon ya Salkaha long is, i go kasem bigfala hil ya Hemon long not, mo i finisim olgeta ples long Basan, gogo kasem mak blong graon blong ol man Gesuru mo ol man Mahaka.

6 ✝Tufala king ya nao we Moses, man blong wok blong Hae God wetem ol man blong hem oli winim tufala. Nao Moses i givim olgeta graon ya i go long ol laen blong Ruben,* mo long ol laen blong Gad,* mo long haf ya blong olgeta we oli laen blong Manase,* mo olgeta oli holem i blong olgeta.

7 Mo i gat ol narafala king* bakegen long saed blong Jodan Reva long wes we Josua wetem ol man blong hem oli winim olgeta. Mo oli holem olgeta graon blong ol king ya i stat long not long ples ya Balgad long levelples long medel blong ol hil long Lebanon, i go kasem bigfala hil ya Halak klosap long kantri ya Edom long saot. Mo long taem ya, Josua i seraot ol graon ya long ol distrik, i givim wanwan i go long ol twelef laen* ya blong Isrel,* nao olgeta oli holem i blong olgeta. 8 Graon ya i bigwan, i finisim olgeta ples blong hil, i go kasem ol smosmol hil saed i go long wes, mo i go kasem Jodan Reva saed i go long is, mo i tekem olgeta draeples long saot. Bifo, graon ya i blong ol laen blong Het, mo i blong ol laen blong Amoro,* mo i blong ol laen blong Kenan,* mo i blong ol laen blong Perij, mo i blong ol laen blong Hivi,* mo i blong ol laen blong Jebus. Be long taem ya, Josua olgeta oli tekem i blong olgeta. 9 Ol taon we olgeta ya oli winim ol king blong olgeta, nem blong olgeta i olsem. I gat Jeriko, mo Eae we i klosap long Betel. 10 Mo i gat Jerusalem,* mo Hebron, 11 mo Jamut, mo Lakis, 12 mo Eglon, mo Gesa, 13 mo Debiri, mo Geda, 14 mo Homa, mo Arad, 15 mo Libnaha, mo Adulam, 16 mo Makeda, mo Betel, 17 mo Tapua, mo Hefa, 18 mo Afek, mo Lasaron, 19 mo Madon, mo Hajoro, 20 mo Simronmeron, mo Aksaf, 21 mo Tahanak, mo Megido, 22 mo Kedes, mo Jokneam we i klosap long Kamel, 23 mo Doro we i klosap long solwota, mo Goeim long Galili,* 24 mo Tijaha. Namba blong ol king ya we oli kilim olgeta, i gat toti wan olgeta.