1 Mme anyịñ mme adaaha ke mme ubon ye mbon se ekewet anyịñ esịn ye ammọ e-ekeñkeeneke miin eto Babilọn edi ke ini ukara Adidem Ataseeses edoñño ami:

2 Ake ubon Finehas:

Kesọm;

ake ubon Itama:

Dandiel;

ake ubon Defid:

Hatus 3 ake nditọ Sekanaiya;

ake ubon Paros;

Sakaraiya, ñko emaewet mme anyịñ ideen ikie mme aba mme duob (150) edian ye anye;

4 ake ubon Pahad-Moab:

Eliehoenai ayịn Serahaiya, ñko emaewet mme anyịñ ideen ikie iba (200) edian ye anye;

5 ake ubon Satu:

Sekanaiya ayịn Yahasiel, emaewet mme anyịñ ideen ikie ita (300) edian ye anye;

6 ake ubon Adịn:

Ebed ayịn Yọnatan, emaewet mme anyịñ ideen aba mme duob edian ye anye;

7 ake ubon Elam:

Yesaiya ayịn Atalia, emaewet mme anyịñ ideen ata mme duob edian ye anye;

8 ubon ake Sefatia:

Sebadaiya ayịn Maikel, emaewet mme anyịñ ideen anaañ edian ye anye;

9 ake ubon Yoab:

Obadaiya ayịn Yehiel, emaewet anyịñ mme ideen ikie iba mme duob mme itiaita (218) edian ye anye;

10 ake ubon Bani:

Selomid ayịn Yosifia, emaewet mme anyịñ ideen ikie mme ata (160) edian ye anye;

11 ake ubon Bebai,

Sakaraiya ayịn Bebai: emaewet mme anyịñ ideen edịb mme itiaita (28) edian ye anye;

12 ake ubon Askad:

Yohanan ayịn Hakatan, emaewet mme anyịñ ideen ikie mme duob (110) edian ye anye;

13 ake mme akpatre ubon Adọnikam:

mme anyịñ ammọ ekedoñño Elifeled, Yeiyel ye Semaiya, emaewet mme anyịñ ideen ata (60) edian ye ammọ;

14 ake ubon Bikfai:

Utai ye Sakọọ, emaewet mme anyịñ ideen ata mme duob (60) edian ye ammọ.

15 Ami mmaakoot ammọ mbok itie keed ke inuaakpa a-afegheke aka Ahafa, ñnyịn imainyʌñ iba do ke usen ita. Ami mmaayeem ke atu mme awo ye mme aku, ado ami ñkekịtte awo Lifai ndomokeed do. 16 Ndin mmaadọñ ekoot Eliesa, Ariel, Semaiya, Elnatan, Yarịb, Ednatan, Natan, Sakaraiya ye Mesulam, e-ekedoññoke mme adaaha, Yoiyarịb ye Ednatan, e-ekedoññoke mme nta ifiọk, nọ edi ke iso mmi, 17 ndin ami mmaanọ ammọ uyio mbo yak eka ebịne Iddo, adaaha ke Kasifia. Ami mmaadọkkọ ammọ se ediitañ ye Iddo ye mme Lifai mbio ako, ye mme anamutom ke tembịd ke Kasifia, nọ ammọ ekoono mme anam ñkpọ ufọk isọk ñnyịn nọ enam utom ke ufọk Abasi ñnyịn. 18 Sia ubọk mfọn Abasi ñnyịn amaaba ye ñnyịn, ammọ emaeben Serebia, awo etiiwuod akanna ñkpọ anam, aketooho ubon Mahli ayịn Lifai, ayịn Isrel, ye nditọ ideen ye nditọeka ideen Serebia, afịd ekedo duob mme itiaita; 19 ye Hasabaiya, dian ye Yesaiya, ake ubon Merari ye mme nditọeka amọ ideen ye mme nditọ ayịneka amọ ideen, afịd ekedoñño ideen edịb. 20 Ammọ ñko emaeben mme anamutom ikie iba mme edịb (220) ke tembịd edi, mbon se Defid ye mme adaaha ekesịññe enịm adinwam mme Lifai. Emaewet afịd ammọ anyịñ.

21 Ke Inuaakpa Ahafa, ami mmaasian utreudia, nọ ñnyịn isuuhọ idem ñnyịn ke iso Abasi inyʌñ ibeeñe anye mfọn usʌñisañ inọ idem ñnyịn ye mme nditọ ñnyịn, ye afịd inie ñnyịn. 22 Abuud amammʌm miin adibịp adidem mbo yak inọ mbon ekọñ ye mme awad enañmbakara nọ ikpeme ñnyịn mbaak mme asua ke usʌñ, sia ñnyịn imaidọkkọ adidem ibo ite, "Ubọk mfọn Abasi ñnyịn aba ye afịd mbon se iyem anye, ado ekamba iyadesịd amọ anwana ye mbon se isịn anye." 23 Ndin ñnyịn imaitre ndidia inyʌñ ikpeiye Abasi ñnyịn ibaña ñkpọ ami, ndin anye amaayie akam ñnyịn.

24 Akema, ami mmaasio awo duob mme iba ke atu mme adaaha aku nnịm, ammọ ekedoñño Serebia, Hasabaiya ye nditọeka ideen ammọ duob, 25 ndin ami mmaadomo ndeeme nnọ ammọ mme enọ ake silfa, kold ye mme ñkpọ se adidem, ye mme anọitem amọ, mme ñkpoon mbon utom amọ, ye afịd nditọ Isrel se ikiba do ekenọọ, kpa enọ ake ufọk Abasi ñnyịn. 26 Ami mmaadomo nnọ ammọ talen silfa ikie itiokeed ye aba mme duob*, ye mme ñkpọ ake silfa adoppoke ñkpọ nte talen (100) ikie*, ye talen kold ikie, 27 usan kold edịb a-anieghe ekọmudua darik tọsịn keed (1,000)*, ye mfọọn nsem-nsem ñkpọ brọns, a-asọññọ udua nte kold.

28 Ami mmaadọkkọ ammọ nte, "Ndufo ye mme afịd ñkpọ ami edoñño adisana enọ Abọọñ. Mme silfa ye kold ami edoñño enọ imaesịd enọ Abọọñ, Abasi mme eteete ñnyịn. 29 Ndufo itịm ikpeme ammọ tutu edomo ammọ ke esịd akwere ufọk Abọọñ ke Yeruselem ke iso mme adaaha aku ye Lifai ye mme adaaha ke mme ubon Isrel." 30 Ndin mme aku ye mme Lifai emaebọ mme silfa ye kold ye mme ndisana ñkpọ emaekedomo nọ ekoono ekaa ufọk Abasi ñnyịn ke Yeruselem.

31 Ke ayọhọ usen duob mme iba ke akpa afiọñ, ñnyịn imaidakka ito ke Inuaakpa Ahafa adika Yeruselem. Ubọk Abasi ñnyịn amaaba ye ñnyịn, ndin anye amaikpeme ñnyịn asio ke ubọk mme asua ye mbon mfịna ke usʌñ isañ. 32 Ndin ñnyịn imaikiwuọ Yeruselem, imainyʌñ iduọk adudu ke usen ita.

33 Ke ayọhọ usen inaañ, ke ufọk Abasi ñnyịn, ñnyịn imaidoomo mme silfa, mme kold ye mme ndisana ñkpọ idọñ ke ubọk Meremọd, ayịn aku Yuria. Eliasa ayịn Finehas akeba ye anye, ñko ye mme Lifai Yoosabad, ayịn Yesua ye Nahalal ayịn Binui. 34 Emaewet afịd ñkpọ esịn ke ñwed ekeene ibad ye udob, emaewet afịd ami esịn ke ñwed kpa ke idaha ado.

35 Ndin mbon se ikito idi ke itie ammọ ekebaaha ke ñkọbntem emaewa mme ufọfọb uwa ami enọ Abasi Isrel: ñyaaraenañ duob mme iba enọ afịd ikọd Isrel, akukịmedọñ anaañ mme duob mme itiokeed, ñyịn akukịmedọñ ata mme duob mme itiaba, ñko nte uwa idiọọkñkpọ, emaewa akpoebod duob mme iba. Afịd ami akedo ufọfọb uwa anọ Abọọñ. 36 Ammọ emaenyʌñ edat mme ewʌhọ adidem enọ mbon se ise utom inọ adidem ye mme adaukara ke Edem Inyañ Yufretis, ndin ammọ emaenwam nditọ Isrel ke utom adibọp ufọk nnọọ Abasi.