1 Na kenle ne mɔɔ lumua wɔ dapɛne ne anyunlu nwonlomɔ mangyee ne, bɛhɔle sɛka ne azo; 2 bɛnwunle kɛ bɛhundo bolɛ totohyia ne mɔɔ bɛvale bɛnyinle sɛka ne anloa la bɛdo ye ahanle. 3 Bɛhɔle sɛka ne anu, na emomu bɛannwu Awulae Gyisɛse ye funli ne.

4 Ɛhye zinle bɛ nwo, ɔti ɔmaanle bɛ adwenle noko yɛle bɛ sesakaa, na arɛlevilɛ nu ala, mrenyia nwiɔ mɔɔ wulowula adɛladeɛ fufule nwohyenwohyee na bɛlɛta kɛ sɛnzɛne la ragyinlanle bɛ nwo ɛkɛ. 5 Ɛzulolɛ kpole hanle mraalɛ ne mɔ maanle bɛbutubutule bɛ nye aze.

Akee mrenyia nwiɔ ne mɔ bizale bɛ kɛ, "Duzu ati a bɛlɛkpondɛ sonla mɔɔ de aze la bɛavi mɔwuamra anu a? 6,7 Ɔnle ɛke. Yedwazo yera ngoane nu bieko! Bɛngakye mɔɔ ɔhanle ɔhilele bɛ wɔ Galeli, kɛ ɔwɔ kɛ bɛye Sonla Ra ne bɛwula ɛtanevolɛma asa anu, na bɛbɔ ye meanubaka nu, na ye kenle nsa ne azo ɔbadwazo bieko la ɔ?"

8 Bɛhakyele ye edwɛkɛ ne, 9 ɔti bɛvi sɛka ne azo bɛziale bɛhɔle Gyɛlusalɛm ndɛndɛ zo bɛhɔbɔle ye ɛdoavolɛma bulu nee ko ne, ɔ nee bɛdabɛ mɔɔ ɛha la amuala amaneɛ. 10 Mraalɛ ne mɔ mɔɔ hɔle sɛka ne azo la a le Male mɔɔ vi Magedala la, Dwowana, ɔ nee Gyemise ɔ nli, Male nee dɔɔnwo ne ala mɔɔ ɛha la. 11 Edwɛkɛ ne yɛle mrenyia ne mɔ kɛ asɛɛ nwɔra bie la, bɛanlie bɛanli ɛlɛ.

12 Pita, yemɔ ɔnriandinle ɔhɔle sɛka ne azo kɛ ɔkanlea ye ɔ nye zo. Ɔbutule ɔnleanle nu, na ɔnwunle ndanlɛ ne mɔ mɔɔ bɛvale bɛkyekyele ɔ nwo la angome. Ɔziale ɔhɔle ye sua nu, na ɔdwenlenle nwanwanedeɛ ɛhye mɔɔ ɛzi la anwo.

13 Kenle ko demua ne ala, Gyisɛse ye ɛdoavolɛma ne mɔ anu nwiɔ zile nu kɛ bɛkɔ Ɛmeeyɛse, namule bie mɔɔ nee Gyɛlusalɛm avinli le kɛyɛ mayɛlɛ nsuu la azo. 14 Ɛnee bɛlɛdi Gyisɛse ye ewule ne ɔ nee ninyɛne mɔɔ ɛsisi ɔ nzi la anwo adwelie; 15 na arɛlevilɛ nu ala, Gyisɛse mumua ne vindele bɛ nwo ɛkɛ, ɔbikyele bɛ na ɔ nee bɛ muala luale nwolɛ hɔle. 16 Ɔlua Nyamenle ye ngyehyɛleɛ ti, bɛannwu ye sonla holɛ.

17 Ɔzele bɛ kɛ, "Duzu edwɛkɛ a ɛzi, mɔɔ ɔti bɛlɛdi nwolɛ adwelie zɛhae a?"

Bɛgyinlanle bɛyɛle ngungoonwu, na ɛnee bɛ rɛle ɛbɔ somaa ne ala. 18 Bɛ nuhua ko, mɔɔ bɛfɛlɛ ye Kiliopase la buale kɛ, "Ɛdawɔ ɛ ngomekye a ɛle ɛyɛvolɛ wɔ Gyɛlusalɛm, mɔɔ yemɔti ɛtɛtele edwɛkɛ nwanwane ne mɔ mɔɔ ɛzi dapɛne ne mɔɔ ɛze ɛhɔ la anu ɔ?"

19 Gyisɛse bizale bɛ kɛ, "Duzu edwɛkɛ ɔ?"

Bɛzele ye kɛ, "Ninyɛne ne mɔ mɔɔ zile Gyisɛse, Nazalɛtenli kapezonli kpole ne anwo zo la. 20 Noko akee azɛlɛvolɛ mgbanyinli ne mɔ ɔ nee yɛ maanle mgbanyima yele ye maanle Wulomu Arane ne maanle bɛbuale ye mgbɔvodɛne, bɛbɔle ye meanubaka nu bɛhunle ye. 21 Na yɛmɛ ɛnee yɛlɛ anyelazo kɛ yemɔ yɛɛ a le anyunlunyia Sonla Ra ne mɔɔ barakpɔne Yizilayɛ a.

"Na wɔ ɛhye mɔ amuala anzi, mɔɔ zile ɛnɛ kenle nsa la, 22,23 mraalɛ bie mɔɔ wɔ yɛ ɛdoavolɛma eku ne anu la hɔle ye sɛka ne azo nwonlomɔ ye, na bɛrabɔle amaneɛ ɛzulolɛ bie kɛ, ye funli ne ɛminli; na eza noko bɛnwunle anwumabɔvolɛma bie wɔ ɛkɛ mɔɔ bɛzele bɛ kɛ Gyisɛse ɛdwazo a! 24 Yɛ mraalɛ mɔɔ yɛ nee bɛ wɔ ɛke la bie mɔ hɔle hɔnleanle, na bɛnwunle ye nɔhalɛ nu kɛ Gyisɛse ye funli ne ɛnle ɛkɛ kɛmɔ mraalɛ ne mɔ hanle ala la pɛ."

25 Gyisɛse ɔdaye mumua ne ɔzele bɛ kɛ, "Ao, menli ahoasea mɔɔ le kɛ bɛmɛ, mɔɔ bɛ ahonle ne mɔ ɛtili, mɔɔ bɛnlie debie biala mɔɔ ngapezoma ne mɔ ɛha la bɛnli a! 26 Anzɛɛ ngapezoma ne annwu ye anga ye dɛbadɛba kɛ Kelaese banwu anwubɛnyunlu ɛhye mɔ kosooti kolaa na yeahɔ ye anyunlunyia nu ɔ?"

27 Akee Gyisɛse bɔle ɔ bo vi Mosisi ɔ nee ngapezonɔa ne mɔ amuala anwo zo hilehilele bɛ debie biala mɔɔ wɔ Ngɛlɛlera ne anu mɔɔ fale ɔ nwo la abo.

28 Mekɛ ɛhye anu ɛnee akee bɛlɛbikye Ɛmeeyɛse wɔ adendulɛ ne awieleɛ. Gyisɛse yɛle ye adwenle kɛ ɔkɔ ɔ nyunlu bieko, 29 na kɛmɔ ɛnee maanle nu ɛlɛba aramua la ati, bɛbodole ye kɛ, "Maa yɛla, aleɛ ɛdwo." Ɔti ɔdaye noko ɔkponlenle zolɛ ɔ nee bɛ makyile hɔle sua nu. 30 Mɔɔ bɛdi aleɛ la, ɔvale kpanwo ɔyilale zolɛ na ɔbubule nuhua ngyikyi ngyikyi ɔmaanle bɛ. 31 Arɛlevilɛ nu ala, bɛ nye zo tetele bɛ wienyi na akee bɛnwunle ye kɛ ɔdaye mumua ne ɔ, na ɔminlinle bɛ nye zo minlimɛnla.

32 Bɛzele bɛ nwo ngoko ngoko kɛ, "Ɛhye ati a mekɛ mɔɔ yɛ nee ye lua adenle nu la ɔhilehilele yɛ ngɛlɛlera ne anu ɔmaanle yɛdele ɔ bo na yɛ nye liele ɔ nwo la." 33,34 Na dɔnehwele ko ne ala anu; bɛziale bɛrale Gyɛlusalɛm, bɛradole kɛ Bulu Nee Ko ne nee ɛdoavolɛma ne mɔɔ boka bɛ nwo la ɛhuohua bɛ nloa wɔ ɛleka ko ɛlɛkeha wɔ bɛ nu kɛ, "Awulae ɛdwazo amgba, na yeye ɔ nwo yehile Pita!"

35 Akee mrenyia nwiɔ ne mɔ mɔɔ vi Ɛmeeyɛse la hanle bɛ nloa anu edwɛkɛ, kɛ Gyisɛse zile yele ɔ nwo hilele bɛ wɔ adenle nu, ɔ nee kɛ bɛzile bɛholale bɛnwunle ye wɔ mekɛ mɔɔ ɔbubule kpanwo ne anu la. 36 Mɔɔ bɛ nloa wɔ zo bɔbɔ bɛdi ɛhye anwo adwelie la, Gyisɛse mumua ne ragyinlanle bɛ avinli arɛlevilɛ nu ala na ɔzele bɛ kɛ, "Anzondwolɛ ɛha bɛ!" 37 Ɛzulolɛ hanle bɛ maanle bɛbɔle mgbatike, na bɛdwenlenle kɛ bɛnwu nwomenle bie.

38 Ɔzele bɛ kɛ, "Duzu ati a bɛ ahonle ɛdu zɛhae a? Duzu ati a bɛnlie bɛnli kɛ medame a? 39 Bɛnlea me sa nu nee me gyakɛ! Bɛbahola bɛanwu ye kɛ medame mumua ne ɛne. Bɛva bɛ sa bɛha me na bɛnwu ye kɛ menle nwomenle. Ɔluakɛ nwomenle ɛnlɛ nwonane kɛmɔ mame melɛ ye la!" 40 Mɔɔ ɔhanle ɛhye ɔwiele la, ɔvale ɔ sa akunlu nee ɔ gyakɛ ɔhilele bɛ.

41 Ɔlua fɛlɛkolilɛ somaa ti, bɛanlie bɛanli.

Akee ɔbizale bɛ kɛ, "Bɛlɛ aleɛ wɔ ɛke ɔ?"

42 Bɛmaanle ye fɛlɛ ngyehye ekyi ko, 43 na ɔlile ye wɔ bɛ nyunlu ɛkɛ ne ala.

44 Ɔwiele la ɔzele bɛ kɛ, "Bɛngakye kɛ mekɛ mɔɔ me nee bɛ de la, menganle mengilele bɛ kɛ debie biala mɔɔ Mosisi nee ngapezoma ne mɔ hɛlɛle wɔ Ngɛlɛlera ne anu mɔɔ fale me nwo la ɔwɔ kɛ di munli ɔ?" 45 Akee ɔbukele bɛ adwenle nu amaa bɛade Ngɛlɛlera ne abo kofee. 46 Ɔzele bɛ kɛ, "Nɔhalɛ, bɛhɛlɛ ye dɛbadɛba kɛ Sonla Ra ne banwu amaneɛ, bɛbahu ye bɛazie ye na yeadwazo ye kenle nsa ne azo; 47 na ɔwɔ kɛ bɛfa ɛkpɔnenlɛ nwo nolobɔlɛ ɛhye bɛfi Gyɛlusalɛm bɛkɔmaa maanle maanle kosooti: Ɛtanefakyɛ wɔ ɛkɛ maa bɛdabɛ mɔɔ bɛfu bɛ nwo na bɛtoa me bo zo la. 48 Bɛdabɛ bɛdi kapezo edwɛkɛ ɛhye mɔ amuala anwo daselɛ.

49 "Bɛnlea, akee mebazoa Sunsum Nwuanzanwuanza ne wɔ bɛ nwo, kɛmɔ Egya bɔle bɛ ɛwɔkɛ la. Bɛmmabɔ ye nolo bɛkile awie biala kɛkala, bɛdɛnla sua ye azo ɛke kɔkpula mekɛ mɔɔ Sunsum Nwuanzanwuanza ne vi anwuma maanle nu kɛra kɛrayi bɛ tɛkɛɛ na ɔkɛmaa bɛ anwosesebɛ la."

50 Gyisɛse nee bɛ vindele hɔle Bɛtani kandiba, na ɔmaanle ɔ sa zo ɔyilale bɛ, 51 na ɔrale ye kɛ, mɔɔ ɔyila bɛ la, ɔ nee bɛ lile mgbakyelɛ nu, na akee bɛvale ye bɛhɔle anwuma maanle ne anu. 52 Bɛmɛ bɛhotole bɛyeyɛle ye, na bɛvale fɛlɛkolilɛ kpole bɛziale bɛrale Gyɛlusalɛm, 53 na bɛdɛnlanle Asɔne Sua Kpole ne anu dahuu bɛyele Nyamenle ayɛlɛ.