1 Umukunzi wawe yagiye hehe,

yewe mugore urusha abandi bagore ubwiza?

Umukunzi wawe yajanye iyihe nzira,

kugira ngo tugufashe kumurondera?

2 Umukunzi wanje yamanutse mu murima wiwe,

ahari ibimota neza vyiwe,

kuragira mu mirima,

no kwamura amashurwe.

3 Ndi uw’umukunzi wanje n’umukunzi wanje ni uwanje;

aragira mu mashurwe.

4 Uri mwiza, mukunzi wanje, nk’igisagara c’i Tiriza,

uri uw’igikundiro nk’i Yerusalemu,

uteye ubwoba nk’ingabo zifise amabendera.

5 Hindukira ureke kundaba;

kuko amaso yawe andengeye.

Umushatsi wawe ni nk’umukuku w’impene

umanuka uva i Gileyadi.

6 Amenyo yawe yera nk’umukuku w’intama

zamowe ubwoya, ziduga zivuye kwoga.

Imwe yose yonsa amahasa,

nta n’imwe iri yonyene.

7 Amatama yawe ari mu mwitwikiro wawe

ameze nk’ibice vy’ikomamanga.

8 Abamikazi naho boba mirongo itandatu,

n’incoreke zikaba mirongo umunani,

n’inkumi zirenze igitigiri;

9 ariko inanuma wanje, uwutagira agatosi, arisa,

ni umukobwa umwe kuri nyina,

ni umukundwa cane ku wamuvyaye.

Abaguranokazi baramubonye bamwita umuhirwe;

abamikazi n’incoreke baramuhimbaza.

10 Urya ni nde aserutse nk’umutwenzi,

mwiza nk’ukwezi, akayagana nk’izuba,

akayangana nk’inyenyeri?

11 Namanutse nja mu biti vy’imirinzi

ngo ndabe imivyaro yo mu kiyaya,

ngo ndabe ko uruzabibu rwatotahaye,

n’amakomamanga ko yashuritse.

12 Ariko ntarabimenya,

ivyipfuzo vyanje vyantwaye ku mikogote y’umwami w’abantu banje.

13 Garuka, garuka, wa Munyashulamukazi we;

garuka, garuka, kugira ngo tukwihweze!

Ni igiki cotuma mwihweza Umunyashulamukazi

nko mu gihe co gutamba c’i Mahanayimu?