यर्मिया 47

पलिश्तीको बारेमा सन्देश

1 फारोले गाजा सहरमाथि आक्रमण गर्नुअगि पलिश्तीहरूको विषयमा यर्मिया अगमवक्ताकहाँ आएको याहवेहको वचन यही हो:

2 याहवेह यसो भन्‍नुहुन्छ:

"हेर, उत्तर दिशामा पानीका छालहरू कसरी उठिरहेका छन्;

तिनीहरू डुबाउने बाढीको भलजस्तै हुनेछन्।

त्यसले जमिन र त्यसमा भएका सबै थोकलाई

सहरहरू र त्यसमा बस्‍नेहरू सबैलाई डुबाउनेछ।

मानिसहरू सहायताको निम्ति चिच्याउनेछन्;

देशमा बस्‍नेहरू सबै विलाप गर्नेछन्,

3 दौडिरहेका घोडाहरूका खुरहरूको आवाजमा

वेगसित दगुर्ने शत्रुहरूका

रथहरूका चक्‍काका गडगडाहट सुनेर

आमाबुबाहरू आफ्ना छोराछोरीलाई सहायता गर्न फर्केर हेर्नेछैनन्;

तिनीहरूका हातहरू लुला हुनेछन्।

4 किनकि सबै पलिश्तीहरूलाई

नाश गर्ने दिन आएको छ,

टायर र सीदोनलाई सहायता दिन सक्ने

बाँचेकाहरू सबैलाई नष्‍ट गर्ने दिन आएको छ।

याहवेहले कप्‍तोरका*47:4 अर्थात्, क्रेट किनारमा

बाँकी रहेका सबै पलिश्तीहरूलाई नष्‍ट गर्न लाग्नुभएको छ।

5 गाजाले शोकमा आफ्नो कपाल खौरनेछ;

अश्कलोन मौन हुनेछ।

हे तराईका अवशेष हो,

तँ कहिलेसम्म आफूलाई चोट पारिरहन्छस्?"

6 रुँदै तैँले भन्‍नेछस्,

" ‘ओह, याहवेहको तरवार, तँ कहिले शान्त हुन्छस्?

ए तरवार, तँ आफ्नो म्यानमा फर्किजा,

र शान्तसँग बस्।’

7 तर यो कसरी शान्त बस्‍न सक्छ?

किनकि याहवेहले यसलाई

अश्कलोन र समुद्री किनारको विरोधमा

आक्रमण गर्न आदेश दिनुभएको छ।"