1 Gyisɛse akee bule ɛrɛlɛ ɛhye hilele ye ɛdoavolɛma ne mɔ: "Nrenyia sukoavolɛ bie bɔle awie ɛkpa kɛ ɔranlea ye gyima zo ɔmaa ye. Yeangyɛ biala yɛɛ bɛdoanle ye bɛhilele ye kɛ ɔnli nɔhalɛ a. 2 Ɛhye maanle ɔvɛlɛle ye na ɔbizale ye kɛ, ‘Na duzu ati a mete edwɛkɛ ɛtane zɛhae wɔ ɛ nwo ɛ? Ka ɛ nwo babu wɔ gyimanleanlɛ ne azo mgbonda kile me, ɔluakɛ mebaye wɔ ali ɛnɛ ala.’

3 "Ɛhye maanle ɛkpavo ne ati zile aze na ɔzele ɔ nwo kɛ, ‘Na kɛ mekɛyɛ ye ɛ? Mame ɛhye mɔɔ me nwo ɛnyɛ se wɔ akumadolɛ nwo a, na eza asɛlɛ noko yɛ me nyiane. 4 Ɔnyɛ ɛhwee! Meze mɔɔ mebayɛ a, amaa saa ɔye me ali bɔbɔ a meanyia awie mɔ dɔɔnwo anlea me a!’

5,6 "Akee ɔvɛlɛvɛlɛle menli mɔɔ tua ɔ menle ne kakɛ la ngoko ngoko kɛ bɛranwu ye na bɛva nwolɛ adwenle. Ɔbizale mɔɔ lumua la kɛ, ‘Bosea ɛzɛ a ɛbɔle ye wɔ me menle ɛkɛ a?’

"Nrenyia ne buale ye kɛ, ‘Metua ye nwole nzuzulɛ apenle nsa ɛya nna.’

"Na ɔzele ye kɛ, ‘Ɔle zɔ. Nwolɛ daselɛlilɛ kɛlata ɛne. Die na tete yemɔ anu gua ye lɔ, na kɛlɛ wɔ kakɛ ne foa ko ala wɔ kɛlata fofolɛ zo!’

7 "Eza ɔbizale mɔɔ doa ye la kɛ, ‘Na wɔmɔ noko ɛ? Ɛzɛ a ɛtua ye a?’

"Ɔdaye noko ɔbuale ye ɔzele kɛ, ‘Metua ye esamo ahodoku apenle ko.’

"Na ɔzele ye kɛ, ‘Die kɛlata dɛba ye tete nu, na kɛlɛ ahodoku ɛya mɔtwɛ!’

8 "Ɛhye yɛle gyimamenle ne ahomeka totohyia, ɔluakɛ ye ɛkpavonli ne ze nrɛlɛbɛ wɔ ye ɛbɛlabɔlɛ nwo. Na amgba noko aleɛabo amra ze bɛ gyima nwo nrɛlɛbɛ tɛla adenle mɔɔ Nana Nyamenle menli deɛ ne pe zo bɔ bɛ ɛbɛla la. 9 Akee Gyisɛse hɔle zo zele bɛ kɛ, ɛhye ati memaa bɛade kɛ, anrɛɛ bɛva bɛ ninyɛne mɔɔ bɛlɛ ye wɔ ewiade anu la bie bɛyɛ ahunlunyele, amaa mekɛ mɔɔ ɔkɛwie la bɛalie bɛ bɛ sa amu nwiɔ, wɔ bɛ azua ne mɔ mɔɔ ɛmbɔ aze ɛlɛ la anu. 10 Mɔɔ mekile la a le kɛ, saa wɔ nɔhalɛlilɛ da ali wɔ ninyɛne ngyebangyeba nwo a, yɛɛ ɔkile wɔ nɔhalɛlilɛ wɔ mɔɔ sonle bolɛ noko la anwo a. 11 Na kakye kɛ, saa wɔanli aleɛabo agyapadeɛ nwo nɔhalɛ a, awie biala sulo kɛ ɔkɛva anwuma maanle ɛdeɛ ne mɔɔ anwo hyia kpalɛ ne la ɔkɛwula ɛ sa nu. 12 Yɛɛ saa wɔanli awie mɔ ezukoa nwo nɔhalɛ noko a, bɛnrɛva mɔɔ le ɛdawɔ mumua ne wɔ deɛ la bɛnrɛwula ɛ sa; bɛbasisi ɛdawɔ noko wɔ wɔ deɛ ne anwo.

13 "Dasanli biala ɛngola ɛnzonle menlelɛ nwiɔ ɛmmaa ɔnyɛ boɛ. Saa ɔba ye zɛ a, ɔbahulo ko edwɛkɛ na yeakpo ko. Ɛhye ati ɛnrɛhola ɛnrɛzonle Awulae Nana Nyamenle nee ezukoa noko."

14 Falasiima ne mɔ mɔɔ ezukoa ala a bɛkulo la zile ye amgbu wɔ ɛhye mɔɔ ɔhanle la anwo.

15 Na ɔzele bɛ kɛ, "Bɛmɛ mɔ menli anyunlu yɛɛ bɛyɛ kɛ asɛɛ bɛ nwo te a, na Nana Nyamenle noko anye dua bɛ ahonle evinli ne mɔ anu. Bɛ mɛlɛbɛla ne maa menli di bɛ eni, noko akee wɔ Nana Nyamenle anyunlu, yemɔ ɔle kyibadeɛ. 16 Mekɛ mɔɔ ɛnee Dwɔn Sɔnevolɛ ne ɛtɛbale la, ɛnee Mosisi mɛla ne nee ngapezoma edwɛkɛ ne ala a bɛdi zo a. Mɔɔ Dwɔn Edwɛkpa ne ralale ye ali kɛ Awulae Belemgbunli maanle ne ɛbikye la, menli dɔɔnwo ne ala nriandinle kɛ bɛkɔ maanle zɔhane anu. 17 Noko ɛhye ɛngile kɛ Mɛla ne azo ɛde. Ɔtɛgyi ɛkɛ ne kpundii kɛ anwuma nee aze la.

18 "Zɔhane ati awie biala mɔɔ kɛbɔ ɔ ye ewuole, na ɔkɛgya fofolɛ la ɛnee yezɛkye agyalɛ; yɛɛ awie biala noko mɔɔ kɛgya raalɛ mɔɔ bɛbɔ ye ewuole la, ɛnee yedo agyalɛ mɛla."

19 Eza Gyisɛse zele kɛ, "Nrenyia sukoavolɛ bie wale ɛkɛ. Alehyenlɛ biala ɔbɔ ye aboka ɔgua nu, na ɔto ɛkponle ɔdielie ɔ nye. 20 Nrenyia ehyianli bie mɔɔ bɛfɛlɛ ye Lazalɛse mɔɔ nganlɛ ɛdudu ye la noko ɛnee bada nrenyia sukoavolɛ ne ɛbolɔnsane ne abo, amaa saa nrenyia sukoavolɛ ne aleɛ ne bie kpokpo gua aze a, yeasesa yeali. 21 Mekɛ mɔɔ ɔsesa mgbokpoleka ne yeali la, ɛnee ahwea noko ɛlɛtafetafe ye nganlɛ ne mɔ anu. 22 Ɔrale ye kɛ, Lazalɛse ehyiavolɛ ne wule, na anwumabɔvolɛma ne mɔ ramaanle ye zo hɔdole Ebileham akɛnra nu. Nrenyia sukoavolɛ ne ɔdaye noko ɔwule na bɛziele ye, 23 na ye ɛkɛla ne hɔle abɔnsam sua zo. Mekɛ mɔɔ ɔnwu amaneɛ la, ɔnwunle kɛ Lazalɛse noko nee Ebileham ɛlɛdi fɛlɛko wɔ moamoa nehane.

24 "Na ɔdeanle nu ɔzele kɛ, ‘Egya Ebileham, nwu me anwunvɔne! Soa Lazalɛse maa ɔva ɔ sa ɛrɛlɛsɛka mgbane bɔbɔ ɔbɔ ye nzule nu ɔva ɔrape me tafinlima azo ɔmaa me ahonle ɛnlu fɔɔnwo, na melɛnwu amaneɛ wɔ sendɔlɛra ye anu!’

25 "Ebileham buale ye zele kɛ, ‘Ralɛ, kakye kɛ mekɛ mɔɔ ɛde aze mɔɔ ɛdi fɛlɛko la, ɛnee Lazalɛse noko ɛlɛdi ehyia nee nyane, Ɔti ɛnɛ ɔdaye noko ɔ rɛle ɛkyekye wɔ ɛke, yɛɛ ɛdawɔ noko ɛlɛnwu amaneɛ a. 26 Eza yeanga ye zɔ noko, kuma kulongulo bie la yɛ nee wɔ avinli mɔɔ ɔlua zo awie vi ɛke ba lɔ a ɔnyɛ boɛ, yɛɛ awie noko vi lɔ ba ɛke a ɔnyɛ boɛ a.’

27 "Akee nrenyia sukoavolɛ ne buale ye zele kɛ, ‘Ao, Egya Ebileham, mebodo wɔ, soa ye maa ɔhɔ egya sua nu, 28 na ɔhɔbɔ me mediema nnu ne kɔkɔ, ammaa bɛanyɛ mɔɔ mede aze la menyɛle la bie, na kenle bie bɛdabɛ noko bɛannwu amaneɛ kɛmɔ melɛnwu ye la.’

29 "Ebileham buale ye kɛ, ‘Dahuu bɛka Mosisi nee ngapezoma ne mɔ anwo edwɛkɛ bɛkile bɛ, ɔti maa bɛva bɛdu bɛ nwo folɛ.’

30 "Nrenyia sukoavolɛ ne buale ye zele kɛ, ‘Kyɛkyɛ, Egya Ebileham, ɔnrɛkputi bɛ ahonle bɔbɔ kɛ bɛkenga. Na emomu, saa awie vi ɛbolɔ ɛke kɔ kɔkakile bɛ a, yɛɛ bɛbanlu bɛ nwo a.’

31 "Na Ebileham zele ye kɛ, ‘Saa bɛandie Mosisi nee ngapezoma ne mɔ bɔbɔ a, ɛnee noko saa awie vi mɔwuamra anu dwazo kɔ bɔbɔ a, bɛnrɛdie ye.’ "