1 Ke imaikisịm unaisọñ ke ifuuro, do ke ñnyịn ikididiọọñọ ke isu mmọọñ ado akekere Malta. 2 Mbon idʌñ ado emaenekke efọn ido ye ñnyịn. Ke ntak atueb ye edịm akedeppe, ammọ emaidaara ñnyịn ke adibara ikañ inọọ nọ iwue. 3 Pọọl amaatañña abek ifia nọ ekama ebara ikañ, ndin anye akesịn ikañ, idiọọk udʌkikọd amaawuọ awaña anye ke ubọk, ato ufiob ikañ. 4 Mbon idʌñ ado ekekịt naña udʌkikọd awaña Pọọl ke ubọk, ammọ emaebo emọ-emọ, "Ana ado awo ami ado awodawo; akpesʌkado a-anye amaakebọkkọ ke akpainyañ, ndem Usiene idiọọk ñkpọ iyakka anye adu uwem." 5 Ado Pọọl amaasịppe udʌkikọd ado asịn ke ikañ, ñkpọ inamma anye. 6 Mbon awo ado ekekere ke anye ayaayọọk, imiidooho anye aduọ akpa adiyok-adiyok, ado akekpeene nọ ammọ imiikịtte nte ñkpọ anam anye, ammọ emaekpəhọ akikere ebo ke anye ado abasi.

7 Amaaba akwere i-imiikinyọọñọ usʌñ, a-Publius, ekamba andikara abio ado, akenieghe. Anye amaidaara ñnyịn anyʌñ inọ ñnyịn ndidia ye itie nnaa usen ita nte isenawo ke ufọk amọ. 8 Ndin idem ikisọññọ ete Publius; ufiobidem ye utọrọ iyiib akenam anye anaana ke ikʌk. Pọọl amaakese anye, ndin ke amaakebọñ akam ama, amaadot anye ubọk anyʌñ akọk anye udọñọ. 9 Ami akekweeñe, mbon mfen e-ekedọñọke ke idʌñ ado emaewuọñọ edibọ ukọk. 10 Ami amaanam ammọ ikpono ñnyịn ke uwak usʌñ, inọ ñnyịn mme ñkpọ se ikiyem ke ini ikibooho ikpọñ ammọ.

11 Ke afiọñ ita amaakeboiyo, ñnyịn imaikpọñ ke nsʌñikañ a-akedidianna abet ekarika akweeñe ke isu mmọọñ ado. Nsʌñikañ ami aketo Aleksandra, anie iso mme amanamba abasi e-ekoodo Kastọ ye Poluks. 12 Ñnyịn imaiwuọ Sirakus, inyʌñ ikitie do usen ita. 13 Tọọñọ do, imaisio uwad ikiwuọ Rekium. Edem usen, afịm usuuk amaatọọñọ afịme, ndin ke ayọhọ usen iba imaikiwuọ Putioli. 14 Ke udo ke ñnyịn ikisoobo ye ikọd Abasi e-ekikoodo ñnyịn ebo idiba ye ammọ udua keed. Ndin ñnyịn imaikiwuọ Rom. 15 Ke mme ikọd Abasi ke Rom emaekekop ke ñnyịn isʌk idi, ammọ emaenam isañ tutu ekewuọ Afe Mbono Apius ye mme Itie Ukama Isen Ita nọ edisoobo ye ñnyịn. Pọọl amaakọọm Abasi, anyʌñ abọ idọñesịd ke adikịt ibon ado. 16 Ñnyịn ikikisịm Rom emaenyịmme Pọọl adʌñ ke idem amọ ikpọọñ, ado emaenọ awo ekọñ akpeme anye.

17 Usen ita amaakeboiyo, Pọọl amaakoot mbono mme adaiwuod mme Yuu. Ammọ emaekediboho, Pọọl amaabo ammọ ate: "Nditọeka mmi ke Krais, akpesʌkado a-ami mmiidueghe mbon ñnyịn me mbed mme eteete ñnyịn, emaemmʌm miin ke Yeruselem enyʌñ eñkappa enọ mbon Rom. 18 Ammọ emaenduuñọ miin enyʌñ eyem adinsaana ñyaak, sia ami ñkidueghe mbed ndomokeed a-adotto ñkpa. 19 Ado mme Yuu emaefaaña, ndin akena ami mben ikpe mmi ñka iso Sisa sia mmaaketʌmọ anye. Ke aditịm ntañ, ami ñkinieghe akikere adikoot mbon mmi ikpe. 20 Ke ntak ami ke ami ñyem adisoobo ñnyʌñ nneme nneme ye ndufo. Sia ato ke ntak idodanyen Isrel ke ensịn miin ke ñkpọnọ ami."

21 Ammọ emaebọọrọ, "Ñnyịn ibọọhọ ñwedetob ndomokeed u-ubañake fiin ito Yudia, inyʌññọ iba awo ndomokeed ke atu mme ikọd Abasi a-atooho udo adi adinọ etob me atañ idiọọk ñkpọ ubaña fiin. 22 Ado ñnyịn imiyem adikop akikere mfo, sia ñnyịn imidiọọñọ ke mme awo ke afịd itie etaañ ikọ edot atu mme akpono Abasi ami."

23 Ammọ emaedot usen enyʌñ ebeeñe idem adisoobo ye Pọọl, enyʌñ esaña ye ataa uwak awo ekaa itie a-anye akedʌññọ. Tọọñọ ke ubakusen tutu ndubiayio, Pọọl amaanam anwaña ammọ, akwọrọ abioubọọñ Abasi anwa-anwa anọ ammọ, anwana adinam ammọ ekịt ye anye ufọn adinịm Yisọs ke akpanikọ a-atooho ke Mbed Moses ye ake mme Prọfed. 24 Ubaak awo emaenịm ikọ amọ ke akpanikọ, ado ubaak ikinịmme. 25 Ke ntoro ammọ emaefaaña ke atu idem ammọ enyʌñ etọọñọ adinyọñọ ke Pọọl amaaketañ akpatre ikọ ami: "Adisana Sịbidịd aketañ akpanikọ anọ mme eteete ndufo ato ke prọfed Aisaiya abo ate:

26 " ‘Kaa ke tañ nọ ibon ami,

"Ndufo eyaekop, ado idiinwañake ndufo,

ndufo eyaekịt ado idiimọọnọke."

27 Sia esịd ibon ami adoro ufiọọn;

ammọ ikoppo ñkpọ ke utọñ ammọ,

ñko enyʌñ ebọọp anyen ammọ.

Mmiidooho ntoro anyen ammọ ekpaekịt ñkpọ,

utọñ ammọ ekpaenyʌñ ekop ñkpọ,

ñkpọ akpaanyʌñ anwaña ammọ,

ndin ammọ ekappa esịd, etịmme edi, ndin ami ñkpaakọk ammọ.’

28 "Ke ntoro, ami ñyem ndufo ediọọñọ ke e-enọ adinyaaña Abasi ami esọk mme Gentile, ndin ammọ eyaekpañ utọñ." 29 Anye amaaketañ mme ikọ ami ama, mme Yuu emaedaaña enyọñọ, esʌk efaaña mbiaak-mbiaak ke idem ammọ.

30 Pọọl amaadʌñ do ke ufọk a-anye akekpeeghe ke idem amọ ke afịd isua iba anyʌñ adaara afịd awo se ikidi idise anye. 31 Anye amaakwọrọ abioubọọñ Abasi anyʌñ akpeep mme awo ñkpọ abaña Abọọñ Yisọs Krais uko-uko, ndin awo ndomokeed ikidomoke adikpan anye.