1 Mekɛ ɛhye anu, Siza Ɔgɛsetɛse, mɔɔ le Wulomuma belemgbunli ne la lile mɛla kɛ bɛdia menli mɔɔ wɔ maanle ne anu la amuala. 2 Zɛhae menlidianlɛ ne zile wɔ mekɛ mɔɔ ɛnee Koyeleneɛse a le amɛnlado wɔ Selea la.

3 Ɛnee ɔwɔ kɛ awie biala sia kɔ ye mgbanyima sua zo maa bɛkɛlɛ ye duma wɔ ɛkɛ. 4 Ɛhye maanle Dwosefi zile nu vile Nazalɛte, mɔɔ wɔ Galeli maanzinli nu la, kɛ ɔkɔ Bɛtelɛhɛm mɔɔ wɔ Dwudiya la, ɔluakɛ ɔvi Belemgbunli Devidi aako nee abusua ne anu. 5 Ɔ nee Male, mɔɔ ɛnee yeva ɔ sa yedo ɔ nwo zo, na ɔ ko ɛdu kpalɛ noko la hɔle.

6 Ɔti mekɛ mɔɔ bɛwɔ ɛkɛ ne la, ɔ ko hanle ye; 7 na ɔwole ye belamunli ralɛ ne, ralɛ nrenyia. Ɔvale fuazinli ɔkyekyele ɔ nwo, na ɔvale ye ɔdole ye wɔ mboane aleɛlilɛ ɛlɛka nu, ɔluakɛ bɛannyia ɛleka wɔ nyɛvosua ne anu.

8 Kenle ko ne nɔe ne, ɛnee mboaneneavolɛma bie ɛlɛsinza bɛ mboane wɔ ɛsɛlɛ zo lɔ wɔ namule ne anzi lɔ. 9 Na arɛlevilɛ nu ala, anwumabɔvolɛ bie vindele bɛ avinli, na Awulae anyunlunyia dale ɛkɛ ne wienyi. Bɛ ahonle dule somaa ne ala, 10 noko anwumabɔvolɛ ne zele bɛ kɛ:

"Bɛmmasulo! Ɔluakɛ melɛ amaneɛ fɛlɛko mebɛlɛ bɛ muala! 11 Ɛnɛ nɔe ye a bɛwo Ngoanedievolɛ ne, Sonla Ra ne, Awulae ne wɔ Bɛtelɛhɛm a. 12 Na bɛbanwu ye kɛ bɛkyekye ye wɔ fuazinli nu, na ɔla mboane aleɛlilɛ ɛlɛka nu!"

13 Na arɛlevilɛ nu ala, anwumabɔvolɛma ɛlɔne kpole bie rabokale anwumabɔvolɛ ko ne anwo, na bɛdole edwɛne bɛyele Awulae Nyamenle ayɛlɛ bɛzele kɛ:

14 "Nyilalɛ ɛha Nana Nyamenle wɔ anwuma anwuma, na wɔ azɛlɛ ye azo, anzondwolɛ ɛha bɛdabɛ mɔɔ bɛlɛ diedi anzɛɛ ɛhulolɛ kpalɛ wɔ ye nu la."

15 Mɔɔ anwumabɔvolɛ kpolane ne ziale hɔle la, mboaneneavolɛma ne mɔ zele bɛ nwo ngoko ngoko kɛ, "Ayi mɔ! Bɛrɛla bɛmaa yɛhɔ Bɛtelɛhɛm yɛhɔnlea nwanwanedeɛ ɛhye mɔɔ ɛzi, mɔɔ Awulae ɛye ɛhile yɛ la!"

16 Bɛvale ɛnriandinlɛ bɛhɔle sua ne azo na bɛhɔnwunle Dwosefi nee Male. Na bɛnwunle kakula ne kɛ ɔla mboane aleɛlilɛ ɛlɛka nu. 17 Mboaneneavolɛ ne mɔ hanle ninyɛne mɔɔ zile la, nee mɔɔ anwumabɔvolɛma ne mɔ rayele hilele bɛ wɔ kakula ɛhye anwo la amuala hilele awie biala. 18 Na awie biala noko mɔɔ dele zɛhae edwɛkɛ ne la, ɔyɛle ye azibɛnwo, 19 noko Male yemɔ ɔvale ɔ muala ɔziele ye ahonle nu na ɔdwenlenle nwolɛ.

20 Akee mboaneneavolɛma ne mɔ ziale bɛ nzi vale ayɛlɛyelɛ nee edwɛnedolɛ hanvole Nyamenle, wɔ mɔɔ bɛdele nee mɔɔ bɛnwunle ye, boka mɔɔ bɛhanle bɛhilele bɛ la amuala anwo.

21 Ɔlile kenle mɔtwɛ, mɔɔ bɛyiale nu wɔ kakula ne mrenyiazopɛlɛ nee ye dumadonlɛ nwo la, bɛdonle ye duma "Gyisɛse", kɛmɔ anwumabɔvolɛ ne hanle ye wɔ ɔ nwo kolaa na bɛanrenzɛ ye bɔbɔ la.

22 Na mɔɔ Male vile ye ɛdane wiele la, kɛmɔ Mosisi mɛla ne se la, bɛvale kakula ne bɛhɔle Gyɛlusalɛm kɛ bɛkaye ye bɛahile wɔ Asɔne Sua Kpole ne anu; 23 ɔluakɛ, Awulae Nyamenle mɛla ne se, "Kakula biala mɔɔ le belamunli ralɛ nrenyia la, ɔwɔ kɛ bɛtu ye bɛwula Awulae asa."

24 Zɔhane mekɛ ne, ɛnee deɛ mɔɔ bɛfa bɛbu zɛhae amaamuo ne la a le "aabule nwiɔ anzɛɛ mɔlɔnloma nwiɔ" kɛmɔ mɛla ne se la. 25 Kenle ko ne ala, ɛnee nrenyia bie mɔɔ vi Gyɛlusalɛm, mɔɔ bɛfɛlɛ ye Semɛyɔn la, wɔ Asɔne Sua Kpole ne anu. Nrenyia ɛhye le sonla atiakunlukɛnlɛma, ɔsulo Nana Nyamenle, na eza Sunsum Nwuanzanwuanza ne ɛyi ye tɛkɛɛ zɛhae, na eza noko ɔ nye la Ngoanedievolɛ ne ade dahuu. 26 Ɔluakɛ Sunsum Nwuanzanwuanza ne ɛye ɛhile ye kɛ ɔnrɛnwu Ewule kɔkpula kɛ ɔkɛnwu ye Belemgbunli ne mɔɔ Nana Nyamenle ɔdaye yeyila ye la. 27 Sunsum Nwuanzanwuanza ne noko eza hwenle ye hɔle Asɔne Sua Kpole ne anu wɔ zɔhane kenle ne; ɛhye noko ati, mɔɔ Dwosefi nee Male rale kɛ bɛbava kakula ne bɛahile kɛmɔ mɛla ne se la, 28 ɛnee Semɛyɔn wɔ ɛkɛ ne, ɔti ɔliele kakula ne ɔdole ɔ sa zo na ɔyele Awulae Nyamenle ayɛlɛ.

29-31 Ɔzele kɛ, "Awulae, akee maa menwu anzondwolɛ nu! Ɔluakɛ akee menwu ye, kɛmɔ ɛbɔle me ɛwɔkɛ la. Menwu Ngoanedievolɛ ne mɔɔ ɛbɔle ɛwɔkɛ kɛ ɛbava wɔamaa ewiade ye la. 32 Yemɔ a le Kɛnlaneɛ ne mɔɔ bada amaa ewiade amra, na eza noko yeaye anyunlunyia yeamaa wɔ menli Yizilayɛma ne la!"

33 Ɛhye mɔ mɔɔ ɛnee bɛlɛka ye wɔ Gyisɛse anwo la yɛle Dwosefi nee Male azibɛnwo totohyia.

34,35 Semɛyɔn yilale bɛ, na akee ɔzele Male kɛ, "Dadeɛ bawɔ wɔ ahonle nu, ɔluakɛ Yizilayɛma dɔɔnwo ne ala bakpo kakula ɛhye wɔ bɛdabɛ bɛ amaneɛnwunlɛ ti. Noko akee ɔbayɛ anyelielɛ kpole yeamaa dɔɔnwo ne ala; na ahonle dɔɔnwo ne ala fealera nu edwɛkɛ bala ali."

36,37 Kenle ko ne ala, ɛnee Ana, mɔɔ le kapezonli raalɛ la noko wɔ Asɔne Sua Kpole ne anu bie. Ɔ ze a le Fanuwɛle, mɔɔ vi Dwuunli Ahya abusua ne anu la. Eza ɔle raalɛ mɔɔ ɔ nye ɛvi kpalɛ a, ɔboalekɛ ɔhɔle agyalɛ ɛvolɛ nsuu ala, na yehyi kunlane ɛvolɛ abulatwɛ nee nna. Ɔ gyakɛ amkpa Asɔne Sua Kpole ne anu ɛlɛ, alehyenlɛ nee aledwolɛ muala ɛnee ɔwɔ ɛkɛ ɔlɛsonle Awulae wɔ nzɛlɛlɛ nee ɛhɔnehyelɛ nu.

38 Mekɛ mɔɔ Semɛyɔn tendɛ ahile Dwosefi nee Male la, Ana ɔdaye noko ɔrale bɛ nwo ɛkɛ, na ɔdaye noko ɔbɔle ɔ bo kɛ ɔyɛ Nyamenle mo, eza ɔyeyɛ ye, na ɔbɔ ye ɛlawule ɔkile Gyɛlusalɛm amra amuala kɛ, Ngoanedievolɛ ne mɔɔ ɛnee bɛ nye la ye ade la a ɛra la.

39 Mɔɔ Dwosefi nee Male wiele ninyɛne mɔɔ Nyamenle Mɛla ne kile la amuala yɛ la, bɛziale bɛhɔle sua nu wɔ Nazalɛte mɔɔ wɔ Galeli la. 40 Akee kakula ne nyinle wɔ nrɛlɛbɛ kpole nu, na Nana Nyamenle ɛlolɛ ne noko dɛnlanle ye nu.

41,42 Mɔɔ Gyisɛse lile ɛvolɛ bulu nee nwiɔ la, ɔ nee ye awovolɛma ne mɔ hɔle Gyɛlusalɛm bɛkali Dwuuma Akpabɛnwo Ɛvoyia ne bie. 43 Bɛwiele ɛvoyia ne di la, bɛzile nu kɛ bɛkɔ Nazalɛte, noko Gyisɛse yemɔ ɔhale bɛ nzi wɔ Gyɛlusalɛm. Ɛnee ye awovolɛma ne mɔ ɛnze nwolɛ bie, 44 ɔluakɛ bɛdwenlenle kɛ ɔ nee ɔ gɔnwo mɔ nee ye sua zo amra bara. Na ye nɔsolɛ nu mɔɔ yeamba la, bɛbɔle ɔ bo kɛ bɛkpondɛ ye wɔ bɛ nwo amra nee bɛ gɔnwo mɔ ɛkɛ ne; 45 na mɔɔ bɛannwu ye la, akee bɛziale bɛhɔle Gyɛlusalɛm kɛ bɛkakpondɛ ye wɔ ɛkɛ.

46,47 Ye kenle nsa ne azo yɛɛ akee bɛnwunle ye a. Ɛnee ɔde kilehilevolɛma mgbanyima ne mɔ avinli wɔ Asɔne Sua Kpole ne anu ɔlɛtie bɛ na ɔbizebiza bɛ edwɛkɛ. Na ye ndelebɛbo nee ye nyelebɛnloa ne zinle bɛ nuhua biala anwo.

48 Ye awovolɛma ne mɔ noko nwunle ye la, ɔyɛle bɛdabɛ noko nwanwane. Na ɔ nli zele ye kɛ, "Me Ra, na duzu ati a wɔyɛ yɛ zɛhae a? Ɛdawɔ nea kɛ me nee ɛ ze yɛkpondɛ wɔ yɛvɛ zɛhae ɛ?"

49 Ɔbizale bɛ kɛ, "Na duzu bɔbɔ ati a bɛkpondɛ me a? Bɛnze kɛ ɔwɔ kɛ meyɛ Egya gyima wɔ ye Asɔne Sua ne anu ɔ?" 50 Ɔ nli nee ɔ ze bɛmɛ bɛande ɛhye mɔɔ ɔhanle la abo.

51 Akee ɔ nee bɛ ziale hɔle Nazalɛte, na ɔdiele bɛ edwɛkɛ, na ɔbɛlɛle ɔ nwo aze ɔmaanle bɛ; na ɔ nli noko vale edwɛkɛ ɛhye mɔ amuala ziele ye ahonle nu. 52 Na Gyisɛse noko nyinle wɔ nrɛlɛbɛ nee nwonane nu, na Nana Nyamenle nee menli hulole ye edwɛkɛ.