1 Ese ingene ibirenge vyawe ari vyiza mu birato vyavyo,

yewe mukobwa w’umwami!

Amaguru yawe meza ameze nk’ubudede,

igikorwa cahinguwe n’amaboko y’umuhinga.

2 Urukenyerero rwawe rumeze nk’igikombe

kitigera kiburamwo umuvinyu umota neza.

Inda yawe ni ikirundo c’ingano

gikikujwe n’amashurwe.

3 Amabere yawe yompi ameze nk’inyana zibiri,

nk’amahasa y’ingeregere.

4 Izosi ryawe ni nk’umunara wubakishijwe amahembe y’inzovu.

Amaso yawe ni amariba y’i Heshiboni

ari i ruhande rw’i Bati Rabimu.

Izuru ryawe ni nk’umunara w’i Libani

werekeye i Damasiko.

5 Umutwe wawe ukubereye urugori nk’umusozi Karumeli.

Umushatsi wawe ni nk’umusezero w’i bwami;

umwami yafashwe mu bitsibo vyawo.

6 Ese ingene uri mwiza kandi uhimbaye,

yewe rukundo rwanje, munezero wanje!

7 Igihagararo cawe ni nk’ikigazi,

kandi amabere yawe ni nk’amahando y’ivyamwa vyaco.

8 Ndavuga nti: "Ndurira ico kigazi;

nakire ku vyamwa vyaco."

Amabere yawe arakaba nk’ibisoko vy’inzabibu,

ukumota kw’akanwa kawe ni nk’icamwa citwa pome,

9 kandi mu kanwa kawe ni nk’umuvinyu uruta iyindi.

Uwo muvinyu icompa ukagenda utumbereye umukunzi wanje,

ukagenda utemba neza ku minwa no ku menyo.

10 Jewe ndi uw’umukunzi wanje,

kandi ni jewe yipfuza.

11 Nuze, mukunzi wanje, tugende mu mirima,

tumare ijoro mu bigwati.

12 Tuzozinduka tuja mu mirima y’inzabibu

turabe ko imizabibu yameze,

turabe ko imimera yayo yasambuye,

kandi ko amakomamanga ashuritse,

aho ni ho nzoguhera urukundo rwanje.

13 Amapome aratamirana,

kandi i ruhande y’urugi rwacu hari ivyamwa vyose,

bishasha n’ivya kera,

ivyo nakubikiye, mukunzi wanje.