1 Ami mmaamaana nse, se ufọfuurọ ikpañwed ke iso mmi.

2 Enyere ado amambịp abo, "Nsoo ke afo akịt?"

Ami mmaabọọrọ anye mbo, "Ami ñkịt ufọfuurọ ikpañwed, anyọọñọ anyan kubid edịb anyʌñ anwaña kubid duob* ke ukpa."

3 Akem anye amambo miin ate, "Anye ami ado isuuñọ a-awuọhọ akara afịd isọñ; sia se anye atañ ke ñkañ keed ado ke eyaebịne afịd inọ esio, ndin se anye atañ ke ñkañ uko ado ke eyaebịne afịd awo se inwọñọ ñkpọ ke nsu esio. 4 Abọọñ Andikponñkan abo, ‘Ami ñyaasio isuuñọ mfep, ndin anye ayaadʌk ufọk awo inọ ye ufọk awo a-anwọñọke ñkpọ ke anyịñ mmi ke nsu. Anye ayaasʌhọ ke esịd ufọk ado anyʌñ abiat anye afịd-afịd, asobo eto ye itiad.’ "

5 Ndin enyere a-aketañña ikọ ye ami amaawuọ adi anyʌñ adimbo, "Dịppe anyen mfo ke anyọñ nyʌñ se se iwuọ ida ami."

6 Ami mmaabịp mbo, "Nsoo ido ado?"

Anye amaabọọrọ, "Akpasa ke ado." Ndin anye amaamaana adian abo, "Anyem ado ukwaññkpọ mme awo ke afịd isọñ."

7 Akem, emaefʌkkọ ukʌb ñked esio, ndin se awonwaan mi nte atie ke esịd akpasa! 8 Anye amaabo ate, "Anye ami ado ibak," enyere ado amaanyʌñ anək awonwaan ado asịn ke akpasa anyʌñ akʌp anye ke ukʌb ñked.

9 Ndin ami ñkedịppe anyen ke anyọñ, mmaakịt ibaan iba ke iso mmi, e-ekekamake afịm ke mba ammọ! Ammọ ekenie mba nte ikpañinyañ, ndin ammọ emaebenne akpasa ado ke ufọọd anyọñ ye isọñ.

10 Ami mmaabịp enyere a-aketañña ikọ ye ami mbo, "Ammọ eben akpasa ado eka uke?"

11 Anye amambọọrọ, "Eben eka idịd Babilọn nọ ekebọp ufọk enọ anye. Emaebọp ufọk ado ema, eyaenịm akpasa ado ke itie amọ."