1 Hae God i bin mekem ol laen* blong Isrel,* oli stap gud long ples blong olgeta long medel blong olgeta enemi blong olgeta longtaem finis, mo Josua i stap kam olfala tumas. 2 Nao hem i singaot olgeta man ya wetem ol elda,* mo ol lida, mo ol jaj, mo ol haeman blong olgeta oli kam wanples, nao hem i talem long olgeta se, "!Olgeta! Naoia mi mi olfala finis. 3 Hae God i God blong yumi, mo yufala i luk finis evri samting we hem i stap mekem long ol man we oli stap long kantri ya fastaem, from yufala. Yufala i mas save we hem i stap faet long saed blong yumi. 4 Ol graon we olgeta ya oli stap yet long hem, mi mi makemaot finis long ol laen blong yufala, blong yufala i holem i blong yufala. Mo mi makemaot tu ol graon ya we mi mi winim olgeta finis, i stat long Jodan Reva long is, i go kasem Mediterenian Si long wes. 5 Hae God bambae i mekem olgeta ya oli ronwe long fes blong yufala. Sipos yufala i go blong mekem faet long olgeta, long semtaem ya hem bambae i ronemaot olgeta oli gowe long fes blong yufala. Bambae yufala i holem graon ya we oli stap long hem i blong yufala, stret olsem we hem i bin promes* long yufala. 6 Be yufala i mas lukaot gud. Yufala i mas obei gud long Loa ya we Moses i raetem long buk* blong hem. Bambae yufala i mas holem Loa ya oltaem, we yufala i no mestem wan haf blong hem. 7 Bambae yufala i no mas go joen long ol hiten man ya we oli stap yet wetem yufala. Mo bambae yufala i no mas prea long nem blong ol god ya blong olgeta. Bambae yufala i no mas yusum ol nem ya blong mekem ol promes blong yufala i strong. Mo bambae yufala i no mas bodaon long fes blong ol god ya blong mekem wosip long olgeta. 8 Bambae tingting blong yufala i mas strong long Hae God, olsem we yufala i stap strong long hem oltaem long taem ya we i pas finis, i kam kasem tede. 9 Ol man we oli stap long ol ples ya bifo, we oli plante tumas, mo oli strong man blong faet, be oltaem, taem yufala i go blong mekem faet long olgeta, long semtaem nomo, hem i stap ronemaot olgeta i gowe long fes blong yufala. Mo evritaem, i no gat wan long olgeta we i save winim yufala. 10 ✝Sipos i gat wan taosen man we oli wantem kilim yufala, be wan man nomo long yufala bambae i save ronemaot olgeta ya, from we Hae God i stap faet long saed blong yufala, stret olsem we hem i promes finis. 11 Hae God i God blong yumi, mo oltaem yufala i mas lukaot gud, blong bambae yufala i stap lavem hem oltaem. 12,13 Mo yufala i mas save. Sipos yufala i gowe long hem bakegen, nao yufala i go joen long ol hiten man ya, no yufala i go tekem ol dota blong olgeta, no yufala i letem olgeta oli kam tekem ol dota blong yufala, hem bambae i agens long yufala. Nao sipos yufala i go mekem faet long ol hiten man ya, bambae hem i no moa save ronemaot olgeta oli gowe long ples blong yufala. Sipos yufala i go joen long olgeta ya, fasin blong olgeta we i nogud tumas bambae i kam olsem wan trap blong kasem yufala. Bambae i kam olsem wan hol we bambae yufala i foldaon long hem. Ol rabis fasin ya blong olgeta bambae oli mekem yufala i harem nogud, olsem we ol man oli stap wipim baksaed blong yufala, no oli stap stikim ae blong yufala long nil blong aranis. Sipos yufala i gowe long Hae God ya, ol samting ya bambae oli stap mekem yufala, gogo kasem we bambae i no moa gat wan long yufala i stap long gudfala kantri ya we hem i givim finis long yufala.

14 "Bambae i no longtaem, mi mi ded. Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru. 15 Be olsem we hem i mekem olgeta promes blong hem oli kamtru, long sem fasin ya nomo, bambae hem i save givim panis long yufala. 16 Hae God i God blong yumi. Sipos yufala i no holem promes* ya we hem i mekem wetem yumi, nao yufala i go bodaon long fes blong ol narafala god ya blong mekem wosip long olgeta, bambae hem i kros tumas long yufala, mo bambae hem i panisim yufala. Nao i no longtaem bambae i no moa gat wan long yufala i stap long gudfala kantri ya we hem i givim finis long yufala."