1 Prọfesi a-atooho Abọọñ a-abañake Isrel.

Abọọñ, a-atatta mme hefịn, a-asịnne itiad idakisọñ ederimbod, a-anyʌññọ abot sịbidịd awo asịn awo ke idem, abo ate: 2 "Ami ñyaanam Yeruselem aba nte kọọb a-adiinam mme idịd ke ñkanñkʌk eba ke ñkpaidem. Mbon ekọñ eyaekanna Yuda ekʌk kpa ye Yeruselem. 3 Ke usen ado, ke ini afịd mme idịd ke ederimbod emaewuọ edibono keed edinwana ye anye, ami ñyaanam Yeruselem ado itiad a-afịd idịd imiidiikanna idịppe. Afịd mbon se inwana adidịppe anye eyaedat unan. 4 Ke usen ado ami ñyaatọ afịd mme enañmbakara ñkpeñanyeñ ñnyʌñ ntọ mbon se iwat idaad," Abọọñ atañ. "Ami ñyaatat anyen mmi nse Yuda, ado ami ñyaatịp anyen afịd mme enañmbakara mme idịd. 5 Ndin mme aduuk ke Yuda eyaebo ke esịd ammọ ete, ‘Mbon Yeruselem e-ekop adudu, sia Abọọñ Andikponñkan ado Abasi ammọ.’

6 "Ke usen ado ami ñyaanam mme aduuk ke Yuda eba nte ebohoikañ ke anyọñ abek ifia, nte edemeikañ ke ufọọd abek nsaad mfañ. Ammọ eyaesobo afịd mme idịd ke ñkanñkʌk ke nnasia ye ke ufiin, ado Yeruselem adiisʌk idada itie keed ke itie amọ.

7 "Abọọñ ayaabemiso anyaaña mme itie idʌñ Yuda, mbaak ukpono ubon ufọk Defid ye mme andidʌñ ke Yeruselem adikpon akan ake Yuda. 8 Ke usen ado Abọọñ ayaakwe mbon se idʌñ ke Yeruselem, nọ andikpịññe ñkan ke atu ammọ aba nte Defid, ñko ubon Defid adiiba nte Abasi, nte enyere Abọọñ abem ammọ iso. 9 Ke usen ado ami ñyaawuọ nda nsobo afịd mme idịd e-enwanake ekọñ ye Yeruselem.

10 "Ndin ami ñyaanwañña sịbidịd mfọn ye ñkpeubọk nnọ ufọk Defid ye mme andidʌñ ke Yeruselem. Ammọ eyaense miin, anye a-ammọ ekekịmme, ndin ammọ eyaefʌhọ ebaña anye nte awo afʌhọ abaña ukweeñe ayịn keed, enyʌñ enekke efʌhọ anye nte awo afʌhọ abaña ñkpa akpa ayịn. 11 Ke usen ado ntuaña ke Yeruselem ayaakpon nte ntuaña Hadad Rimọn ke unaisọñ Mekido. 12 Isọñ ayaafʌhọ, ke aduuk ke aduuk, ye ibaan ammọ ke idem ammọ: aduuk ufọk Defid ye ibaan ammọ, aduuk ufọk Natan ye ibaan ammọ, 13 aduuk ufọk Lifai ye ibaan ammọ, aduuk ufọk Simei ye ibaan ammọ, 14 ye afịd mme aduuk mfen ye ibaan ammọ.