1 Nọ asaña akekem ye ikọ Abọọñ aketañña ke inua Yerimaiya, ke akpa isua ukara Sairọs adidem Pesia akedaaha ukaara, Abọọñ amaasịn ke esịd Sairọs adidem Pesia anam anye anọ ewʌhọ ke afịd itie a-anye akekarake anyʌñ awewet ewʌhọ ado asịn ke ñwed:

2 "Se Sairọs adidem Pesia atañ ado ami:

" ‘Abọọñ, Abasi anyọñ, annọ miin afịd mme idịd ke iso isọñ anyʌñ ammek miin adibọp tembịd ke Yeruselem ke Yuda nnọọ anye. 3 Awo amọ akeedodo ke atu ndufo akeme adika Yeruselem ke Yuda ñkebọp tembịd Abọọñ, Abasi Isrel, Abasi anye a-abaaha ke Yeruselem, ndin yak Abasi ammọ aba ye ammọ. 4 Ndin ke itie akeedodo ake mme ñyọhọnsʌhọ ekedʌñọke, mme amanaisọñ ana enọ ammọ silfa mme kold, ñkpọ inie ye ufene, ye mme enọ imaesịd nọ edat eka tembịd Abasi ke Yeruselem.’ "

5 Do ndin mme adaaha ke mme ufọk Yuda ye Benyamin, mme aku ye mme Lifai, afịd mme awo se Abasi aketuuk esịd, emaebeeñe idem edika ñnyʌñ ñkebọp ufọk Abọọñ ke Yeruselem. 6 Mme afịd mbọhọidʌñ ammọ emaenwam ammọ ke mme ñkpọ ke silfa ye kold, mme ñkpọ inie ye mme ufene, ye mme enọ ñkpọuto, adian ye mme enọ ima esịd.

7 Akanna ado, Adidem Sairọs amaasịññe mme ñkpọ a-akenieghe tembịd Abọọñ adi, ake Nebukadnesa amaakebiom ato Yeruselem akebon ke tembịd abasi amọ. 8 Adidem Sairọs ake Pesia amaanam Mitredad, akamaakʌk nọ abat mme ñkpọ ado ayaak anọ Sesbasaa, akpanabọọñ Yuda.

9 Mme ibad anyịñ ñkpọ ekesịnne ke ñwed edoñño ami:

Mme usan ake kold edịb mme duob.

Mme usan ake silfa tọsịn keed (1,000).

Mme ako ake silfa edịb mme usʌkkeed.

10 Mme ntəño usan ake kold edịb mme duob.

Mme ndukemme ntəño usan ake silfa se isaña keed ikie inaañ mme duob (410).

Mme ñkpoduoho mfen tọsịn keed (1,000).

11 Ke afịd, mme ñkpọ ake kold ye silfa akedʌk tọsịn ition mme ikie inaañ (5,400).

Sesbasaa amaakoono afịd mme ñkpọ ami ye mme ntañnsio ke abio ato Babilọn anyọñ akaa Yeruselem.