1 Ikọ Abọọñ Andikponñkan amaadinsịm miin.

2 Se Abọọñ Andikponñkan atañ ado ami: "Ami mmefịbe ekamba ufịb mbaña Saiyọn; ke ataa ifiobesịd ke ami mfịbe ufịb mbaña anye."

3 Se Abọọñ atañ ado ami: "Ami ñyaatịmme ñkaa Saiyọn ñnyʌñ ndʌñ ke Yeruselem. Ndin ediikoot Yeruselem Abio Akpanikọ, ñko ediikoot abod Abọọñ Andikponñkan Adisana Abod."

4 Se Abọọñ Andikponñkan atañ ado ami: "Ini keed mfen mme ñkaan ideen ye ñkaan ibaan eyaetie ke mme efaak Yeruselem, ammọ keedekeed ye esañ ke ubọk ato ke ntak isua emana ammọ. 5 Mme efaak ke abio eyaeyọhọ ye nditọ ideen ye ibaan e-ebreke mbre."

6 Se Abọọñ Andikponñkan atañ ado ami: "Akeme adido nte ñkpọ ñkpaidem anọ mbon ñyọhọnsʌhọ ibon ami ke ini ado, ado nte adiido ñkpọ ñkpaidem innọ miin?" Abọọñ Andikponñkan atañ.

7 Se Abọọñ Andikponñkan atañ ado ami: "Ami ñyaanyaaña ikọd mmi nsio ke ubọk mme abio usakkautịn ye usobutịn. 8 Ami ñyaakoono ammọ ñnyọñ nọ edidʌñ ke Yeruselem; ammọ eyaedo ikọd mmi, ñko ami ñyaanam akpanikọ ñnyʌñ ñwọt ammọ eti ido nte Abasi ammọ."

9 Se Abọọñ Andikponñkan atañ ado ami: "Ikop mme ikọ ami, ‘Iyak ubọk ndufo asọñ nọ ekan ebọp tembịd ami ema.’ Ukem ami ke mme prọfed e-ekebaaha ke ini e-ekesịnne itiad idakisọñ ufọk Abọọñ Andikponñkan eketañ. 10 Mbemiso ini ado awo ikisikpeeghe mbon awo akʌk utom usen me mme unam se ekedat enam utom. Ñko mme asua ikisiyakka mme awo efrọ ke ifuuro eka ndubeghe ammọ, sia ami mmaanam mme awo ekappa enwana ye mbọhọidʌñ ammọ. 11 Ado idahami ami ndiinamma ye ñyọhọnsʌhọ ibon ami naña ñkenam ke esed," Abọọñ Andikponñkan atañ.

12 "Ñkpasi ado ayaakọt afọn, eto fain ayaanwịm mfịd amọ, isọñ ayaanọ mbunwịm amọ, mme anyọñ eyaenyʌñ enọ mbara ammọ. Ami ñyaanọ mme ñyọhọnsʌhọ ibon ami afịd mme ñkpọ ami. 13 Kpa naña ndufo Yuda ye Isrel ekedo isuuñọ ke atu mme idịd, kpa ntoro ke ami ndiinyaaña ndufo, ndin ndufo eyaedo adidiọñ. Ikiifeghe ndịk, ado iyak ubọk ndufo asọñ."

14 Se Abọọñ Andikponñkan atañ ado ami: "Kpa naña ami ñkebiere adiben nsobo isọk ndufo, ñnyʌññọ ntua mbọm ke idaha a-mme eteete ndufo ekeñyatta miin esịd," Abọọñ Andikponñkan atañ, 15 "ami mmebiere adimaana nnam eti ñkpọ nnọọ Yeruselem ye Yuda. Ikiifeghe ndịk. 16 Mme ñkpọ a-anaaha nte ndufo enam edo ami: Itañ akpanikọ inọ emọ-emọ, inyʌñ ibiere ikpe ke akpanikọ ye unen ke mme esob ndufo; 17 ikiidioomo idiọọk ibaña emọ-emọ, ikiima adinwọñọ ñkpọ ke nsu. Ami nsasua afịd mme ñkpọ ami," Abọọñ atañ.

18 Ikọ Abọọñ Andikponñkan amaadinsịm miin.

19 Se Abọọñ Andikponñkan atañ ado ami: "Mme utreudia ayọhọ afiọñ inaañ, ition, itiaba ye duob eyaekappa edo ini idaara ye inemesịd ye usọrọ enọ Yuda. Ke ntoro ndufo ima akpanikọ ye emem."

20 Se Abọọñ Andikponñkan atañ ado ami: "Uwak mbon awo ye mme andidʌñ ke uwak abio ediisʌk idedi, 21 ñko mme andidʌñ ke abio keed eyaekaa ke abio mfen enyʌñ ekebo ete, ‘Yak ñnyịn ika ini keed ikikpeiye Abọọñ inyʌñ iyem iso Abọọñ Andikponñkan. Ami ke idem mmi ñyaakaa.’ 22 Ñko uwak awo ye mme akpọsọñ idịd eyaedi ke Yeruselem ediyem iso Abọọñ Andikponñkan enyʌñ ekpeiye anye ubọk."

23 Se Abọọñ Andikponñkan atañ ado ami: "Ke mme usen ado awo duob ke afịd mme usem mme idịd eyaesọñ emʌm kpa Yuu keed ke mben afọñ amọ ekama enyʌñ ebo, ‘Yak ñnyịn isaña ye afo, sia ñnyịn imikop ke Abasi mmọdo ye afo.’ "