Neemias 4

Sam man oli traem blong blokem wok blong Nehemaea

1 Nao Nehemaea i talem se, "Taem we Sanbalat i harem we mifala i stap wokemgud bigfala stonwol ya bakegen, hem i kros we i kros, nao i stap tok nogud long mifala, i stap laf long mifala. 2 Long fes blong ol fren blong hem wetem ol soldia blong Sameria* hem i talem se, ‘?Ol laen* blong Isrel* ya oli wantem mekem wanem ya? ?Oli wantem stanemap taon ya bakegen? !Oli no naf blong mekem wan samting! Ating oli ting se sipos oli mekem sakrefaes, bambae oli save finisim ol wok ya long wan dei nomo. Ol ston ya blong fastaem, taem ol enemi blong olgeta oli spolem taon ya bifo, faea i spolem olgeta finis. !Olgeta oli krangke ya! !Oli no save yusum ol ston ya bakegen!’

3 "Mo Tobia we i man Amon, hem i stap stanap wetem hem i talem se, ‘Stonwol ya we oli stap wokem i no strong nating. !Smol dog nomo i naf blong brekemdaon!’

4 "Nao mi mi prea, mi talem se, ‘God blong mifala. Plis yu harem prea blong mi. Olgeta ya oli stap laf nogud long mifala, oli stap jikim mifala. Plis yu mekem ol tok ya we oli stap sakem i kam long mifala i kasem olgeta bakegen. Plis yu letem we ol narafala man oli kam stilim olting blong olgeta, mo oli tekemaot olgeta oli go wok slef* long wan narafala kantri. 5 Mifala i stap wokem stonwol ya blong i gud bakegen, be olgeta ya oli stap tok nogud tumas long mifala mo oli stap spolemgud mifala. Plis yu no fogivim olgeta from ol fasin nogud ya we oli stap mekem. Plis yu no fogetem ol sin blong olgeta.’

6 "Nao mifala i stap gohed blong wokem bigfala stonwol ya bakegen. Mo i no longtaem, hae blong stonwol ya i go antap, i kasem stret haf blong mak blong hem, from we ol man oli glad tumas blong wok.