प्रस्थान 2

5 तब फारोकी छोरी नुहाउनलाई नील नदीमा आइन्, र तिनका दासीहरू नदीका किनारतिर हिँड्दैथिए। तिनले काँसघारीहरूका बीचमा टोकरी देखिन्, र आफ्नी दासीलाई त्यो लिन पठाइन्। 6 जब तिनले खोल्दा त्यस बालकलाई देखिन्; तब त्यो बालक रोइरहेको थियो, र उसप्रति दयाले भरिएर तिनले भनिन्, "यो त कुनै हिब्रूको बालक हो।"

7 तब बालककी दिदीले फारोकी छोरीलाई भनिन्, "के यस बालकलाई हेरचाह गर्नका निम्ति म गएर हिब्रू स्त्रीहरूमध्ये कुनै एउटी धाईलाई तपाईंको निम्ति बोलाऊँ?"

8 तब फारोकी छोरीले जवाफ दिइन्, "हुन्छ, जाऊ।" अनि ती केटी गएर त्यस बालककी आमालाई लिएर आई। 9 फारोकी छोरीले तिनलाई भनिन्, "यस बालकलाई लैजाऊ, र मेरा निम्ति दूध खुवाऊ र हेरचाह गर। म तिमीलाई ज्याला दिनेछु।" यसकारण त्यस स्त्रीले बालकलाई लिएर दूध खुवाउने गरिन्।