1,2 ✝Nao long taem ya we Hae Pris* ya Eleasara, wetem Josua mo ol narafala lida ya oli stap yet long taon ya Silo long Kenan,* ol lida blong ol laen* blong Livae* oli kam luk olgeta. Nao oli talem long olgeta se, "Bifo, Hae God i givim tok blong hem long Moses, se taem yumi kamtru long ples ya, bambae yufala i mas givim ol taon long mifala blong mifala i save stap long hem, wetem ol graon raonabaot long hem, blong mifala i save putum ol anamol blong mifala long hem." 3 Nao from tok ya blong Hae God, ol lida ya oli makemaot ol taon long ol distrik blong olgeta, mo ol laen blong Livae oli tekem ol taon ya wetem ol graon raonabaot long olgeta we i blong putum anamol long hem, oli holem i blong olgeta.

4 Ol laen blong Kohat ya we i wan pikinini blong Livae, olgeta ya oli kasem ol taon blong olgeta fastaem. Ol laen blong Eron we i hae pris bifo, olgeta ya oli kasem totin taon blong olgeta, we sam long olgeta oli stap long distrik ya Juda,* mo sam oli stap long distrik ya Simeon,* mo sam oli stap long distrik ya Benjamin.* 5 Mo ol narafala laen blong Kohat, oli kasem ten taon blong olgeta, we sam long olgeta oli stap long distrik ya Efrem,* mo sam oli stap long distrik ya Dan,* mo sam oli stap long distrik ya Wes Manase.*

6 Ol laen blong Geson, we i wan narafala pikinini blong Livae, olgeta ya oli kasem totin taon blong olgeta, we sam oli stap long distrik ya Isakara,* mo sam oli stap long distrik ya Asere,* mo sam oli stap long distrik ya Naftali,* mo sam oli stap long distrik ya Is Manase.

7 Ol laen blong Merari, we i wan narafala pikinini blong Livae, olgeta ya oli kasem twelef taon blong olgeta, we sam oli stap long distrik ya Ruben,* mo sam oli stap long distrik ya Gad,* mo sam oli stap long distrik ya Sebulun.*

8 Eleasara wetem Josua mo ol narafala lida ya oli makemaot ol taon ya wetem ol graon raonabaot long olgeta we i blong putum anamol long hem, blong oli givim i go long ol laen blong Livae, mo oli sakem ol spesel ston* blong faenemaot se wanem ples i go long wanem laen, stret olsem we Hae God i talem long Moses bifo.

9,10 Fastaem, oli makemaot ol taon long distrik ya Juda mo long distrik ya Simeon, oli givim i go long ol laen blong Eron. Olgeta ya oli haf blong ol laen blong Kohat. 11 Faswan long ol taon ya, i gat Kiriataba wetem ol graon raonabaot long hem we i blong putum anamol long hem. Taon ya i stap long ples blong hil long distrik ya Juda, mo nem blong hem i min se "Taon blong Aba", we Aba i papa blong Anak* ya bifo, be biaen oli putum niufala nem blong taon ya se Hebron. 12 Be ol ples blong wokem garen wetem ol vilej raonabaot long taon ya oli blong Keleb we papa blong hem Jefune.

13 Taon ya Hebron, hem i wan long ol taon ya blong haed, we sipos man i kilim narafala man i ded we i akseden nomo, bambae i save go haed long hem fastaem. Mo antap long hem, oli givim ol narafala taon long olgeta wetem ol graon raonabaot long olgeta we i blong putum anamol long hem. Nem blong ol taon ya, Libnaha, 14 mo Jatiri, mo Estemoa, 15 mo Holon, mo Debiri, 16 mo Aen, mo Jutaha, mo Betsemes. Hemia ol naen taon long distrik ya Juda mo long distrik ya Simeon, we oli givim long olgeta.

17 Mo long distrik ya Benjamin, oli givim fo taon long olgeta, wetem ol graon raonabaot long olgeta we i blong putum anamol long hem. Nem blong ol taon ya, Gibeon, mo Geba, 18 mo Anatot mo Almon. 19 Ol laen blong Eron oli pris,* mo hemia nao ol totin taon we oli kasem, wetem ol graon raonabaot long olgeta we i blong putum anamol long hem.

20 Ol narafala laen blong Kohat, oli kasem fo taon long distrik ya Efrem, wetem ol graon raonabaot long olgeta we i blong putum anamol long hem. 21 Faswan long ol taon ya, nem blong hem, Sekem, mo hem i stap long ples blong hil long distrik ya. Hem tu i wan long ol taon ya blong haed. Mo tri narafala taon ya, i gat Gesa, 22 mo Kibjaem, mo Betoron. 23 Long distrik ya Dan, oli givim fo taon long olgeta wetem ol graon raonabaot long olgeta we i blong putum anamol long hem. Nem blong ol taon ya, Elteke, mo Gibeton, 24 mo Aealon mo Gatrimon. 25 Mo long distrik ya Wes Manase, oli givim tu taon long olgeta wetem ol graon raonabaot long tufala we i blong putum anamol long hem. Nem blong tufala taon ya, Tahanak mo narafala Gatrimon.

26 Olgeta ya, oli kasem ten taon olgeta, wetem ol graon raonabaot long olgeta we i blong putum anamol long hem.

27 Long distrik ya Is Manase, ol laen blong Geson, oli kasem tu taon wetem ol graon raonabaot long tufala we i blong putum anamol long hem. Nem blong tufala taon ya, Behestera, mo Golan, we i stap long bigfala ples ya Basan, we i wan long ol taon ya blong haed. 28 Mo long distrik ya Isakara, oli kasem fo taon wetem ol graon raonabaot long olgeta we i blong putum anamol long hem. Nem blong ol taon ya, Kision, mo Daberat, 29 mo Jamut, mo Enkanim. 30 Mo long distrik ya Asere, oli kasem fo taon wetem ol graon raonabaot long olgeta we i blong putum anamol long hem. Nem blong olgeta, Misal, mo Abdon, 31 mo Helkat, mo Rehob. 32 Mo long distrik ya Naftali, oli kasem tri taon wetem ol graon raonabaot long trifala we i blong putum anamol long hem. Nem blong trifala, Hamodoro, mo Katan, mo Kedes long Galili,* we i wan long ol taon ya blong haed.

33 Ol laen ya blong Geson oli kasem totin taon olgeta, wetem ol graon raonabaot long olgeta we i blong putum anamol long hem.

34 Mo laswan, i gat ol laen blong Merari. Long distrik ya Sebulun, olgeta ya oli kasem fo taon wetem ol graon raonabaot long olgeta we i blong putum anamol long hem. Nem blong ol taon ya, Jokneam, mo Kataha, 35 mo Dimnaha, mo Nahalal. 36 Mo long distrik ya Ruben, oli kasem fo taon wetem ol graon raonabaot long olgeta we i blong putum anamol long hem. Faswan long ol taon ya, i gat Bejere long bigfala levelples antap long hil, we i wan long ol taon ya blong haed. Mo i gat Jahaj, 37 mo Kedemot, mo Mefahat. 38 Mo long distrik ya Gad, oli kasem fo taon wetem ol graon raonabaot long olgeta we i blong putum anamol long hem. Faswan long ol taon ya, i gat Ramot long Gilead, we i wan long ol taon ya blong haed. Mo i gat Mahanaem, 39 mo Hesbon, mo Jasere. 40 Olgeta ya oli kasem twelef taon olgeta.

41,42 Long olgeta graon we ol laen ya blong Isrel* oli holem, oli givimaot foti eit taon, wetem ol graon raonabaot long olgeta we i blong putum anamol long hem, blong ol laen ya blong Livae oli save go stap long hem.

43 Long fasin ya nao, Hae God i givim olgeta graon ya long ol laen* blong Isrel.* Hemia graon ya we hem i promes* long ol bubu blong olgeta bifo, se bambae i givim. Mo taem oli holem graon ya finis, oli mekem ples blong olgeta long hem. 44 Nao Hae God i mekem we olgeta oli gat pis, mo oli stap gud oltaem long olgeta ples ya we oli stap long hem, olsem we hem i promes long ol bubu blong olgeta bifo. Mo long taem ya, i no gat wan long ol enemi blong olgeta we i save winim olgeta, from we Hae God i mekem we olgeta oli winim ol enemi ya blong olgeta finis. 45 Hem i holem olgeta promes ya we i mekem long ol bubu blong olgeta bifo, se bambae i mekem i gud long olgeta. I no gat wan long olgeta i foldaon, olgeta evriwan i kamtru.