1 Ndin awo keed ekekoodo Ananayas ye anwaan amọ Safira, emaenyam isọñ ammọ ñko. 2 Ado Ananayas, ke ayọhọ unyịmme anwaan amọ, amaabakka ubaak akʌk isọñ ado anịm anọ idem amọ, ndin aben ubaak akenọ mme abọsịd.

3 Do ke Pita akebo anye, "Ananayas, asaña die ayak Setan anekke udʌk esịd tutu afo asʌhọ nsu anọ Adisana Sịbidịd, anyʌñ amʌm ubaak akʌk akenyamma isọñ anịm anọ idem mfo? 4 Nte isọñ ado ikidooho ake mfo naña awo imiikinyamma anye? Ndin ke emaekenyam anye, nte ukusʌkkọ unie unen adidat akʌk se ekenyam nnam naña afo ama? Nsoo ñkpọ ikinam nọ afo akere adinam utọ ñkpọ a-abaaha ntom? Afo usʌhọke nsu unọ awo kpọd, ado asʌhọ anọ Abasi."

5 Ke Ananayas amaakekop mme ñkpọ ami, anye amaaduọ ke isọñ akpa. Ndin ekamba ndịk amaanam afịd mbon se ikikop ñkpọ ami. 6 Ndin mme ñkparawa emaedi ediben akpo amọ ewañ ke afọñ, eben ewuọ ekebuuk.

7 Ke ñkpọ nte awa ita amaakeboiyo, anwaan amọ amaadʌk adi, ado anye ikidiọọñọke se ikitịppe. 8 Ndin Pita amaabịp anye ate, "Tañ nnọ ise, udua a-ndufo ekenyamma isọñ ndufo ado ami?"

Safira amaabo, "Ii, ekọmudua isọñ ado adodo."

9 Pita amaabo anye, "Nsinam nọ ndufo eda uyio keed edomo Sịbidịd Abọọñ idomo? Kpañ utọñ! Mbon se ikibuuk ebe mfo mmọdo eda ke inuausʌñ, ndin ammọ ñko eyauben fiin ewuọ."

10 Kpa ke ukem ini ado anye amaaduọ anaa ke ukod Pita anyʌñ akpa. Ndin mme ñkparawa emaedʌk edi, edikịt ke anye akpa, enyʌñ eben anye ewuọ ekebuuk ediana ebe amọ. 11 Ekamba ndịk amaamʌm afịd ufọkabasi ye afịd mbon se ikikop ibaña mme ñkpọ ami.

12 Mme abọsịd emaenam uwak idiọọñọ ye mme utịppeñkpọ ke atu mbon awo. Ndin afịd mme andinịm ke akpanikọ ekesisoobo ke Esa Sọlọmọn. 13 Awo ndomokeed mfen ikidʌkkọ atu ammọ, akpesʌkado mme awo ekenekkeke ekpono ammọ. 14 Ado ibad ideen ye ibaan se ikikeene ammọ inịm Abọọñ ke akpanikọ amaakaa iso atọt. 15 Ndin mme awo emaekoono mbon udọñọ ewuọñọ edi ke mme efaak, ebon ammọ ke ikʌk ye ke aya, nọ ato do naña nte akpedodo, ke ini Pita amaasaña aboiyo, ndukpọñ amọ akpesʌk atuuk ubaak ammọ. 16 Atu awo emaewuọñọ ñko ke mme abio se ikida ikpere Yeruselem edi, enyʌñ ekoono mbon udọñọ edi, ye mbon se ndedeghe sịbidịd eketʌkkọ, ndin afịd ammọ emaekop nsọñidem.

17 Ndin ekamba aku ye afịd mme nsaña amọ e-ekebaaha ke ñka mme Sadusi emaeyọhọ ye ufịb. 18 Ammọ emaemʌm mme abọsịd, enyʌñ edọñ ammọ ke ufọk ñkpakọb afịd awo. 19 Ado ke akonayio, enyere Abọọñ amaataat mme usʌñ ufọk ñkpakọb, asịññe ammọ asuuk, 20 anyʌñ abo ammọ, "Ikaa ikida ke mme afe tembịd inyʌñ itañ inọ mme awo afịd ikọ a-abañake ufa uwem ami."

21 Ke ammọ emaekekop ado, ammọ emaedʌk mme afe tembịd ke usiere, enyʌñ etọọñọ adikpeep mme awo ñkpọ.

Ke ini ekamba aku ye mme nsaña amọ emaekedisịm, ammọ emaekoot mme esob Sanhidrin mme Yuu, a-adooho ayọhọ mbono afịd mme ñkpisọñ Isrel, enyʌñ edọñ ebo eka ekesịññe mme abọsịd ke ufọk ñkpakọb edi. 22 Ado ke mme isʌñutom emaekekewuọ ufọk ñkpakọb, mme adaaha ikikịtte mme abọsịd do. Ndin ammọ emaetịmme enyọñ ekedọkkọ ammọ ete, 23 "Ñnyịn imikikịt ufọk ñkpakọb nte asʌk abebere, ye mme akpeme ufọk ñkpakọb naña eda ke mme inuausʌñ, ado ke ñnyịn imaikibeede usʌñ, ñnyịn ikikịtte awo ndomokeed ke esịd ufọk." 24 Ke mme akamautom ke tembịd ye mme akpeme ufọk ñkpakọb ye mme ñkpoon aku emaekekop etob ami, ammọ ikidiọọñọke se ekpenam, idem amaanyʌñ akpa ammọ abaña se utọ ñkpọ ami akpewuọñọ.

25 Akema, awo keed amaadi adibo ammọ ate, "Se! Mbon a-ndufo ekedọññọ ke ufọk ñkpakọb mmọ ko eda ke mme afe tembịd esʌk ekpeep mme awo ñkpọ." 26 Ke adaiwuod ekọñ ye mme adaaha utom amọ emaekekop ami, ammọ emaeka ekeben mme abọsịd edi. Ado ammọ ikinamma ke afai mbaak mbon awo editọọñ ammọ ke itiad.

27 Emaeben mme abọsịd edʌk edi enyʌñ enam ammọ eda ke iso esob Sanhidrin mme Yuu, nọ ekamba aku abiime ammọ mbuume. 28 Anye amaabo ammọ ate: "Ñnyịn imainekke iwuuk ite ndufo ikiikpeep ñkpọ aba ke anyịñ ami, ado ndufo emenam ukpeebñkpọ ndufo akara afịd isọñ Yeruselem, enyʌñ ebeeñe idem adinam iyiib awo ami idodo ñnyịn ke idem."

29 Pita ye mme abọsịd mbon ako emaebọọrọ ete: "Ñnyịn inie adikop uyio Abasi, idooho uyio awo! 30 Abasi mme ete ñnyịn amaanam Yisọs a-ndufo ekewotto ke adikọñ anye ke krọs aset ke ñkpa. 31 Abasi amaabenne anye anịm ke ubọk nnasia amọ nte Akpan Abọọñ ye Andinyaaña nọ anye anam Isrel ekappa esịd, anye ñko anyʌñ afeen mme idiọọkñkpọ ammọ. 32 Ñnyịn ido mme ntiense ibaña mme ñkpọ ami, ntoro ñko ke Adisana Sịbidịd ado, a-Abasi anọọhọ mbon e-ekoppo uyio amọ."

33 Ke ammọ emaekekop mme ikọ ami, esịd amaayat ammọ eti-eti, ndin ammọ emaeyem adiwot mme abọsịd. 34 Ado awo Farisi keed a-akekereke Kamaliel, akpeeb mbed, a-afịd awo ekekponoke, amaadakka ada ke esob Sanhidrin anyʌñ anọ uyio ate enam mme abọsịd ewuọñọ diin ekebet etək ke anwa esiin. 35 Ndin anye amaabo mbon esob Sanhidrin ate: "Ndufo mbon Isrel, inekke ikere ibaña se ndufo eduak adinam ye ibon ami. 36 Ke usen edem, Tiudas amaadakka ada, adat idem amọ nte awuọiso awo, ndin ñkpọ nte awo ikie inaañ emaewuọñọ ekeene anye. Emaewot anye, ndin afịd mme mbed amọ emaenyʌñ esuana; ke akpatre afịd ñkpọ se anye akenam akewuọñọ ikpu-ikpu. 37 Ke Tiudas amaakekpa, Yudas a-aketooho Kalili amaawuọ adi ke ini ekenamma ubadawo, anyʌñ akoono uwak awo e-ekedianake ye anye esịn ntịme ke abio. Emaewot anye ñko, ndin afịd mme mbed amọ emaesuana. 38 Ndin idahami, ami mmenọ item mbo yak ndufo esịññe idem ekpọñ ibon ami! Isaana ammọ iyaak nọ enyọñọ! Sia akpedo uduak ye adinam ammọ ato awo, ayaakpu. 39 Ado akpedo se ammọ enam ato Abasi, ndufo idiikanna ikpan ammọ, utu ke ado ndufo ediikappa inwana ye Abasi."

40 Ammọ emaekop ikọ se Kamaliel aketañ. Ke ntoro emaekoot mme abọsịd edi, enyʌñ enam emia ammọ. Ndin emaenọ ammọ uyio ete ammọ ekuukpeep ñkpọ aba ke anyịñ Yisọs, enyʌñ esaana ammọ eyaak.

41 Mme abọsịd emaekpọñ esob Sanhidrin, edaara sia emaebat ammọ nte mbon e-edotto adidia abuud ke ntak anyịñ Yisọs. 42 Ke usen ke usen, ke mme afe tembịd ye ke ufọk ke ufọk, ammọ ikitreke adikpeep ye adikwọrọ eti mbʌk mbo ke Yisọs ado Krais.