1 Kʌkkọ mme usʌñ mfo, Lebanọn,

nọ ikañ adʌk ata mme eto sida mfo!

2 Sio ñkpo ayịd, afo yunipa, sia mme sida eduọññọ;

esobo mme ikpọ eto ubọọñ!

Isio ñkpo ayịd, ndufo mme eto afriyo ke Basan;

e-etem awọk akai esio!

3 Ikpañ utọñ ikop ayịd mme akpemeedọñ;

sia e-esobo mme nti awawa mbid ammọ!

Ikpañ utọñ ikop uyio ñkuun mme ekpe;

sia e-esobo nsek awọk ikọd Yọdan!

4 Se Abọọñ Abasi mmi atañ ado ami: "Bọọk ufene e-enịmme adiwowot. 5 Awo imiaha mbon se idep ammọ iwot ufen. Mbon se inyam ammọ ete, ‘Ekọọm anie Abọọñ, sia ami mmemọinyọ.’ Mme andikpeme ammọ inyʌññọ itua ammọ mbọm. 6 Sia ami ndiinieghe mbọm aba nnọ mbon isọñ ami," Abọọñ atañ. "Ami ñyaakappa afịd mme awo ami nsịn ke ubọk mme mbọhọidʌñ ammọ ye adidem ammọ. Ammọ eyaesobo isọñ ado, ami ndiinyʌññọ ñnyaaña awo ndomokeed nsio ke ubọk ammọ."

7 Ndin ami mmaabọọk ufene e-ekenịmme enọ adiwowot, akpan-akpan mme ufene e-ekekuudo. Ndin ami mmaaben esañ iba ñnyʌñ ñkoot keed Mfọn ndin ñkoot anye ako Ndiana, ndin ami mmaabọọk ufene ado. 8 Ami mmaabịne mme akpemeedọñ ita ado ke ufañ afiọñ keed.

Ufene ado emaensua miin, ammọ ñko emaeñkak miin adikama; 9 ami mmaanyʌñ mbo nte, "Ami ndiidooho akpemeedọñ ndufo aba. Yak andibiikpa akpa, andibiisobo asobo. Yak mbon se isʌhọ eta abʌkidem emọ-emọ."

10 Akem ami mmaaben esañ mmi e-ekoodo Mfọn ñnyʌñ mbuuñ anye, nọ abiat edioomo a-ami ñkenamma ye afịd mme idịd. 11 Emaebiat edioomo ado ke usen ado, ndin mbon ukuud ke atu mme ufene e-ekenseeghe miin emaediọọñọ ke ami ñkenam uyio Abọọñ.

12 Ami mmaadọkkọ ammọ nte, "Adieke ndufo ekereke ke anekke afọn ye ndufo, iñkpe miin akʌk mmi; adieke imiifọnnọ, idiañña idem." Ndin ammọ emaeñkpe miin mbaak silfa edịb mme duob.

13 Akem Abọọñ amambo miin, "Top anye nọ abodñkpọ", nsọñudua ekọmudua a-ammọ ekedotto ke iwuod mmi! Ndin ami mmaaben mbaak silfa edịb mme duob ado ntop ammọ nnọ abodñkpọ ke ufọk Abọọñ.

14 Ndin ami mmaabuuñ ayọhọ esañ mmi iba e-kekoodo Ndiana, mbiat udʌk imaan ke ufọọd Yuda ye Isrel.

15 Akem Abọọñ amambo miin, "Maana ben ñkpọ unam utom ndisịme akpemeedọñ. 16 Sia ami ñyaasio akpemeedọñ ke isọñ ami i-imiiduakka idọñ anyen mbaña se isop, me adise ñyịn edọñ, me adikọk unan mbon e-enieghe unan, me adinọ andinie nsọñidem ndidia, ado adiita unam edọñ a-anekkeke ayaiya idem, awai mme ñkpad ammọ afep.

17 "Adọdiọọk anọ idiọọk akpemeedọñ,

a-asaanake udịmedọñ ayaak!"

Yak akañkañ akpịkke anye ubọk anyʌñ akịm anye anyen ubọk nnasia!

Yak ubọk amọ akpa afịd-afịd,

yak anye aforo nnan ataa afịd-afịd ke anyen ubọk nnasia amọ!