Neemias 2

Nehemaea i mekemrere blong stanemap stonwol blong Jerusalem bakegen

11,12 Nao Nehemaea i gohed, i talem se, "Nao taem mi mi kamtru long Jerusalem, ol samting we bambae mi mekem long ples ya, God i putum plan blong hem i stap long tingting blong mi finis, be mi mi no talemaot long wan man. Mi stap tri dei, nao long medel naet, mi girap, mi tekem sam fren blong mi, blong mifala i goraon long taon ya blong lukluk bigfala stonwol blong hem. Mi nomo mi karem wan dongki blong wokbaot long hem, ol fren ya blong mi we oli biaen long mi oli wokbaot nomo. 13 Nao long naet ya, mifala i aot, mifala i pas long doa* blong bigfala stonwol ya we nem blong hem "Doa blong Krik", mifala i go afsaed. Mifala i stat long kona ya long wes, mifala i folem stonwol ya i go long saotis, nao mifala i pas long springwota ya we nem blong hem "Springwota blong Bigfala Algita", mo mifala i go kasem doa ya we nem blong hem "Doa blong Doti". Mo taem mifala i stap folem bigfala stonwol ya, mi stap luk ol ples we i brobrok olbaot, wetem ol doa blong hem we ol enemi oli bonem finis. 14 Nao mifala i pasraon long saed i go long is, mo mifala i stap folem stonwol ya i go long not. Mifala i go kasem doa ya we nem blong hem "Doa blong Springwota", mo wel ya we nem blong hem "Wel blong King". Nao long ples ya, rod i paspas, dongki blong mi i no moa save gotru, from we ol ston blong stonwol ya oli stap olbaot long rod. 15 Ale, mifala i godaon long krik ya Kidron, be mifala i stap folem stonwol ya i go, mo mi mi stap lukluk i go antap long hem yet. Mi mekem olsem gogo, mifala i kasem en blong hem. Nao mifala i tanemraon, mifala i folem rod blong mifala bakegen, mifala i kambak long Doa blong Krik, nao mifala i kam insaed long taon bakegen.

16 "Be ol haeman long Jerusalem oli no save samting ya we mi mekem, mo ples ya we mi go long hem. Kam kasem taem ya, mi mi no bin talemaot wan tok blong mi nating long ol man ples blong mi. I nomata we pris*, no lida, no haeman, no narafala man we bambae i save givhan long ol wok, be mi mi no go stori wetem olgeta.