1 Ke emaekenam afịd mme ñkpọ ami ema, mme adadusʌñ emaedi embịne miin, enyʌñ ebo, "Mbon Isrel, mme aku, ye mme Lifai, idiaññake idem ammọ ikpọñ mbọhọidʌñ ammọ, e-enieghe mme mbubiam ido, ukem nte ake mbon Kenan, Hed, Peris, Yebus, Amọn, Mọb, Iyib ye Amọọ. 2 Ammọ ekoono usʌk nditọ ibaan ke atu ibon ami enọ idem ammọ ye nditọ ideen ammọ nte ibaan ndọ, enyʌñ ewuak adisana ubon ye mme idịd mfen ke mbọhọidʌñ ammọ. Ndin mme adadusʌñ ye ñkpoonawo utom edat usʌñ ke mme idiọọk ido ami."

3 Ami ñkekop ikọ ami, ami mmaawai mme nsiine mmi, ndʌt ided ke iwuod ye ñwa ebek mmi ñnyʌñ nsuuk ntie ke isọñ ke ñkpaidem. 4 Akema afịd awo se ibaak ikọ Abasi Isrel emaeditie eñkanna miin ekʌk ke ntak idiọọk ido mbon se eketañ esịññe ke abio. Ami mmaanyʌñ ntie do ke ñkpaidem tutu ini uwa ndubiayio adikem.

5 Akema ke ini uwa ndubiayio, ami mmaadakka nda ke itie mfʌhọ mmi, mme nsiine idem mmi emaewaiya, ñnyʌñ nduọ ke edọñ mmi, ntat ubọk nnọ Abọọñ Abasi mmi, 6 ñnyʌñ mbọñ akam mbo nte:

"Abasi mmi, abuud ye asuenne emmʌm ebọhọ, ami adidịppe iso mmi use fiin, sia mme idiọọkñkpọ ñnyịn e-ekoñ ekan etịñiwuod ñnyịn, ndudue ñnyịn e-enyʌñ ekesịm mme hefịn. 7 Tọọñọ ke ini mme eteete ñnyịn tutu idahami, mme ndudue ñnyịn asʌk akpokpon ke ntak mme idiọọkñkpọ ñnyịn, ñnyịn ye ndidem ñnyịn, ye mme aku ñnyịn imikịt afai ye ñkọbntem, mbịme ye asuenne ke ubọk mme isen ndidem, kpa nte asʌkkọ ado mfịn mmi.

8 "Ado idahami, ke etək ini, Abọọñ Abasi ñnyịn atua ñnyịn mbọm, afọn ido ke adinọ ñnyịn ñyọhọnsʌhọ anyʌñ inọ ñnyịn nsọọñọnda itie ke adisana itie amọ, ñko Abasi ñnyịn anam yak ikịt unwana ye etək mfuud ke nnananyen ñnyịn. 9 Akpesʌkado ñnyịn idooho mme ifʌn, Abasi ñnyịn ifreke ñnyịn ke nnananyen ñnyịn. Anye iwọt ñnyịn mfọn ke iso mme ndidem Pesia: Anye inọ ñnyịn ufa uwem adimaana mbọp ufọk ake Abasi ñnyịn ñnyʌñ ndiọñ ñwuudo, anye ñko inọ ñnyịn ndibene ukpeme ke Yuda ye ke Yeruselem.

10 "Ado idahami, Abasi ñnyịn, nsoo ke ñnyịn ikeme aditañ ke ñkpọ anye mi amaakweeñe? Sia ñnyịn imaisịn mme ewʌhọ 11 a-afo akenọọhọ ato ke mme isʌñutom mfo, mme prọfed ke ini a-afo akebooho ate: ‘Isọñ ake ndufo edʌkkọ ekaa adidat idooho adisana akeene ndiọi ñkpọ mme andidʌñ ke isọñ ado. Ato mme mbubiam ido ammọ, isọñ ado ayọhọ ye ndek tọọñọ ke itie keed tutu akesịm akpatre. 12 Ke ntoro, ikiiyaak nditọ ibaan ndufo inọọ nditọ ideen ammọ ke ndọ, ikiinyʌñ iyaak nditọ ideen ndufo edat nditọ ibaan ammọ ke ndọ. Ndufo ikiinyʌñ iyem edioomo ufan ye ammọ tutu amama, nọ ato do ndufo ediikop uko enyʌñ edia mme mfọn isọñ ado, enyʌñ ekpọñ enọ nditọ ndufo nte udeeme inie ke nsi-nsi.’

13 "Se itịppe inọ ñnyịn ado utịb idiọọk ido ñnyịn ye ekamba ndudue ñnyịn, ado afo Abasi ñnyịn, afo umiaha ñnyịn ufen yak akekem naña idiọọkñkpọ ñnyịn ado, amenyʌñ inọ ñnyịn ñyọhọnsʌhọ ami. 14 Nte ana ñnyịn imaana ibiat mme mbed mfo inyʌñ idudọiyọ ye mbon e-enamma utọ mbubiam ido ami? Nte afo uduuyatta esịd ye ñnyịn tutu afo isobo ñnyịn, unyʌññọ usio nsʌhọ ndomokeed unịm? 15 Abọọñ, Abasi Isrel, afo amenen! Mfịn ami, ñnyịn se iba ido ataa etək nsʌhọ. Se ñnyịn mi ke iso mfo ye ndudue ñnyịn, akpesʌkado a-adooho ke ntak idiọọkñkpọ ñnyịn ami, ibaaha awo keed ke atu ñnyịn a-adotto adida ke iso mfo."