1 Akema prọfed Hakai ye prọfed Sakaraiya, awo ubon Iddo, emaetañ prọfesi enọ mme Yuu ke Yuda ye ke Yeruselem ke anyịñ Abasi Isrel, a-akekarake ammọ. 2 Ndin Serubabel ayịn Seltiel ye Yọsua ayịn Yosadak emaetọọñọ utom adimaana mbọp ufọk Abasi ke Yeruselem. Ndin mme prọfed Abasi emaeba ye ammọ, adinọ ammọ unwam.

3 Ke ini ado Tatenai, adaukara ke Edem Inyañ Yufretis, ye Seta-Bosenai ye mme nsaña ammọ emaekaa ebịne ammọ ekebịp ete, "Anie akinọọ ndufo adudu adimaana mbọp tembịd ami, adinyʌñ ñkweeñe anye?" 4 Ammọ ñko emaebịp ebo, "Mme anie awo edo mbon se inam utom ubọp ufọk ado?" 5 Ado anyen Abasi ammọ akesʌk akpeme mme ñkpisọñ mme Yuu, ke ntoro awo ikinyʌññọ ikpan ammọ adinam utom tutu eben etob esọk Dariọs, tutu enyʌñ ebọ ibọọrọ anye awette eto anye.

6 Anyem ado ñwedetob Tatenai, adaukara ke Edem Inyañ Yufretis, ye Seta-Bosenai ye mme nsaña ammọ, mme ikpọ akama utom Edem Inyañ Yufretis ekenọọhọ esọk Dariọs. 7 Ñwed se ammọ ekenọọ akebo ntom:

Adidem Dariọs:

Ekọọm emem.

8 Yak adidem adiọọñọ abo ke ñnyịn imaikaa efaak abio ukara Yuda, ikiwuọ tembịd akwa Abasi. Mme awo ado esʌk ebọp ufọk ado ye mme ikpọ itiad enyʌñ edọñ mme eto ke mme ndibene. Ammọ etịñ anyen enam utom ado, utom ado anyʌñ anekke akaa iso usọp-usọp ke ubọk ammọ.

9 Ñnyịn imaibịp mme ñkpisọñ ammọ inyʌñ ibo ammọ ite, "Anie awo ikinọọ ndufo adudu adimaana mbọp tembịd ami ñnyʌñ nnam anye mmaa?" 10 Ñnyịn imainyʌñ ibịp ammọ mme anyịñ ammọ, nọ ñnyịn ikpiwet anyịñ mme adaaha ammọ unọ fiin nọ afo adiọọñọ.

11 Ibọọrọ se ammọ ekinọọ ñnyịn ado ami:

"Ñnyịn ido nditọufọk Abasi anyọñ ye isọñ, ndin ñnyịn itịmme ibọp tembịd ake emaekebọbọp ke mme uwak isua ke edem, anye ake ekamba adidem ke Isrel amaakebọbọp ama. 12 Ado sia mme eteete ñnyịn emaeyat Abasi anyọñ esịd, anye amaayaak ammọ asịn ke ubọk Nebukadnesa, awo Kald, adidem Babilọn, a-akebiatta tembịd ami anyʌñ asịññe mbon ado anọ yak eka Babilọn.

13 "Ado ke akpa isua ukara Sairọs adidem Babilọn, Adidem Sairọs amaanọ ewʌhọ yak emaana ebọp ufọk Abasi ami. 14 Anye ke idem amọ amaasịññe ato tembịd ke Babilọn mme ñkpọ ake kold ye silfa ke ufọk Abasi, a-Nebukadnesa akekoonoke ke tembịd ke Yeruselem aben adi tembịd ke Babilọn. Ndin Adidem Sairọs amaayak ammọ anọ awodeen e-ekoodo Sesbasa, a-anye akemekke nte adaukara, 15 ndin adidem Sairọs amaabo anye ate, ‘Koono mme ñkpọ ami nyʌñ kedọñ ammọ ke tembịd ke Yeruselem. Ñko nyʌñ maana bọp ufọk Abasi ke akaan itie amọ.’

16 "Ke ntoro ke Sesbasa ami akedi adisịn itiad idakisọñ ufọk Abasi ke Yeruselem. Tọọñọ ke usen ado tutu mfịn, esʌk eba ke adibọbọp anye, ado utom ikweeñeke diin."

17 Do ndin, adieke adidem amaaha, yak anam nduuñọ ke mme ñwed ekpurikpu ubọọñ esed ake Babilọn nọ ese me Adidem Sairọs, ke akpanikọ, amaanịm ewʌhọ abo yak emaana ebọp ufọk Abasi ami ke Yeruselem. Amaanam yak adidem anọ se anye abiide abaña ñkpọ ami isọk ñnyịn.