Pọọl Akaa Kọrint
1 Ke mme ñkpọ ami emaekeboiyo, Pọọl amaakpọñ Aten akaa Kọrint. 2 Ke udo anye amaakịt awo Yuu keed a-akekereke Akwila, a-aketooho Pọntus. Anye aketo Itali adi ye anwaan amọ Prisila sia Klaudius amaakenọ uyio ate afịd mme Yuu ekpọñ Rom. Pọọl amaakaa akese ammọ, 3 ndin sia anye akedooho anam atayad nte Akwila ye Prisila, anye amaatie anam utom ye ammọ. 4 Anye amaanie nneme afịd Sabad ke sinakọk, adomo ukeme adinam mme Yuu ye mbon Greek ekịt ntak a-ammọ ekpenịmme ke akpanikọ.
5 Ke ini Sailas ye Timoti emaeketo Masidonia edi, Pọọl amaayaak idem amọ afịd-afịd asịn ke adikwọrọ ikọ, aben awọt mme Yuu ke Yisọs ado Krais. 6 Ado ke mme Yuu emaekefaaña ye Pọọl enyʌñ ekanna eda ke adisuesue anye, Pọọl amaasio mme afọñidem amọ asịppe anyʌñ abo ammọ ate, "Iyiib ndufo idodo ndufo ke iwuod! Ubọk mmi isịneke do, mmesana. Tọọñọ ke idahami, ami ndiika mbịne mme Gentile."
7 Ndin Pọọl amaakpọñ sinakọk akaa ufọk Titiọs Yọstus, akpono ataa Abasi, u-ufọk amọ akediaññake atañ ye sinakọk. 8 Krispus, etubom sinakọk ye afịd ufọk amọ emaenịm Abọọñ ke akpanikọ, ndin uwak mbon Kọrint e-ekekoppo se Pọọl aketañ emaenịm ke akpanikọ enyʌñ ebọ uduọkmmọọñ.
9 Akonayio keed, Abọọñ amaatañ ikọ anọ Pọọl ke ñkukịd, ate: "Kuukop ndịk; kaa iso kwọrọ, kuudop uyio. 10 Sia ami mmọdo mba ye afo, ndin awo ndomokeed idiinamma ntịme ye afo, idinyʌññọ unọ fiin unan sia ami mmenieñe uwak awo ke abio ami." 11 Ndin Pọọl amaatie do ke Kọrint isua keed ye ubaak akpeep ammọ ikọ Abasi.