1 Ke ini mme asua ikọd Yuda ye Benyamin ekekoppo ebo ke mbon se ekebiiñe esịññe ke abio ekesʌk ebọp tembịd enọ Abọọñ, Abasi Isrel, 2 ammọ emaekaa ekesoobo Serubabel ye mme adaaha ke mme ubon enyʌñ ebo, "Yak ñnyịn inwam ndufo adibọp tembịd, sia ñnyịn ñko, nte ndufo, iyem iso Abasi ndufo, ñko ñnyịn ikisʌk isinanam uwa inọ anye tọọñọ ke ini Esahadọn adidem Asiria, a-akibenne ñnyịn adi mi."

3 Ado Serubabel, Yọsua ye mme adaaha mfen ke mme ubon ke Isrel emaebọọrọ ebo, "Ndufo inieghe udeeme ye ñnyịn ke adibọp tembịd nnọọ Abasi ñnyịn. Ñnyịn ke idem ñnyịn ikpọọñ idiibọp inọ Abọọñ, Abasi Isrel, nte Adidem Sairọs, adidem Pesia, akinọọhọ ñnyịn uyio."

4 Ndin mbon mbọhọidʌñ ado emaenwana adisịn mmemidem nnọọ mbon Yuda nọ ato do ammọ esịññe idem ekpọñ ndin ekop ndịk ebaña adika iso mbọp ufọk ado. 5 Ammọ (mbon esen idịd ado) emaenọ mme ñkpoon mbon utom ubọkedem nọ ato do ammọ esịn ndutịme enyʌñ enam uduak ubọp ufọk akpu, ke afịd ini ukara Sairọs adidem Pesia tutu awuọ ini ukara Dariọs adidem Pesia.

6 Ke ntọọñọ ukara adidem Seeses, ammọ emaewet ñwed edot mbon Yuda ye Yeruselem uyio.

7 Ke ini ukara Ataseeses adidem Pesia, Bislam, Mitredad, Tabeel ye mme nsaña amọ mbon ako, emaewet ñwedetob enọ esọk Ataseeses. Ammọ ekekama abiisi ikọ Aram ewet ñwedetob ado ke usem Aram.

8 Rehum, adaiso ekọñ ye Simsai, awedñwed emaewet idiọọk ñwedetob ebaña Yeruselem enọ esọk adidem Ataseses ebo ete:

9 Rehum, adaiso ekọñ ye Simsai, awedñwed, ñkọrọ afịd mme nsaña ammọ mbon ñko, mme abiideikpe, ñkpoon mme adaaha ye mme akamautom ke iwuod mbon Pesia, Uruk ye Babilọn, mbon Elam ake Susa, 10 ñko ye mme idịd mbon mfen, ake ekamba abọọñ Asubanipal akesịññeke akebono ke abio Sameria ye ke itie mfen ke Edem Inyañ Yufretis.

11 (Ukem-ukem ñwedetob ammọ ekenọọhọ anye ado ami).

Enọ esọk Adidem Ataseses,

Ami ato ikọd mfo, mbon Edem Inyañ Yufretis:

12 Adidem akpena adiọọñọ abọ ke mme Yuu e-ekutooho fiin edi ibịne ñnyịn ekpọñ ekaa Yeruselem, ndin ke ammọ esʌk etịmme ebọp idiọọk abio ntịme ado. Ammọ esʌk emaana ediọñ mme ndibene ado edoñño ufa enyʌñ ediọñ mme itiad idakisọñ ado.

13 Ke ado amaaboiyo, adidem akpena adiọọñọ abo ke adieke ebọppọ abio ado, enyʌñ emaana enam mme ndibene ado edo ufa, awo idiikpeeghe taks, me utịb me etịbe aba, ndin ami ayaafịna mme usʌñ unie akʌk adidem. 14 Sia ñnyịn iba ke mbed akwere adidem, ikpifọnnọ ñnyịn adikịt naña adidem adia abuud, ado anam yak ñnyịn inọ etob ami nọ edọkkọ adidem, 15 nọ enam nduuñọ ke mme akaan ñwed esed mbon se imaikibabak iba ke ukara. Ke esịd mme ñwed ado, afo ayaakịt abo ke abio ami ado abio nsọñiwuod, esịn ntịme ye mme ndidem ye mme abio ukara, itie a-anieghe anyan etob nsọñiwuod ye ndidem tọọñọ ke esed. Ntak e-ekesoboke abio ami ado ado. 16 Ñnyịn idọkkọ adidem ibo ate, ke adieke ebọppọ abio ami, enyʌñ enam mme ndibene amọ edoñño ufa, afo uduunieghe udeeme ñkpọ aba ke Edem Inyañ Yufretis.

17 Ndin adidem amaanọ ibọọrọ ami:

Enọ esọk Rehum adaiwuod ekọñ, Simsai awedñwed ye mme nsaña ammọ mbon ako, e-edʌññọ ke Sameria

ye ke itie mfen ke Edem Inyañ Yufretis:

Mmikọọm ndufo!

18 Emaekoot enyʌñ ekappa ñwedetob a-ndufo ekenọọhọ isọk ñnyịn ke iso mmi. 19 Ami mmaanọ uyio ndin emaenam nduuñọ, ñko emaekịt ke abio ami anie anyan etob adinwana ye mme ndidem, anyʌñ ado itie idʌñ anwan ye nsọñiwuod. 20 Yeruselem emaesinie mme ñkpọsọñ ndidem ekekaarake ke afịd Edem Inyañ Yufretis, ndin emaesikpe taks, utịb ye etịbe enọ ammọ. 21 Ke ntoro, inọ uyio bo yak ibon ado etre utom, mbaak awo adimaana akebọp abio ado tutu ami nnọ ewʌhọ mbo enam ntoro. 22 Ndufo inekke ikpeme mbaak idifre ibaña ñkpọ ami. Nsoo inam nọ ndufo eyak utọ ibak uduak ami aka iso, nọ aben mbiara anọ ñkpọ ubọọñ adidem?

23 Ekesʌk ekokoot ukem ikpañwed ñwedetob Adidem Ataseses enọ Rehum ye Simsai awedñwed ye mme nsaña ammọ, ammọ emaekaa ini keed ebịne mme Yuu ado ke Yeruselem enyʌñ ekpak ammọ ke ñkanubọk ete etre utom.

24 Ke ntom utom adimaana mbọp ufọk Abasi ke Yeruselem amaatuak ada, tutu ayọhọ isua iba ke ini ukara Dariọs Adidem Pesia.