1 Pọọl amaadisịm Deebi ndin ato do akaa Listra, itie a-mbed keed a-akekereke Timoti akedʌññọ, e-eka amọ akedooho Yuu anyʌñ anịm Yisọs ke akpanikọ, ado ete amọ akedo Greek. 2 Mme nditọete e-ekenịmme ke akpanikọ ke Listra ye Aikonium emaetañ nti ñkpọ ebaña Timoti. 3 Pọọl amaayem anye asaña ye imọ aka isañ, ke ntoro anye amaafọọrọ anye edʌd sia mme Yuu e-ekedʌññọ ke ukañ udo, emaediọọñọ ete amọ nte ado Greek. 4 Nte ammọ ekesañake ke abio ke abio, ammọ emaetañ se mme abọsịd ye mme adaiwuod ufọkabasi ke esob Yeruselem ekebiide enọ mme awo ete enam. 5 Ntoro ke mme ufọkabasi ekekọt ke mbuọdidem, ndin mme ufa awo emaenyʌñ edʌk edi ke usen ke usen.

6 Pọọl ye nsaña amọ emaesaña ke afịd ñkanñkʌk Frikia ye Kalesia, kpa naña Adisana Sịbidịd aketemme ammọ abo ekekwọrọ ikọ ke idak ukara Esia. 7 Ke ammọ emaekediwuọ adaña abio Misia, ammọ emaedomo adidʌk Bitinia ado Sịbidịd Yisọs ikiyakka. 8 Ke ntoro, ammọ emaeboiyo ekpọñ Misia, ekaa Troas. 9 Ke akonayio Pọọl amaakịt ñkukịd naña awo aketo Masidonia ada akpeiye anye ate, "Kanna di Masidonia di inwam ñnyịn." 10 Ke Pọọl amaakekịt ñkukịd ami, ñnyịn imaibeeñe idem ini keed adisio uwad ñkaa Masidonia, inịm ke akpanikọ ke Abasi ikoot abo ikikwọrọ eti etob inọ ammọ.

11 Ñnyịn imaidʌk nsʌñikañ tọọñọ ke Troas iwat nnen-nnen ikiwuọ Samotras, ndin ke ayio amaakesiere, imaikiwuọ Niapolis. 12 Tọọñọ do ñnyịn imaisaña ika Filipai, awuọiso abio ke Masidonia a-Rom akekarake. Ñnyịn imaiba do ke uwak usen.

13 Ke usen Sabad, ñnyịn imaikpọñ abio ika mben inyañ, itie a-ñnyịn ikikereke ke iyaikịt itie ubọñ akam. Ñnyịn imaisuuk itie do, itọọñọ aditañ ikọ ye ibaan e-ekebonoke do. 14 Keed ke atu mbon e-ekekpañña utọñ inọọ akedo awonwaan keed a-akekereke Lidia, anyam iduod-iduod afọñ ubọọñ a-atooho abio Tiatira. Anye akedo awo a-akekponoke Abasi. Abọọñ amaatuuk anye esịd anam anye akop etob Pọọl. 15 Ke emaekeduọk anye ye mbon ufọk amọ mmọọñ, anye amaikoot ñnyịn ufọk ate, "Adieke ndufo endatta miin nte andinịm Abọọñ ke akpanikọ idi idiba ke ufọk mmi." Anye amaikpek ñnyịn nọ ikeene anye.

16 Usen keed, idaha a-ñnyịn ikisʌkkọ ikaa itie ubọñ akam, ñnyịn imaisoobo afʌn abọikpa keed a-akenieghe sịbidịd a-anye akekamake akịt ñkukịd abaña ini iso. Anye amaadat ado akọ uwak akʌk anọ mbon se ikinie anye ke aditañ se idiitịppe ke ini iso. 17 Abọikpa ami amaikeene ñnyịn ye Pọọl ke edem, abọọñ ñkpo abo, "Mbon ami edo mme isʌñutom Abasi Andikoñ Ñkan, e-etañña ñkpọ ebaña usʌñ adinyaaña inọọ ndufo." 18 Anye amaakaa iso anam ntom ke mme uwak usen. Ke akpatre, ñkpọ ami amaayat Pọọl tutu anye amaakanna atuak ada anyʌñ aduat sịbidịd ado ate, "Ke anyịñ Yisọs Krais mmuwuuk fiin mbo awuọ anye ke idem!" Kpa idaha-idaha ado sịbidịd ado amaakpọñ anye.

19 Mme andinie afʌn abọikpa ami emaekekịt ke usʌñ unwana akʌk ammọ atre, ammọ emaemʌm Pọọl ye Sailas edʌt ammọ ekesịm anwa udua ke iso mme adaaha abio. 20 Ndin emaedat ammọ ekaa iso mme ayaraiwad, ete, "Ibon ami edoñño mme Yuu, ndin ammọ e-esịn ntịme ke abio, 21 ke adikpeep eduuwem i-imiidooho se mbed ñnyịn nte mbon Rom inyịmme me inam."

22 Mme atu awo e-ekedaaha emaekeene eyem Pọọl ye Sailas ikọ, ndin mme ayaraiwad emaenọ uyio ete esịññe ammọ afọñ enyʌñ emia ammọ ke ukwak. 23 Ke emaekenekke emia ammọ ema, emaetop ammọ edọñ ke ñkpakọb, enyʌñ ebo andikpeme mbon ñkpakọb anekke akpeme ammọ. 24 Ke ini anye amaakebọ mme ewʌhọ ami, andikpeme mbon ñkpakọb amaadọn ammọ ke ataa esịd ufọk ñkpakọb anyʌñ abọp ukod ammọ adian ke ikpọ ndoppo eto.

25 Ke ñkpọ nte ufọọd akonayio Pọọl ye Sailas ekesʌk ebọñ akam enyʌñ ekwọ ikwọ enọ Abasi, ndin mme mbio ñkpakọb mfen ekesʌk ekpañ utọñ enọ ammọ. 26 Ke unana idodanyen unyeñisọñ amaatịppe, anyeeñe afịd itiad idakisọñ ufọk ñkpakọb. Afịd mme usʌñ ufọk ñkpakọb amaakuuñọ ini keed, ñkpọnọ afịd mbio ñkpakọb enyʌñ ekpọhọ. 27 Andikpeme mbon ñkpakọb amaademme, ndin ke anye amaakekịt usʌñ ufọk ñkpakọb nte ana inwañ, anye amaasio eduad ayem adiwot idem amọ, sia anye akekere ke mbio ñkpakọb efeeñe. 28 Ado Pọọl amaasio ñkpo abo anye ate, "Kuunọọ idem mfo unọmọ! Afịd ñnyịn mmọ mi!"

29 Akpeme ñkpakọb amaabo eben utuenikañ edi, ndin anye amaasọsọp afeghe ke ñnyeñidem adʌk akeduọ ke iso Pọọl ye Sailas. 30 Ndin anye amaasịññe ammọ adi anyʌñ abịp abo, "Mme ete, nsoo ke nnie adinam nọ nnie adinyaaña?"

31 Ammọ emaebọọrọ ete, "Nịm Abọọñ Yisọs ke akpanikọ, ndin eyaunyaaña fiin, afo ye afịd ufọk mfo." 32 Pọọl ye Sailas emaekwọrọ ikọ Abasi enọ anye ye afịd mbio mfen e-ekebaaha ke ufọk amọ. 33 Kpa akonayio ado akpeme ñkpakọb amaayet unan ammọ; ndin idaha-idaha ado anye ye afịd ufọk amọ emaebọ uduọkmmọọñ. 34 Ndin akpeme ñkpakọb amaaben ammọ akaa ufọk amọ anyʌñ akenọ ammọ ndidia. Anye amaayọhọ ye idadesịd, sia anye ye afịd ufọk amọ emaenịm Abasi ke akpanikọ.

35 Ke ayio amaakesiere, mme ayaraiwad emaedọñ ñkpoon mbon utom ammọ utom enọ akpeme ñkpakọb, ete: "Saana ibon ado yaak." 36 Ndin akpeme ñkpakọb amaadọkkọ Pọọl ate, "Mme ayaraiwad e-enọ uyio ebo usaana fiin ye Sailas eyaak. Ke ntoro ndufo emekeme adinyọñ. Inyọñọ ke emem."

37 Ado Pọọl amaabo mme ekamba mbon utom ate: "Ammọ emaimia ñnyịn anwa-anwa, ikpeeghe ikpe, akpesʌkado ñnyịn idooho amanaisọñ nditọ Rom, enyʌñ itop ñnyịn edọñ ke ñkpakọb. Idahami ammọ eyem adibịn ñnyịn nsio ke ndịbe? Iyoo! Yak ammọ edi ke idem ammọ ediben ñnyịn ewuọ."

38 Mme ekamba mbio utom emaetañ ntom enọ mme ayaraiwad, ndin ke ammọ emaekekop ke Pọọl ye Sailas edoñño mme amanaisọñ mbon Rom, idem amaanyeñ ammọ. 39 Ndin ammọ emaekpeiye Pọọl ye Sailas enyʌñ eben ammọ esaña ewuọ ke ñkpakọb, ekpeiye ammọ ete ekpọñ abio. 40 Ke Pọọl ye Sailas emaekewuọñọ ke ñkpakọb, ammọ emaekaa ufọk Lidia. Do ke ammọ ekesoobo ye mme ikọd Abasi ideen ye ibaan enyʌñ ekwọrọ ikọ nsọọñọidem enọ ammọ. Akema ammọ emaekpọñ do.