1 Iri ni isengesho ry’umuvugishwa Habakuki, riririmbwa mw’ijwi rya Shigiyonoti.

2 Uhoraho, numwise ukwamamara kwawe,

mpagarara ntewe ubwoba n’ibikorwa vyawe bitangaje, yewe Uhoraho.

Subira ubikore muri kino gihe cacu,

bimenyekanishe mu gihe co kubaho kwacu;

ariko mu burake bwawe, wibuke kugira imbabazi.

3 Imana yazananye i Temani,

Uwera yaturutse ku musozi Parani. Sela.

Ubwiza bwayo bwari butwikiriye amajuru,

kandi amashimwe yayo yuzuye isi.

4 Ubwiza bwayo bwari bumeze nk’izuba rirashe;

imishwarara yava mu kiganza cayo,

ahari hanyegejwe ububasha bwayo.

5 Agatikizo kagendera imbere yayo;

akaranda kagakurikira ibirenge vyiwe.

6 Maze irahagarara, inyiganyiza isi;

iritegereza, ijugumiza amahanga.

Imisozi yahozeho irasaduka,

n’imitumba ya kera cane irasenyuka.

Inzira zayo ni iz’ibihe bidashira.

7 Nabonye amahema y’ab’i Kushani yuzuye umubabaro,

n’Abamidiyani aho baba hihebuye.

8 Yewe Uhoraho, mbega wari urakiye inzuzi?

Uburake bwawe bwari ku masoko?

Mbega wari uhagurukiye ibiyaga

aho waza kw’ifarasi

no mu mikogote y’intsinzi?

9 Wasokoroye umuheto,

wegeranya imyampi myinshi. Sela.

Watandukanije isi ukoresheje inzuzi,

10 imisozi yarakubonye irashonga.

Amasumo y’amazi arahita,

i bwina mu kiyaga hakumvikana urwamo,

kigaterera imipfunda yaco hejuru.

11 Izuba n’ukwezi birahagarara kw’ijuru

kubera imyampi irashwe,

n’ukurabagiza kw’icumu ryawe ritewe.

12 Wagendagenze mu gihugu ufise umujinya,

uhonyangisha amahanga ugukara kwawe.

13 Wazanywe no gucungura ubwoko bwawe,

no gukiza uwo wasize amavuta.

Wafyonyoye umutware w’igihugu cuzuye ikibi,

uramuvunagura kuva ku mutwe gushika ku birenge. Sela.

14 Watobekeranishije umutwe wiwe icumu ryiwe,

igihe ingabo ziwe zari zije kudushwiragiza,

babikorana umunezero mwinshi ngo bahonye

umworo aho yari yinyegeje.

15 Wahonyangishije ikiyaga ifarasi zawe,

hamwe n’imikuba y’amazi menshi.

16 Naravyumvise nsimbwa n’umutima,

iminwa yanje ijugumizwa n’iryo jwi;

ukubora kwinjira mu magufa yanje,

amaguru yanje arajugumira.

Ariko nzorindira nihanganye umusi w’amakuba,

aho uzozira kw’ihanga ryaduteye.

17 Naho umusukoni wanje utoshurika,

inzabibu zanje ntizame,

naho umwimbu wa elayo worumba

imirima ntigire ico yera,

naho intama zohera mu rugo,

umukuku ugahera mu ruhongore,

18 nzonezererwa Uhoraho,

nzohimbarirwa Imana y’agakiza kanje.

19 Uhoraho Nyeninganji ni we nkomezi zanje;

akomeza ibirenge vyanje nk’ivy’ingeregere,

anshoboza kugendera ku dutwe tw’imisozi.

Ku mukuru w’abaririmvyi: Iri sengesho rizoririmbwe hakoreshejwe ibicurarangisho vy’imirya.