Lucas 23

Bɛli Gyisɛse edwɛkɛ na bɛbua ye mgbɔvodɛne

1 Akee Mɛla Ekuma ne amuala dwazole, na bɛvale Gyisɛse bɛhɔmaanle Paelɛte, mɔɔ le Amɛnlado ne. 2 Bɛbɔle ɔ bo bɛdoɔdoanle ye bɛzele kɛ, "Nrenyia ɛhye li menli ne mɔ anyunlu bɛlɛsɛkye maanle ne; yeze bɛ kɛ bɛmmatua adwule biala bɛmaa Wulomu Arane ne, eza ɔse ɔle Ngoanedievolɛ, anzɛɛ Kelaese, Belemgbunli ne."

3 Yemɔti Paelɛte bizale ye kɛ, "Anzɛɛ wɔmɔ a ɛle Dwuuma ne bɛ Belemgbunli ne ɔ?"

Gyisɛse buale ye zele kɛ, "Ɛhɛe, ɛdawɔ wɔha."

4 Paelɛte hakyile ɔ nye nleanle azɛlɛvolɛ mgbanyima ne mɔ ɔ nee menli dodo ne na ɔzele kɛ, "Mennwu ɛtane biala wɔ ɔ nwo."

5 Akee ɛya hunle bɛ somaa ne ala maanle bɛzele kɛ, "Ɔvi Galeli mɔɔ kɔ Gyɛlusalɛm, ɔ nee Dwudiya amuala, ɛleka biala mɔɔ ɔkɛhɔ la ɔfa ye ngilehile ne ɔtendɛ ɔtia, na ɔkpudwu maanle ne anu Arane ne."

6 Paelɛte bizale kɛ, "Ɛnee ɛhye kile kɛ ɔle Galelinli ɔ?"

7 Mɔɔ bɛzele ye kɛ, "ɛhɛe" la, Paelɛte zoanle ye wɔ Hɛlɔdo anwo lɔ ɔluakɛ ɛnee Galeli wɔ Hɛlɔdo maamulɛ bo; yɛɛ mekɛ zɔhane anu noko, ɛnee Hɛlɔdo ɔdaye mumua ne ɔwɔ Gyɛlusalɛm. 8 Hɛlɔdo lile fɛlɛko kɛ yenwu Gyisɛse mekɛ ɛhye anu a, ɔluakɛ ɛnee yede ye nganeɛ dɛbadɛba; na eza ɔ nye la kɛ ɔkɛnwu ye kɛ ɔlɛyɛ nwanwanedeɛ.

9 Ɔbizebizale Gyisɛse kpuyia dɔɔnwo ne ala, noko akee yemɔ yeambua nwolɛ bie. 10 Mekɛ ɛhye anu bɔbɔ, azɛlɛvolɛ mgbanyima ne mɔ ɔ nee kɛlɛhɛlɛvolɛ mgbanyima mɔɔ ɛha la gyinlanle ɛkɛ ne deɛdeanle nu doanle ye fane dɔɔnwo ne ala.

11 Akee Hɛlɔdo nee ye azogya ne mɔ bɔle ɔ bo kɛ bɛbɔ Gyisɛse aholoba na eza bɛsi ye amgbu; bɛvale arelemgbunli ɛsaso adɛladeɛ bɛwulale ye, na akee bɛvale ye bɛhɔmaanle Paelɛte bieko. 12 Kenle ko zɔhane, Hɛlɔdo nee Paelɛte, mɔɔ ɛnee le akpɔvolɛ, ɔlua manzonle bie mɔɔ la bɛ avinli la ati la, yɛle agɔnwolɛ ɛkɛ ne ala.

13 Paelɛte vɛlɛle azɛlɛvolɛ mgbanyima ne mɔ, ɔ nee Dwuuma maanle mgbanyima, boka menli ne kpokpoti maanle bɛboale bɛ nloa, 14 na ɔvale ye ɛdeɛ mɔɔ ɔze la ɔdole bɛ nyunlu kɛ:

"Bɛdonle nrenyia ɛhye ɛzonle na bɛ nee ye rɛlɛle me kɛ ɔlɛdi menli nyunlu yeamaa bɛaho bɛatia Wulomu Arane ne. Menleɛnlea edwɛkɛ ɛhye anu kpalɛ na meannwu fɔlɛlilɛ biala wɔ ɔ nwo, 15 Kɛ Hɛlɔdo ɔdaye noko ye adwenle yɛle la ɛne, ɔti ɔmaanle bɛ nee ye ziale rɛlɛle yɛ, kɛ debie biala ɛnle ɛkɛ mɔɔ nrenyia ɛhye ɛyɛ mɔɔ yemɔti ɔfɛta ewule a. 16 Ɛhye ati mebamaa bɛabo ye, bɛabila ye empele ala na akee meagyakyi ye."

17,18 Na menli ɛwolaa ne vale ɛnelɛ bedevinli bie deanle nu zele kɛ, "Ku ye, na ye Balabase maa yɛ!" 19 Ɛnee Balabase la efiade wɔ nzaka bie mɔɔ ɔdole ye wɔ Gyɛlusalɛm ɔtiale Wulomu Arane ne boka sonlahunlɛ nwo la ati. 20 Paelɛte nee bɛ zule nwolɛ kpolera, ɔluakɛ ɔhulole kɛ ɔkɛgyakyi Gyisɛse. 21 Noko akee menli ne mɔ deɛdeanle nu zele kɛ, "Bɔ ye meanubaka nu! Bɔ ye meanubaka nu!" 22 Ɔbizale bɛ mɔɔ tɔ zo fane nsa ne la kɛ, "Duzu ati ɔ? Duzu munzule a yebɔ a? Mennwu ɛtane biala wɔ ɔ nwo mɔɔ ɔlua zo ɔwɔ kɛ mebua ye ewule fɔlɛ a. Ɔti mebabo ye meabila ye empele ala na meagyakyi ye meamaa yeahɔ." 23 Noko akee bɛdeɛdeanle nu mgbole mgbole ne ala kɛ Gyisɛse ye ewule ala a bɛkpondɛ a, na bɛ ne ne mɔ noko hɔle anwuma kpalɛ kpalɛ.

24 Ɔti Paelɛte buale Gyisɛse fɔlɛ kɛ ɔwɔ kɛ ɔwu kɛmɔ menli ne mɔ kpondɛ la, 25 na ɔyele Balabase, mɔɔ ɛnee la efiade ɔlua nzakadolɛ nee sonlahunlɛ ti la ɔmaanle bɛ wɔ bɛdabɛ bɛ nloa edwɛkɛ ti. Na Gyisɛse, yemɔ ɔyele ye ɔmaanle bɛ kɛ bɛdabɛ bɛ nee yɛ ɛhɔ na bɛhɔyɛ ye debie biala mɔɔ bɛkulo la.

26 Mekɛ mɔɔ bɛ nee Gyisɛse kɔ la, bɛ nee Saemɔn mɔɔ vi Saelin, mɔɔ ɛnee vi ɛbɔ nu ɛlɛsia ara Gyɛlusalɛm la yiale; ɔti bɛhyele ye kɛ ɔzoa Gyisɛse ye meanubaka ne ɔli bɛ nzi. 27 Na maanle ne anu menli dodo ne ala, ɔ nee mraalɛ mɔɔ ɛlɛsu ye awolɛ la doale ye.

28 Gyisɛse hakyile ɔ nye nleanle bɛ na ɔzele bɛ kɛ, "Gyɛlusalɛm mraalɛ, bɛmmasu bɛmaa me, na emomu bɛzu bɛmaa bɛ nwo nee bɛ mra. 29 Ɔluakɛ melɛ ɛlɛba mɔɔ bɛbaze kɛ, ‘Nyilalɛ ɛha mraalɛ mɔɔ ɛnwo la, nee ɛkolɛ mɔɔ ralɛ ɛtɛtɔle nu ɛlɛ la, ɔ nee nyɛfonlɛ ne mɔɔ adɔma ɛtɛnonle ye ɛlɛ la.’ 30 Akee bɛbabodo bɛaze awoka ne mɔ kɛ, ‘Bɛdudu bɛgua yɛ nwo zo’, ɔ nee awoka ngyikyi ne mɔ noko kɛ, ‘Bɛheda yɛ nwo zo.’ 31 Ɔboalekɛ saa bɛlɛyɛ ɛhye wɔ mekɛ mɔɔ baka ne le amolɛ la a, ɛnee saa ɔyɛ welera a duzu a, bɛkɛyɛ a?"

Bɛbɔ Gyisɛse meanubaka nu

32,33 Bɛ nee nwule nwiɔ bie noko hɔle kɛ bɛkahu bɛ bɛaboka ɔ nwo wɔ ɛleka bie mɔɔ bɛfɛlɛ ye "Etile Kanrɛlɛ" la. Ɛkɛ ne yɛɛ bɛbɔle bɛmɛ nsa ne meanumbaka nu a; Gyisɛse wɔ avinli meanubaka ne azo, yɛɛ nwule nwiɔ ne mɔ wɔ ye bɛne zo nee ye fema zo.

34 Akee Gyisɛse zele kɛ, "Egya, fakyɛ bɛ, ɔluakɛ bɛnze mɔɔ bɛlɛyɛ la."

Sogyama ne mɔ hwenle ye tɛladeɛ ne anwo adunyi kɛ saa ɔkɛyɛ nwane deɛ a. 35 Menli dɔɔnwo ne gyinlanle ɛkɛ ne nleanle, yɛɛ Dwuuma mgbanyima ne mɔ noko zelele ye na bɛzile ye amgbu bɛzele kɛ, "Ɔdie awie mɔ ngoane, noko akee ɔngola ɔnlie ɔ nwo; bɛmaa yɛnlea kɛ ɔkɛhola ɔkɛlie ɔ nwo kɛ amgba yemɔ a le Kelaese Nana Nyamenle Ra ne a!"

36 Sogyama ne mɔ noko zile ye amgbu zɔhane ala, na bɛvale nwanye ɛnwonle kasokaso bie bɛmaanle ye kɛ ɔnlo. 37 Akee bɛzele ye kɛ, "Saa amgba ala wɔmɔ yɛɛ ɛle Dwuuma Belemgbunli ne a, ɛnee die ɛ nwo!"

38 Na bɛvale taboa sinli bie mɔɔ ngɛlɛlera ɛhye: "Dwuuma ne Belemgbunli ne ɛne" wɔ zo la bɛbɔle ɔ ti sɔlɔ.

39 Nwule nwiɔ ne mɔɔ bɛbɔle bɛ meanumbaka nu bɛbokale ɔ nwo la anu ko zile ye amgbu zele kɛ, "Na tɛ wɔmɔ a ɛle Ngoanedievolɛ ne ɔ? Die ɛ nwo nee yɛdayɛ noko ɛ!"

40,41 Awule ɛhendeɛ ne zele ɔ gɔnwo ne kɛ, "Yemɔti ɛnzulo Nyamenle bɔbɔ kɛ ɛdawɔ noko bɛbua wɔ ewule fɔlɛ ɔ? Yɛmɛ yɛ sa ɛha yɛ ahatualɛ mɔɔ fɛta yɛ ninyɛmunli ne a, na nrenyia ɛhye yemɔ ɔtɛyɛle ɛtane biala." 42 Akee ɔzele kɛ, "Gyisɛse, saa ɛkɔ wɔ Belemgbunli maanle ne anu a, anrɛɛ mmamaa ɛ rɛle fi me."

43 Gyisɛse noko buale ye zele kɛ, "Mese wɔ nɔhalɛ nu kɛ, ɛnɛ demua ye me nee wɔ bahɔ Paladaese."

44 Mekɛ ɛhye anu ɛnee bɛbɔ kɛyɛ ewiazo bulu nee nwiɔ, na awozinli kabii hedale aleɛabo kosooti dedee dɔnehwele nsa. 45 Ewia ne kɛnlaneɛ ne hɔle awozinli nu, na arɛlevilɛ nu ala, ɛdanlɛ ne mɔɔ bɛva bɛpɛ Asɔne Sua Kpole ne anu la suanle kɛlɛdɛdɛ nwiɔ vi ɔ ti rapenle ye aze.

46 Gyisɛse vale ɛnelɛ kpole bie deanle nu zele kɛ, "Egya, mefa me sunsum mewula ɛ sa nu." Ɔhanle ɛhye ɔwiele ala la, akee ɔbɔle ɔ ti aze na ɔwule.

47 Mɔɔ Wulomu sogya kpanyinli ne mɔɔ nleanle maanle menlihunlɛ ne hɔle zolɛ la nwunle mɔɔ ɛzi la, ɔ nwo nyianle ye kpole kpalɛ; ɔti ɔzele kɛ, "Nɔhalɛ, nrenyia ɛhye le tenlenenli amgba."

48 Akee mɔɔ menli dodo ne mɔɔ rale ranleanle meanubaka nu ɛbɔlɛ ne bie la nwunle kɛ Gyisɛse ɛwu la, bɛvale alɔbɔlɛ nee nyane kpole kpalɛ bɛhɔle bɛ azua nu. 49 Mɔɔ ɛhye mɔ ɛlɛkɔ zo la, Gyisɛse agɔnwo mɔ nee ye kulovolɛma kpokpoti ɔ nee mraalɛ ne mɔ mɔɔ bɛlile ɔ nzi bɛvile Galeli la, amuala gyinlanle moamoa nehane nleanle mɔɔ ɛlɛkɔ zolɛ la.

50-52 Na nrenyia bie mɔɔ bɛfɛlɛ ye Dwosefi, mɔɔ vi Arelematia, mɔɔ boka Kɔɔto Kpole ne anwo la, hɔle Paelɛte ɛkɛ hɔzɛlɛle Gyisɛse ye funli ne. Nrenyia ɛhye sulo Nyamenle, mɔɔ ɛnee ɔ nye la Nyamenle Belemgbunli maanle ne ade, na ɔlua ɛhye ati ɔ nee Dwuuma mgbanyima ne mɔ anyɛ adwenle wɔ bɛ adwenlenzuzulɛ nee bɛ nyɛleɛ nwo a. 53 Ɔti ɔyele Gyisɛse funli ne ɔvile meanubaka ne azo, na ɔvale selekye ɛdanlɛ tendenle bie ɔkyekyele funli ne; akee ɔhɔziele ye wɔ sɛka fofolɛ bie mɔɔ bɛpɛ ye wɔ bolɛ nu wɔ boka ekyi bie foa ko la anu. 54 Bɛyɛle ɛhye wɔ Yalɛ ewiazo mɔɔ ɛnee maanle nu ɛlɛba aramua, kenle ne mɔɔ bɛyɛ anwoziezielɛ bɛkendɛ Ɛnwomenlelielɛ Kenle ne la.

55 Melɛ mɔɔ bɛ nee funli ne kɔ la, mraalɛ ne mɔ mɔɔ bɛ nee ye vile Galeli rale la lile ɔ nzi ranleanle sɛka ne, ɔ nee ɛleka mɔɔ bɛbava ye bɛado la. 56 Akee bɛhɔle sua nu na bɛhɔzieziele alufuanlɛ nee nwole evuanlɛ evuanlɛ mɔɔ bɛbava bɛakpokpa ye la; mɔɔ bɛkawie ɛhye yɛ la ɛnee Ɛnwomenlelielɛ Kenle ne asɛɛ ɛdwu, ɔti bɛliele bɛ ɛnwomenle kenle ko zɔhane amuala kɛmɔ Dwuuma ne mɛla ne se la.