* 1 Akem ami ñkese, se ke iso mmi akedo awodeen a-akekamake udʌk udomoñkpọ ke ubọk amọ. 2 Ami mmaabịp anye mbo, "Afo akaa uke?"

Anye amambọọrọ ate, "Ñka adidomo Yeruselem, adidiọọñọ ukpa ye unyọọñ amọ."

3 Ke enyere a-aketañña ikọ ye ami amaakenyọñ, enyere mfen amaadisoobo anye 4 anyʌñ abo anye ate: "Feghe, ke dọkkọ akparawa ado bo, ‘Yeruselem adiido abio i-idiinieghe mme ndibene ato ke uwak ibad mme awo ye mme unam se iba ke esịd. 5 Ndin ami ñko ke idem mmi ndiido ndibene ikañ ñkanna anye,’ Abọọñ atañ, ‘ndin ami ndiido ubọọñ ke esịd amọ.’

6 "Di! Di! Feghe wuọ ke isọñ adoro," Abọọñ atañ, "sia ami mmisuan ndufo ke iso afịm anyọñ mbeñ inaañ," Abọọñ atañ.

7 "Di, Saiyọn! Feghe bọkkọ, afo a-adʌññọ ke Adiaha Babilọn!" 8 Sia ami ado se Abọọñ Andikponñkan atañ: "Akem Abọọñ Ubọọñ andọñ miin anọ mme idịd se ikibịme ndufo, sia ake awo itotuuk ndufo, atuuk mbon se anye anekke ama. 9 Ke akpanikọ ami ñyaasio ubọk mmi ñnyan ammọ nọ mme ifʌn ammọ ebịme ammọ. Ndin afo ayaadiọọñọ ke Abọọñ Andikponñkan ake andọñ miin.

10 "Ibọñ ñkpọ inyʌñ idaara, Adiaha Saiyọn. Sia ami nsʌk ndi, ami ndiinyʌñ ndʌñ ke atu ndufo," Abọọñ atañ. 11 "Uwak mme idịd eyaedidiana ye Abọọñ ke usen ado nọ ammọ ekappa edo ikọd mmi. Ami ñyaadʌñ ke atu ndufo, ndin afo ayaadiọọñọ ke Abọọñ Andikponñkan andọñ miin inọọ ndufo. 12 Abọọñ ayaaben Yuda nte udeeme amọ ke adisana isọñ, ndin ayaamaana amek Yeruselem. 13 Afịd uduud awo, idop uyio ke iso Abọọñ sia anye adakka ada ke idem amọ ato ke adisana itie idʌñ amọ."