1 Ndin ke ini Pita ye Yọọn ekesʌkkọ etañ ikọ enọ mme awo, mme aku ye adaiso mme akpeme tembịd, ye mme Sadusi, emaesaña ebịne ammọ. 2 Ukpeebñkpọ se ibaña adised ke ñkpa ke anyịñ Yisọs a-mme abọsịd ekekwọrọke amaafịna mme aku ye mme Sadusi eti-eti. 3 Ndin sia akedooho ndubiayio ammọ emaemʌm Pita ye Yọọn esịn ke ufọk ñkpakọb tutu asịm edem usen. 4 Ado uwak mbon e-ekekoppo etob ado emaenịm ke akpanikọ, ndin ado amaanam ibad awo e-ekenịmme ke akpanikọ amaasịm ñkpọ nte tọsịn ition.

5 Edem usen, mme adaukara, mme ñkpisọñ, ye mme akpeeb mbed emaesoobo ke Yeruselem. 6 Anas, ekamba aku, ye Kaifas, Yọọn, Aleksanda, ye afịd mbon se ikito ufọk akwa aku emaeba do ñko. 7 Ammọ emaeben Pita ye Yọọn edi ke iso ammọ enyʌñ etọọñọ adibịp ammọ mbuume: "Ke nsutọ adudu, ye ke anyịñ anie ke ndufo ekenam afịd ami?"

8 Ndin Pita, amaakeyọhọ ye Adisana Sịbidịd, amaabo ammọ ate: "Mme andikara abio ye mme ñkpisọñ ke Isrel! 9 Adieke ndufo ibịppe ñnyịn mfịn ami ebaña mfọn a-ñnyịn ikifọnnọ ye awo mbʌñọ ye naña anye akesaña abọ nsọñidem, 10 afịd ndufo, ye afịd ubon Isrel, idiọọñọ ami: Ato anyịñ Yisọs Krais awo Nasared, a-ndufo ekekọññọ ke krọs, a-Abasi akenamma anye aset ke ñkpa, ke awo a-adaaha mi ke iso ndufo anie nsọñidem. 11 Yisọs ado

" ‘itiad a-ndufo mme abọbufọk ekesịnne,

ndin anye adikappa ado itiad inuuk.’

12 Adinyaaña ibaaha ke awo mfen ndomokeed, sia anyịñ ndomokeed mfen ibaaha ke idak hefịn e-enọọhọ ubonawo, a-ñnyịn inaaha ibọ adinyaaña ito."

13 Ke ini ammọ ekekịtte uko Pita ye Yọọn, enyʌñ ediọọñọ ke ammọ ikikaaha ñwed, ado ke ammọ ekedo mme ñkaña awo, idem amaakpa ammọ eti-eti. Ammọ emaenyʌñ ediọọñọ ke Pita ye Yọọn ekeba ye Yisọs. 14 Ndin sia ammọ emaekekịt awo a-akebọọhọ nsọñidem nte ada ye ammọ, uyio ikibaaha ammọ aba ke itọñ. 15 Ke ammọ emaekenọ uyio ete Pita ye Yọọn ekpọñ atu mbono esob Sanhidrin ekeba ke anwa, ammọ emaenie nneme ke atu idem ammọ. 16 Ndin ammọ emaebịp idem ammọ ete, "Nsoo ke ñnyịn ikpinam ye ibon ami? Afịd awo se idʌñ ke Yeruselem e-ediọọñọ ke ammọ e-enam ekamba utom idiọọñọ, ndin ñnyịn idiikanna ifaaña. 17 Ado mbaak ñkpọ ami adika iso asuana asịm afịd awo idem, ana ñnyịn ikpan ammọ ite ammọ ekuumaana etañ ikọ aba enọọ awo ndomokeed ke anyịñ ami."

18 Ke emaekema, ammọ emaemaana ekoot Pita ye Yọọn ebo edʌk edi esob, enyʌñ ewuuk ammọ ete keetañ ikọ, keenyʌñ ekpeep ñkpọ ndomokeed ke anyịñ Yisọs. 19 Ado Pita ye Yọọn emaebọọrọ ammọ ete, "Itʌm ibiide ke idem ndufo ise me afọn ke iso Abasi adikop uyio ndufo ñkan uyio Abasi. 20 Sia ñnyịn idiikanna itre aditañ mbaña se ñnyịn ikikịt inyʌñ ikop."

21 Ke emaekemaana edịkke ammọ uwem, emaesaana ammọ eyaak. Esob Ikpaisọñ mme Yuu ikikanna ibiide se ufen ekpenọọ ammọ, sia adooho afịd awo ekesʌk etooro Abasi ke se ikitịppe. 22 Sia awo a-akebọọhọ utịppe idiọọñọ ukọk udọñọ ami amaabọhọ isua aba ke emana.

23 Ke emaekesaana ammọ eyaak, Pita ye Yọọn emaenyọñ ebịne mbon ammọ enyʌñ ekedọkkọ ammọ afịd se mme ikpọ aku ye mme ñkpisọñ ekebo ammọ. 24 Ke ini ammọ ekekoppo ado, afịd ammọ emaebenne uyio ini keed ebọñ akam enọ Abasi, ete: "Abọọñ Andikara, afo akebot anyọñ ye isọñ ye akpainyañ ye afịd ñkpọ se iyọhọ ke esịd. 25 Ato ke Adisana Sịbidịd afo amaatañ ikọ ke inua isʌñutom mfo, ete ñnyịn Defid, abo ate:

" ‘Nsoo inam mme idịd eduọ abom,

mme awo enyʌñ eduak ikpu-ikpu uduak?

26 Mme ndidem isọñ edaaña eda,

ndin mme andikara eboho ammọ-ammọ

enyʌñ enwana ye Abọọñ,

ye anye e-emaekeyet adan* enịm.’

27 Ado akpanikọ ke Herọd ye Pọntiọs Pailed emaesoobo atọ keed ye mme Gentile ye mbon Isrel ke abio ami nọ ediana keed enwana ye adisana ayịnutom mfo Yisọs, a-afo akeyette adan anịm. 28 Ammọ ekenam se adudu ye uduak mfo emaekebebiere enịm ebo atịppe. 29 Ndin idahami, Abọọñ, se baña udịkke ammọ idịkkeke ñnyịn nyʌñ nọ mme isʌñutom mfo adudu aditañ ikọ mfo ye ayọhọ uko. 30 Sio ubọk mfo nyan ke adikọk udọñọ, ye ke adinam mme ikpọ utom idiọọñọ ye mme utịppeñkpọ ñkpaidem ke anyịñ adisana isʌñutom mfo, Yisọs."

31 Ke ammọ emaekebọñ akam ema, itie a-ammọ eketieghe amaanyeeñe, ndin afịd ammọ emaeyọhọ ye Adisana Sịbidịd, enyʌñ ekwọrọ ikọ Abasi uko-uko.

32 Afịd mme andinịm ke akpanikọ ekenie esịd keed ye akikere keed. Ndomo awo keed ikibooho ke se imọ inie akedo akpọ-akpọ inie imọ, ado afịd awo ekewaawana afịd ñkpọ se ekenie. 33 Ke ayọhọ adudu, mme abọsịd emaekaa iso ke aditie ntiense mbaña adised Abọọñ Yisọs ke ñkpa. Ndin mfọn Abasi amaakem ammọ udeeme, 34 anam mbon unana ndomokeed ikibaaha ke atu ammọ. Sia ke ini ke ini, mbon se ikinieñe isọñ ye mme ufọk emaenyaam, ekoono akʌk se ikido ekọmudua 35 edinọ mme abọsịd, ndin emaesideeme enọ awo keedekeed akeene mfịna se awo akenie.

36 Yosef, awo Lifai a-aketooho Saiprọs, a-mme abọsịd ekekootto Banabas (a-awuọñọke "ayịn idọñesịd"), 37 amaanyam isọñ a-anye akenieghe anyʌñ aben akʌk ado akenịm ke ukod mme abọsịd.