1 Nao long taem ya, Josua i kam olfala we i olfala, mo Hae God i talem long hem se, "Josua. Naoia, yu yu olfala, be i gat bigfala graon i stap yet we yufala i mas tekem. 2 Ol graon ya i olsem. Faswan, i gat distrik blong ol man Filistia, wetem distrik blong ol man Gesuru, 3 mo distrik blong ol laen* blong Avim. (Distrik ya blong ol man Filistia i stat long reva ya Sihoro long saot, we i mak blong graon blong ol man Ijip, mo i finisim ol graon blong olgeta long Gasa mo long Asdod mo long Askelon mo long Gat mo long Ekron, kamkam kasem en blong mak blong graon blong ol man Ekron saed i kam. Long taem ya, ol ples ya, oli kaontem wetem Kenan.*) 4 Mo i gat ol distrik we i stap yet we i blong ol laen blong Kenan, mo ples ya Meara long not, we i stap long han blong ol man Saedon, gogo kasem Afek longwe long mak blong graon blong ol laen blong Amoro,* 5 mo distrik blong ol man Gebal, mo distrik blong ol man Lebanon long ples blong hil long not, i stat long Balgad we i klosap long bigfala hil ya Hemon saed i kam, gogo kasem ples we rod i gotru long ol hil long Hamat. 6 ✝Ol graon ya we i stat long Misrefotmaem long not, mo i go kavremap ol hil blong Lebanon, hem i finisim distrik blong ol man Saedon long ples blong hil.

"Sipos yufala i kam klosap long ol ples ya, mi bambae mi ronemaot ol man we oli stap long hem oli gowe long fes blong yufala. Nao yu yu mas seraot ol graon ya i go long ol man blong mi, olsem we mi mi talem finis long yu. 7 Yu mas seraot olgeta graon ya i go long ol naen laen blong yufala, wetem narafala haf blong ol laen blong Manase,* we oli no gat graon blong olgeta yet. Bambae oli holem ol graon ya i blong olgeta."

8 ✝Long taem ya, ol laen* blong Ruben,* mo ol laen blong Gad,* mo haf ya blong ol laen blong Manase* oli gat graon finis we Moses, man blong wok blong Hae God i givim long olgeta, long narasaed Jodan Reva long is. 9 Graon ya blong olgeta i stat long taon ya Aroere long saot, klosap long Anon Reva saed i kam, wetem narafala taon ya klosap long reva ya, gogo i finisim bigfala levelples antap long hil we i stat long taon ya Medebaha, i go kasem taon ya Dibon. 10 Long saed long is, graon ya i go kasem mak blong graon blong ol man Amon. Mo long saed long not, i finisim olgeta taon ya we King* Sihon blong ol laen blong Amoro* i rul long hem, wetem taon ya blong hem Hesbon. 11 Mo i finisim olgeta graon blong distrik ya Gilead, mo distrik blong ol man Gesuru, mo distrik blong ol man Mahaka, wetem bigfala hil ya Hemon, wetem olgeta graon blong distrik ya Basan go kasem taon ya Salkaha. 12 Graon ya blong olgeta i finisim distrik we King Og i rul long hem, wetem tufala taon ya, Astarot mo Edrei, we tufala i hedkwota blong hem. King ya i laswan blong olgeta ya we bifo oli talem nem blong olgeta se ol Refaem.* Ol man blong ol ples ya, Moses olgeta oli winim olgeta finis mo oli ronemaot olgeta. 13 Be oli no ronemaot ol man Gesuru wetem ol man Mahaka, nao olgeta ya oli stap yet wetem olgeta, kam kasem tede.

14 ✝Hae God i God blong ol laen blong Isrel,* mo hem i talem finis long Moses se, "Ol laen blong Livae* bambae oli kasem kakae blong olgeta long ol samting we bambae yufala i stap givim blong mekem wosip long mi, we haf i blong bonem, mo haf i blong olgeta." Nao from samting ya Moses i no givim graon long olgeta ya.

15 Bifo, Moses i bin givim graon long ol haf blong laen* long Ruben,* blong oli holem i blong olgeta. 16 Distrik blong olgeta i stat long taon ya Aroere long saot, klosap long Anon Reva saed i kam, wetem narafala taon ya klosap long reva ya, mo i finisim bigfala levelples ya, antap long hil raonabaot long taon ya Medebaha. 17 Long distrik ya, i gat plante taon i stap. I gat Hesbon, wetem ol narafala taon long bigfala levelples ya antap long hil, we nem blong olgeta, Dibon, mo Bamotbal, mo Betbalmeon, 18 mo Jahaj, mo Kedemot, mo Mefahat, 19 mo Kiriataem, mo Sibma, mo Jeretsaha we i stap long saed blong hil klosap long Ded* Si, 20 mo Betsesimot, mo Betpeoro we i stap long saed blong bigfala hil ya Pisga. 21 Hemia olgeta taon we i stap long bigfala levelples ya antap long hil wetem olgeta ples we King* Sihon blong ol laen blong Amoro* i rul long hem, wetem taon blong hem Hesbon. Moses i bin winim king ya finis, wetem ol haeman blong hem. Ol haeman ya oli man Midian mo oli gavman long ol distrik blong king ya. Nem blong olgeta, Evi, mo Rekem, mo Juru, mo Huru mo Reba. 22 Long ol man we Moses olgeta oli kilim, i gat wan kleva, we i save talemaot ol samting we bambae i hapen long fiuja. Man ya, nem blong hem Balam, mo papa blong hem Beo. 23 Mo mak blong distrik ya long saed i go long wes, hem i Jodan Reva. Hemia nao ol taon mo ol vilej blong distrik ya we Moses i givim long ol laen blong Ruben, blong oli holem i blong olgeta.

24 Mo Moses i givim graon tu long ol haf blong laen* blong Gad,* blong oli holem i blong olgeta. 25-27 Distrik blong olgeta i stat long Hesbon long saot, i go kasem taon ya Jasere, mo i tekem haf blong kantri ya Amon, mo i go kasem narafala Aroere ya long is, narasaed taon ya Raba i go. Nao i kam kasem Ramatmispe, i go kasem Lodebara longwe long not, mo i go kasem Lugun* long Galili,* nao i folem Jodan Reva i kamdaon bakegen, we Jodan ya i mak blong distrik blong olgeta ya long wes. Distrik ya i tekem olgeta taon long Gilead, wetem tufala taon ya Betonim mo Mahanaem, mo ol taon ya klosap long Jodan Reva, we nem blong olgeta, Betaram, mo Betnimra, mo Sukot, mo Jafon, mo ol narafala ples we King* Sihon blong Hesbon i rul long hem bifo. 28 Hemia nao ol taon mo ol vilej blong distrik ya we Moses i givim long ol laen blong Gad, blong oli holem i blong olgeta.

29 Mo long taem ya, Moses i givim graon tu long haf blong ol laen* blong Makiri* ya we i stret pikinini blong Manase* ya bifo, blong oli holem i blong olgeta. 30 Distrik blong olgeta i stat long Mahanaem, i finisim olgeta ples long bigfala ples ya Basan, wetem sikisti vilej ya long hem we Jaere i winim. Olgeta ples evriwan we King* Og blong Basan i rul long hem bifo oli stap insaed, 31 mo distrik ya i tekem nara haf blong bigfala ples ya Gilead tu, wetem tufala taon ya Astarot mo Edrei we tufala i hedkwota blong King Og. Hemia nao ol graon blong distrik ya we Moses i givim long haf blong ol laen blong Makiri we i stret pikinini blong Manase, blong oli holem i blong olgeta.

32 Hemia nao fasin we Moses i folem blong seraot ol graon ya, taem we hem i stap yet long bigfala levelples ya long Moab, long narasaed Jeriko i go, long narasaed Jodan Reva long is. 33 ✝Be hem i no givim graon long ol laen blong Livae,* from we Hae God i talem long olgeta ya se, "Mi mi Hae God, mi God blong yufala evriwan we i laen blong Isrel,* be long yufala ol laen blong Livae, mi mi olsem graon blong yufala."