1 Ke Aikonium Pọọl ye Banabas emaesaña keed ekaiya sinakọk mme Yuu naña ekesinam. Do ammọ emaekwọrọ ikọ ke usʌñ a-akenamma uwak mme Yuu ye mme Greek enịm Abasi ke akpanikọ. 2 Ado mme Yuu i-imiikimaaha inịm ke akpanikọ emaetañ ikọ etịmede mme Gentile mfen enyʌñ ebiat ammọ esịd ebaña mme ikọd Abasi ami. 3 Ke ntak ado, Pọọl ye Banabas emaekpeene do enyʌñ ekwọrọ Abọọñ uko-uko, ndin Abọọñ ñko amaasọọñọ etob mfọn amọ ke adinọ mme abọsịd adudu adinam mme utịppeñkpọ ye utom idiọọñọ. 4 Ubakka amaaba ke ufọọd mbon Aikonium; usʌk eda ye mme Yuu, usʌk enyʌñ eda ye mme abọsịd. 5 Ndin mme Gentile ye mme Yuu emaedioomo ye mme adaukara ammọ keedekeed aditʌhọde mme abọsịd ñnyʌñ ntọọñ ammọ ke itiad. 6 Ado sia Pọọl ye Banabas emaekediọọñọ ebaña edioomo ami, ammọ emaefeeñe ekaa Listra ye Deebi ke mme abio Laikonia ye mme ñkanñkʌk idʌñ. 7 Do ammọ emaeka iso ekwọrọ eti etob abio ubọọñ Abasi.

8 Ke Listra amaaba awo a-akedọñọke mbʌñọ tọọñọ ke emana, a-adooho akenanam isañake. 9 Anye amaakpañ utọñ akop naña Pọọl atañ ikọ. Pọọl amaawuuk anyen ase anye, anyʌñ akịt ke anye amaanie mbuọdidem se ekọk anye udọñọ, 10 ndin Pọọl amaabọñ ke akpọsọñ uyio abo, "Dakka da ke ukod mfo!" Ke ami, awo ado amaatamma ke anyọñ anyʌñ atọọñọ adisaña.

11 Ke ini atu awo emaekekịt se Pọọl akenam, ammọ emaebọñ ñkpo ke usem Laikonia ete, "Mme abasi esọiyọ edi ke mbid awo!" 12 Ammọ emaekoot Banabas Seus, Pọọl ammọ ekoot Hemes, sia anye akedo akwa atañ ikọ. 13 Aku Seus, a-tembịd amọ akesannake etək-etək akpọñ abio amaakoono ñyaara enañ ye ñkpataatad adi inuaatob, sia anye ye atu awo ekeyem adinam uwa nnọọ Pọọl ye Banabas.

14 Ado ke ini abọsịd Banabas ye Pọọl ekekoppo ñkpọ ami, ammọ emaewai afọñidem ammọ enyʌñ efeeñe edọñọ atu awo, ebọñ ñkpo, ete: 15 "Mme ufan ñnyịn, nsinam ndufo enam ñkpọ ami? Ñnyịn ke idem ñnyịn idoñño mme awo nte ndufo. Ñnyịn idat eti etob isọk ndufo, ite yak ekappa ekpọñ mme ikpu-ikpu ñkpọ i-imiiwuọñọke ñkpọ ndomokeed ebịne ndu-ndu Abasi, a-akenamma anyọñ ye isọñ ye mme akpainyañ ye afịd ñkpọ se iyọhọ ke esịd. 16 Ke esed, anye amaayaak afịd mme idịd enañña se ema. 17 Ado anye itreke adinọ idem amọ ikọ ntiense: Anye awọt mfọnido ke adinọ ndufo edịm ato ke hefịn ye mme mfịd inwañ ke ini ammọ. Anye inọ ndufo uwak ndidia, anyʌñ ayọhọ esịd ndufo ye idaara." 18 Kpa ye mme ikọ ami, akesʌk asọsọñ aditre atu awo adinam uwa nnọọ ammọ.

19 Ndin usʌk mme Yuu emaeto Antiọk ye Aikonium ediwọññọ mbio awo esịd. Ammọ emaetọọñ Pọọl ke itiad enyʌñ edʌt anye eben esio ke abio, ekere ke anye akpa. 20 Ado ke mme mbed ikọd Abasi emaekedikanna anye ekʌk, anye amaadakka ada anyʌñ amaana adʌk abio. Ayio akesiere, anye ye Banabas emaedaaña ekaa Deebi.

21 Ammọ emaekwọrọ eti mbʌk ke abio ado enyʌñ enam uwak atu awo ekappa edo mme mbed Abasi. Ndin ammọ emaetịmme ekaa Listra, Aikonium ye Antiọk, 22 ekesọọñọ mme mbed idem, enyʌñ edọñ ammọ esịd ete esọñ eda ke akpanikọ ye ke mbuọdidem. Ammọ emaebo mme mbed ete, "Ana ñnyịn iboiyo ke uwak ndutʌhọ idʌk abioubọọñ Abasi." 23 Pọọl ye Banabas emaemek mme adaiwuod enọ ufọkabasi keedekeed, ndin ke akam ye utreudia emaeben ammọ enọ Abọọñ a-ammọ ekebuọttọ idem. 24 Ke emaekesaña iboiyo Pisidia, ammọ emaekewuọ Pamfilia, 25 ndin ammọ emaekekwọrọ ikọ ke Peka, enyʌñ esuuho ekesịm Atalia.

26 Tọọñọ ke Atalia ammọ emaemaana ewat ke nsʌñikañ ekewuọ Antiọk, itie e-ekeyaaha ammọ esịn ke mfọn Abasi ke utom a-ammọ ekenamma ema. 27 Ke emaekewuọ do, ammọ emaekoot afịd ufọkabasi ebon itie keed, enyʌñ etañ afịd mme ñkpọ se Abasi akedat ammọ anam, ye naña Abasi akekʌkkọ usʌñ mbuọdidem anọ mme Gentile. 28 Ammọ emaeba do ye mme mbed ekpeene.