Mateus 25

Ñke a-Abañake mme Ekpad Kold

14 "Ñko, abioubọọñ hefịn adiiba nte awo a-akaaha isañ, a-akekoodo mme nditọufọk amọ anyʌñ ayaak inie amọ anọ ammọ. 15 Awo keed, anye amaanọ ekpad kold ition, mfen ekpad iba, ayọhọ ita ekpad*25:15 Ke usem Krik talen ition … talen iba … talen keed; ñko ke afịd ñke ami; talen keed akedo akʌk utom usen debra ke isua edịb. keed, kwa awo naña ukeme ammọ ado. Ndin anye amaadakka akaa isañ. 16 Awo a-akebọọhọ ekpad kold ition amaasọp aketọọñọ ubịn udua, anyʌñ anie ekpad kold ition mfen nte udod. 17 Awo a-akebọọhọ ekpad iba, amaanyʌñ anam udod ekpad iba ke ukem usʌñ ado. 18 Ado awo a-akebọọhọ ekpad keed, amaakaa aketịppe isọñ adịp akʌk eteufọk amọ.

19 "Ke anyan ini amaakeboiyo, eteufọk ammọ amaato adi, adiduuñọ ñwed ibad akʌk ye ammọ. 20 Awo a-akebọọhọ ekpad kold ition amaaben ekpad ition mfen adi anyʌñ adibo ate, ‘Ete, afo akennọ ekpad kold ition, se ition mfen se ami ñkenwana mi.’

21 "Eteufọk amọ amaabọọrọ, ‘Amenam afọn, eti anam akpanikọ ayịnufọk! Afo amenam akpanikọ ke ntək ñkpọ; ami ñyaunọ fiin se ikpon ikan ami. Di diwana ke inemesịd eteufọk mfo!’

22 "Awo a-akebọọhọ ekpad kold iba amaanyʌñ adi adibo, ‘Eteufọk, afo akennọ ekpad kold iba, se iba mfen se ami ñkenwana mi.’

23 "Eteufọk amọ amaabọọrọ, ‘Amenam afọn, eti anam akpanikọ ayịnufọk! Afo amenam akpanikọ ke ntək ñkpọ; ami ñyaunọ fiin se ikpon ikan ami. Di diwana ke inemesịd eteufọk mfo!’

24 "Ke akpatre, awo e-ekenọọhọ ekpad kold keed amaawuọ adi adibo eteufọk ate, ‘Ete, ami mmaadiọọñọ ke afo ado akpọsọñ awo a-adọkkọ ke itie afo umuutọọhọ, anyʌññọ akoono ke itie afo umuukubonoke. 25 Ke ntoro, ami mmaakop ndịk, ndin ami mmaakaa ñkedịp ekpad kold mfo ke isọñ. Se anye mi, ake mfo kedo, mbọ do.’

26 "Ado eteufọk amọ amaabọọrọ anye ate, ‘Afo ibak, ifu ayịnufọk! Awuọ afo amaadiọọñọ ke ami nsidọk ke itie a-ami mmeñketọọhọ ñnyʌñ ñkoono ke itie a-ami mmeñkebonoke? 27 Ndin akpekena afo aben akʌk mmi akenọ mme akamakʌk; a-ami ntooho ndi mi ñkpaabọ akʌk mmi ye udod.

28 " ‘Ndin idahami, bọ anye ekpad kold ami kappa nọ awo se inie ekpad duob. 29 Sia awo akeedodo a-anieghe ñkpọ eyaenọ anye awak akan ado, ñko anye ayaanie akan se ikem anye. Awo akeedodo idiinieghe ñkpọ, eyaebọ etək se anye anenie. 30 Amaado ayịnufọk i-imiifọnnọ ke usʌñ ndomokeed, top anye duọọk ke anwa, ke ekịm, ke itie ntuaña ye ntaeded ediiba.’