1 Nao long taem ya, Josua i tekem olgeta laen* blong Isrel,* oli kam wanples long Sekem. Nao hem i singaot olgeta elda* blong olgeta, wetem ol lida, mo ol jaj, mo ol narafala haeman blong olgeta oli kam stanap long fes blong God. 2 ✝Nao hem i talem long olgeta se, "!Olgeta! Yumi evriwan i laen blong Isrel, mo Hae God i God blong yumi. Hem i talem se, ‘Bifo olgeta, long taem ya we ol bubu blong yufala oli stap longwe, long narasaed Yufretes Reva i go, olgeta i stap mekem wosip long ol narafala god nomo. Mo wan long ol bubu blong yufala, we nem blong hem Tera, hem i gat tu pikinini boe blong hem, we nem blong tufala, Ebraham mo Naho. 3 ✝Ebraham ya, hem i stamba blong yufala evriwan. Mi mi tekemaot hem long ples ya longwe, i kamkros long Yufretes Reva, i kam pastru long kantri ya Kenan.* Mo mi mekem we ol laen blong hem oli plante we plante. Hem i bonem Aesak, 4 ✝mo biaen, Aesak i bonem Jekob* mo Esao. Ol graon we mi mi givim long Esao blong i holem i blong hem, hemia ol ples blong hil long kantri ya Edom. Be Jekob, we i bubu blong yufala, hem wetem ol pikinini blong hem, oli go stap long Ijip. 5 ✝Nao biaen, mi sanem Moses mo Eron, tufala i go long Ijip, mo mi sanem bigfala trabol i kam kasem ol man blong kantri ya. Nao mi mi lidim ol olfala ya blong yufala oli kam. 6 ✝Mo taem mi tekemaot yufala, wetem ol olfala ya blong yufala, ol man Ijip ya oli tekem ol kat blong faet we ol hos oli pulum, wetem ol soldia we oli ron long hos, oli ronem yufala. Mo taem yufala kam long Red Si, 7 ol olfala blong yufala oli krae i kam long mi blong mi givhan long yufala, nao mi putum bigfala tudak long medel blong yufala mo ol man Ijip. Mi mekem bigfala solwota ya i kam kavremap ol man Ijip ya we oli stap ronem yufala, nao oli draon. Mo yufala i luk ol samting ya we mi mi mekem long ol man Ijip long taem ya, stret long ae blong yufala.

" ‘Yufala i stap long draeples longtaem, 8 ✝nao biaen, mi mi tekem yufala i kam long graon blong ol laen blong Amoro* ya bifo, we oli stap long narasaed Jodan Reva long is. Olgeta ya oli mekem faet long yufala, be mi mi mekem we yufala i winim olgeta. Mo taem yufala i stap kam long graon blong olgeta, be mi mi stap kilim olgeta, nao yufala i holem graon blong olgeta i blong yufala. 9 ✝Nao King* Balak ya we papa blong hem Jiporo, hem i king blong ol man Moab long taem ya, mo hem i girap, i faet agens long yufala tu. Hem i sanem tok i go long Balam we papa blong hem Beo, blong hem i kam singaot* trabol i kam long yufala. 10 Be mi mi no lesin long tok blong hem, nao hem i blesem yufala bakegen, mo long fasin ya, mi mi tekemaot yufala long han blong king ya.

11 ✝" ‘Taem yufala i kamkros long Jodan Reva, yufala i kam long Jeriko, nao ol man Jeriko oli faet long yufala, mo ol narafala man blong kantri ya tu oli mekem olsem. Olgeta ya i gat ol laen blong Amoro, mo ol laen blong Perij, mo ol laen blong Kenan, mo ol laen blong Het, mo ol laen blong Gigas, mo ol laen blong Hivi,* mo ol laen blong Jebus. Olgeta ya evriwan oli faet agens long yufala. Be mi mi mekem we yufala i winim olgeta evriwan. 12 ✝Oltaem, taem yufala i stap go blong faet long olgeta, be mi mi stap mekem we oli fraet tumas long yufala, olsem we man i fraet long honet. Mi mekem olsem blong yufala i save ronemaot tufala king ya blong ol laen blong Amoro. I no naef blong faet blong yufala mo bonara blong yufala we i kilim olgeta. 13 ✝Mi mi givim kantri ya long yufala, we i gat ol kakae long hem finis, we yufala i no bin hadwok blong planem. Mo mi givim ol taon ya long yufala, we oli putumap finis, we yufala i no bin hadwok blong wokem. Naoia yufala i stap long kantri ya, mo yufala i stap kakae ol frut blong grep* we yufala i no bin hadwok blong planem. Mo yufala i stap tekem ol frut blong olif* tu we yufala i no bin hadwok blong planem.’ "

14 Nao Josua i talem se, "From ol samting ya, yufala i mas ona long Hae God long olgeta laef blong yufala, mo yufala i mas stap tru long hem, mo tingting blong yufala i mas stap strong long hem oltaem. Yufala i mas sakemaot ol narafala god ya we ol bubu blong yumi bifo oli stap mekem wosip long olgeta long Mesopotemia, mo long Ijip. Hae God i God blong yumi, mo yumi mas biaen long hem nomo. 15 Sipos yufala i no wantem biaen long hem, be naoia yufala i mas jusumaot wanem god we yufala i wantem. Sipos yufala i wantem biaen long ol god ya blong ol man Mesopotemia, we ol bubu blong yumi bifo oli stap mekem wosip long olgeta, i stap long yufala. No sipos yufala i wantem biaen long ol god blong ol laen blong Amoro we yumi stap long graon blong olgeta naoia, i stap long yufala. Be mi, wetem ol famle blong mi, bambae mifala i biaen long Hae God nomo."

16 Be ol man oli talem se, "!No gat! Hae God i God blong yumi, mo bambae mifala i no save lego hem blong go biaen long ol narafala god ya. 17 Taem ol olfala blong yumi oli stap wok slef* long Ijip, hem nao i tekemaot olgeta, i mekem yumi evriwan i fri, mo mifala i luk ol merikel ya we hem i mekem long taem ya. Hem i stap lukaot gud long yumi long olgeta ples we yumi pas long hem, mo long fes blong olgeta man we yumi pas long graon blong olgeta. 18 Mo long taem ya we yumi stap kam insaed long kantri ya, hem nao i stap ronemaot ol laen blong Amoro wetem ol narafala man we oli stap long ples ya. From samting ya nao, bambae mifala tu i mas biaen long hem. Hem nomo i God blong yumi."

19 Nao Josua i talem long olgeta se, "Be maet yufala i no naf blong biaen long hem. Hem i wan God we i tabu, we fasin blong hem i stret olgeta, mo bambae hem i no save fogivim yufala, i no save tekemaot ol sin blong yufala. Hem i no save letem we yufala i biaen long hem mo semtaem nomo, yufala i biaen long narafala god tu. 20 Sipos yufala i lego hem, nao yufala i go biaen long ol narafala god, nating we hem i mekem i gud long yufala fastaem, be bambae hem i girap, i agens long yufala, i panisim yufala."

21 Be olgeta oli talem long hem se, "!No, bambae mifala i mas biaen long hem oltaem nomo."

22 Nao Josua i talem long olgeta se, "Yufala nomo i witnes blong yufala, we yufala i talemaot se bambae yufala i biaen long Hae God nomo."

Mo oli talem se, "Yes, mifala nomo i witnes long tok blong mifala."

23 Nao hem i talem long olgeta se, "Oraet, be yumi ya, yumi ol laen blong Isrel, mo Hae God i God blong yumi. Naoia yufala i mas sakemaot ol narafala god ya we yufala i gat, mo yufala i mas mekem promes long hem, se oltaem nomo, bambae yufala i putum tingting blong yufala i stap strong long hem nomo."

24 Nao oli talem long hem se, "Yes, Hae God i God blong yumi. Oltaem bambae mifala i biaen long hem, mo bambae mifala i stap obei long ol tok blong hem nomo."

25 Nao long sem dei ya nomo, taem oli stap yet long ples ya, Josua i mekem promes wetem Hae God long nem blong olgeta, se hem bambae i God blong olgeta mo olgeta bambae oli biaen long hem oltaem. Mo hem i givim ol loa mo ol rul long olgeta blong oli stap folem, 26 mo i raetemdaon olgeta long Buk blong Loa blong God. Mo hem i tekem wan bigfala ston, nao i stanemap aninit long oktri* long graon ya long Sekem we i tabu, i blong Hae God. 27 Nao hem i talem long olgeta se, "Bigfala ston ya nao bambae i witnes blong yumi, from we hem i harem olgeta tok we Hae God i givim long yumi. Hem bambae i witnes blong blokem yufala, blong bambae yufala i no mekem wan samting we i agens long God ya blong yumi."

28 Nao hem i sanem olgeta oli gohom, mo oli gobak long ol ples blong olgeta olbaot long kantri ya blong olgeta.

29 Biaen long ol samting ya, Josua, man blong wok blong Hae God, hem i ded. Man ya, papa blong hem Nun, mo long taem ya we hem i ded, hem i gat wan handred ten yia blong hem. 30 ✝Oli berem* hem long distrik ya Efrem,* long ples blong hil, long graon blong hem long Timnatsera, long narasaed hil ya Gahas, long not. 31 Long taem we hem i stap laef, ol laen* blong Isrel* oli stap biaen long Hae God oltaem nomo. Mo biaen, long taem we hem i ded, be olgeta oli stap holem fasin ya yet, gogo kasem taem we ol lida ya we oli luk ol bigbigfala wok ya we Hae God i mekem long ol man blong hem oli ded evriwan.

32 ✝Taem ol olfala blong olgeta ya oli aot long Ijip, oli karem ol bun blong Josef, wan olfala bubu blong olgeta bifo, mo long taem ya oli berem ol bun ya blong hem long Sekem. Oli berem long wan pis graon we Jekob,* papa blong hem i bin pemaot bifo finis, long ol pikinini blong Hamoro ya bifo, we hem i papa blong Sekem. Graon ya, praes blong hem bifo, wan handred kesita* silva, mo ol laen blong Josef oli holem i blong olgeta.

33 Mo Eleasara, we papa blong hem Eron, hem tu i ded. Mo oli berem hem long Gibea, wan taon long ples blong hil long distrik ya Efrem, long graon ya we oli givim long pikinini blong hem Finehas.