Lucas 6

Ɛnwomenlelielɛ kenle ne amenle

1 Wɔ Ɛnwomenlelielɛ Kenle bie anu, mɔɔ ɛnee Gyisɛse nee ye ɛdoavolɛma ne mɔ lua abɛlɛ ɛya bie anu la, bɛbule na bɛnyekɛle abɛlɛ ne bie na bɛkposale ye wɔ bɛ sa nu na bɛlile.

2 Mɔɔ Falasiima ne mɔ bie mɔ nwunle ɛhye la, bɛzele kɛ, "Ɛhye ɛnva mɛla adenle nu! Wɔ ɛdoavolɛma ne mɔ ɛlɛbu abɛlɛ wɔ Ɛnwomenlelielɛ Kenle wɔ mekɛ mɔɔ ɔtia Dwuuma amaamuo ne la."

3 Gyisɛse buale bɛ zele kɛ "Bɛngenga Ngɛlɛlera ne ɔ? Anzɛɛ bɛtɛkengale deɛ mɔɔ Belemgbunli Devidi yɛle ye wɔ mekɛ bie mɔɔ ɛhɔne hunle ye nee ɔ sa zo ne mɔ la ɔ? 4 Ɔhɔle Asɔne Sua Kpole ne akunlu azukponle ne azo na ɔhɔvale ngoane kpanwo ne mɔɔ le Awulae mumua ne deɛ, mɔɔ gyi azukponle ne azo la, na bɔbɔ ɛnee ɛhye tia mɛla ne, noko akee ɔ nee awie mɔ hyɛle na bɛlile." 5 Eza Gyisɛse vale zɔle zo kɛ, "Mame a le Ɛnwomenlelielɛ Kenle ne amenle ne a."

6 Ɛnwomenlelielɛ Kenle bieko dwule la ɔhɔle ayiasua ne anu kɛ ɔkahile debie, na ɛnee nrenyia bie mɔɔ kokobɛ ɛzɔ ɔ sa fema la wɔ ɛkɛ ne. 7 Mɛla Kilehilevolɛma ne mɔ nee Falasiima ne mɔ, guale bɛ nye aze koonwu nleanle ye kɛ saa ɔkɛyɛ nrenyia ne ayile wɔ Ɛnwomenlelielɛ Kenle ko ne a, amaa ɔlua zo bɛanyia edwɛkɛ bɛaha bɛatia ye.

8 Na kɛmɔ ɛnee ɔze bɛ adwenle la ati, ɔzele nrenyia kokobɛvolɛ ne kɛ, "Bɛla bagyinla ɛke amaa awie biala anwu wɔ." Ɔti nrenyia ne noko yɛle ye zɔ.

9 Akee Gyisɛse zele Falasiima ne mɔ nee Mɛla kilehilevolɛma ne mɔ kɛ, "Melɛ kpuyia mebiza bɛ. Anzɛɛ ɔfa adenle nu kɛ bɛkɛyɛ boɛ wɔ Ɛnwomenlelielɛ Kenle ne anzɛɛ kɛ bɛkɛyɛ ɛtane ɔ? Kɛ ɛkɛlie ngoane, anzɛɛ kɛ ɛkɛzɛkye ye ɔ?"

10 Ɔnleɛnleanle bɛ nyunlu ngoko ngoko na ɔzele nrenyia ne kɛ, "Tenrɛ ɛ sa ne anu." Na mɔɔ ɔyɛle la, ɔ sa ne yɛle fɔɔnwo kɛ ye dɛba ne la bieko. 11 Mɔɔ Gyisɛse kpɔvolɛma ne mɔ nwunle ɛhye la, bɛvale ɛya kpole, na bɛbɔle ɔ bo kɛ bɛfa ɔ nwo akpame kɛ ɔkɛyɛ na bɛ sa aha ye bɛahu ye la.

Gyisɛse ɛye ye ɛdoavolɛma

12 Ɛhye anzi ye, ɔrale ye kɛ, kenle ko bie Gyisɛse hɔle awoka ne mɔ azo kɛ ɔkazɛlɛ, na ɔyɛle nzɛlɛlɛ nɔe ne amuala. 13 Aleɛ hyenle la ɔvɛlɛle ye ɛdoavolɛma tɔka ne, na ɔyele bɛ nuhua bulu nee nwiɔ kɛ bɛyɛ ye suakunlu ɛdoavolɛma. 14-16 Bɛ anluma a le ɛhye mɔ: Saemɔn, mɔɔ eza ɔvɛlɛle ye Pita la, Andelu Saemɔn adiema nrenyia ne, Gyemise, Dwɔn, Felepe, Baatɔlomiyu, Mateyu, Tɔmase, Gyemise, mɔɔ le Alefiyɛse ara nrenyia ne, Saemɔn (mɔɔ maanle ne kulo ye la), Dwudase, mɔɔ le Gyemise ara nrenyia ne ɔ nee Dwudase Yesekaleɔto, mɔɔ nzinlii ɔyele Gyisɛse ɔmaanle la.

17-19 Mɔɔ bɛrale boka ne agye nu la, bɛ nee Gyisɛse gyinlanle azɛlɛ sɛlɛsɛlɛ bie azo, mɔɔ ɛnee ye ɛdoavolɛma dɔɔnwo ne ala ɛbɔ ye mgbɔlɛka ɛyia, na bɛdabɛ noko menli ekpunli ekpunli dɔɔnwo ɛbɔ be mgbɔlɛka ɛyia a. Ɛnee menli vi Dwudiya maanle ne anu ɛleka biala nee Gyɛlusalɛm boka Taya nee Saedɛn Sɔlɔ ɛnweanloa ɛra kɛ bɛbadie ye edwɛkɛ ne bie na eza noko bɛamaa yeayɛ bɛ ayile.

20 Na ɔnleanle ye ɛdoavolɛma ne mɔ na ɔzele kɛ: "Nyilalɛ ɛha ehyiavolɛma, ɔluakɛ bɛmɛ yɛɛ Nana Nyamenle Anwuma belemgbunli maanle ne le bɛ deɛ a! 21 Nyilalɛ ɛha bɛdabɛ mɔɔ ɛhɔne ɛlɛku bɛ kɛkala la, ɔluakɛ bɛ ko bayi! Nyilalɛ ɛha bɛdabɛ mɔɔ bɛlɛsu kɛkala la, ɔluakɛ mekɛ ne bara mɔɔ bɛbazele na bɛali fɛlɛko a! 22 Nyilalɛ ɛha bɛdabɛ mɔɔ menli kpɔ bɛ la, na bɛkpo bɛ, na bɛtendɛ bɛtia bɛ na bɛsɛkye bɛ duma kɛ bɛle ɛtanevolɛma wɔ Sonla Ra ne duma nu ti la! 23 Bɛli fɛlɛko kenle zɔhane, na bɛmaa bɛ nye ɛlie! Ɔluakɛ bɛ ahatualɛ deɛ wɔ Anwuma belemgbunli maanle ne anu, na zɔhane ala yɛɛ bɛ ze mɔ yɛle tiale ngapezoma ne mɔ a.

24 "Na munzule ɛha sukoavolɛma, ɔluakɛ bɛmɛ bɛnyia bɛ ahatualɛ nee bɛ fɛlɛkolilɛ muala wɔ azɛlɛ ye azo ɛke ala. 25 Munzule ɛha bɛdabɛ mɔɔ bɛ ko ɛyi kɛkala la, ɔluakɛ mekɛ bie ɛlɛba mɔɔ ɛhɔne kpole badɔ bɛ kunlu a. Munzule ɛha bɛdabɛ mɔɔ bɛ nye die la, ɔluakɛ mekɛ bie ɛlɛba mɔɔ bɛbali nyane bɛazu bɛaye awolɛ a. 26 Munzule ɛha bɛdabɛ mɔɔ menli bɔ bɛ duma kpalɛ la, ɔluakɛ kɛ bɛ ze mɔ yɛle maanle ngapezoma adalɛ nabalabama ne mɔ la ɛne.

27 "Bɛdie. Bɛhulo bɛ kpɔvolɛma. Bɛyɛ kpalɛ bɛmaa menli mɔɔ kpɔ bɛ bɔbɔ la. 28 Bɛyila menli mɔɔ wa bɛ amonle la; na bɛzɛlɛ Nana Nyamenle nyilalɛ bɛmaa menli mɔɔ kɛha bɛ nwo edwɛkɛ ɛtane ɛtane la.

29 "Saa awie bɔ ɛ nzo nu a, maa ɔbɔ ko ne mɔɔ ɛha la noko anu! Saa awie sɛlɛ wɔ kootu ne a, fa wɔ anwuma tɛladeɛ ne boka nwo. 30 Mɔɔ bɛlɛ ye biala la saa awie sɛlɛ bɛ a bɛva bɛmaa ye; yɛɛ saa awie wua bɛ ninyɛne a, bɛmmadi kɛ ɔkɛzi ɔkɛyɛ na bɛanyia bieko la anwo nyane. 31 Bɛyɛ mɔɔ bɛkɛhulo kɛ bɛkɛyɛ bɛkɛmaa bɛ la bɛmaa bɛ gɔnwo mɔ noko.

32 "Saa bɛkulo menli mɔɔ kulo bɛ edwɛkɛ la angomekye a, ɛnee duzu nvasoɛ yɛɛ awɔ bɛ ɛhulolɛ ne azo a? Ɔluakɛ ɛtanevolɛma bɔbɔ kulo menli mɔɔ kulo bɛ la. 33 Saa bɛyɛ kpalɛ bɛmaa menli mɔɔ yɛ kpalɛ maa bɛ la angomekye ala a, duzu nvasoɛ yɛɛ awɔ bɛ kpalɛyɛlɛ ne azo a? Ɔluakɛ ɛtanevolɛma bɔbɔ yɛ zɔhane ala! 34 Saa bɛbɔ menli bosea na bɛkpa nu bɛbɔ nuhua ne mɔ mɔɔ bɛbɔ bɛ a bɛbadua la angomekye a, ɛnee duzu boɛ a bɛyɛ a? Menli mɔɔ ati ye se la bɔbɔ bɔ bɛ gɔnwo mɔ mɔɔ ati yɛ se la bosea maa bɛsia bɛtua ɔ muala bɛmaa bɛ!

35 "Bɛhulo bɛ kpɔvolɛma! Bɛyɛ kpalɛ bɛmaa bɛ! Bɛbɔ bɛ bosea mɔɔ bɛnva bɛ nye bɛndo kɛ bɛkɛzia bɛkɛdua bɛkɛmaa bɛ a. Saa ɛyɛ ɛhye a yɛɛ wɔ ahatualɛ mɔɔ wɔ anwuma la bayɛ kpole a, na eza noko nyɛleɛ ɛhye bahile yɛ nɔhalɛ nu kɛ bɛle Anwuma Nyamenle Bedevinli ne amra: ɔluakɛ Nyamenle le kpalɛ maa anzeayɛlɛma ɔ nee menli mɔɔ ati ɛzɛne ne yɛ ɛsesebɛ kpole kpalɛ la.

36 "Bɛbɔ mɔdenle bɛze anwunvɔne kɛmɔ bɛ Ze mɔɔ wɔ anwuma yɛ ye la. 37 Bɛmmatendɛ bɛtia awie anzɛɛ bɛmmabu awie fɔlɛ, ɔluakɛ mɔɔ tendɛ tia ɔ gɔnwo la, bɛtendɛ bɛtia ye, yɛɛ mɔɔ bu ɔ gɔnwo fɔlɛ la, bɛbu ɔdaye noko fɔlɛ. Bɛva ɛtane bɛhyɛ na bɛkɛva bɛ ɛtane bɛkɛhyɛ bɛ. 38 Fa ahyɛlɛdeɛ maa, na ɛbanyia ɔ muala mɔnwo mɔnwo dɔɔnwo ne ala. Debie biala mɔɔ ɛbava wɔahyɛ la, saa kpole o, anzɛɛ ekyii o, nwolɛ yɛɛ bɛbanlea bɛazia bɛabɔ nwo bɛamaa wɔ a."

39 Gyisɛse bule ɛrɛlɛ ɛhye vale hilehilele ye Nyamedwɛkɛ ne anu: kɛ: "Asoo anyezinliravolɛ bahola ahile ɔ gɔnwo anyezinliravolɛ adenle ɔ? Anzɛɛ bɛ mu nwiɔ bɛnrɛdɔ kuma nu ɔ? 40 Kɛ ɔyɛ mɔɔ sonla mɔɔ sukoa nwoma la kola nwu nwoma tɛla ye kilehilevolɛ ne ɛ? Noko akee saa ɔmia ɔ nwo ɛsesebɛ a, ɔkola ɔnwu nwoma kɛ ɔ menle ne ala la.

41 "Duzu ati yɛɛ ɛkola ɛnwu mumunli ne mɔɔ la ɛ diema anye zo la, na ɛngola ɛnnwu mgbunla ne mɔɔ la ɛdawɔ mumua ne ɛ nye zo la ɛ? 42 Kɛ ɛkɛzi ɛkɛhola ɛkɛha ɛkɛhile ye kɛ, ‘Adiema, maa memboa wɔ memaa ɛye mumunli ne mɔɔ la ɛ nye zo’, wɔ mekɛ mɔɔ mgbunla ɛheda ɛ nye la ɛ? Adalɛ nabalaba! Dumua ye mgbunla ne mɔɔ la ɛ nye zo la, na akee ɛ nye zo tete wɔ a akee wɔahola wɔaye mumunli ne mɔɔ la ɛ diema ne ɛdeɛ ne azo la!

43 "Baka kpalɛ ɛnzo ma ɛtane, na zɔhane ala noko yɛɛ baka ɛtane ɛnzo ma kpalɛ a. 44 Baka biala ma ne yɛɛ maa bɛkola bɛnwu ye baka holɛ ko a. Akutue ɛngola ɛnzo amango, yɛɛ amango noko ɛngola ɛnzo akutue. 45 Sonla kpalɛ biala yɛ nyɛleɛ kpalɛ mɔɔ vi ahonle kpalɛ nu la. Sonla mɔɔ ati akunlu le ɛtane la noko yɛ nyɛleɛ ɛtane mɔɔ vea ye ahonle nu la. Mɔɔ wɔ sonla ahonle nu la yɛɛ finde wɔ ye ɛdendɛlɛ nu a.

46 "Duzu ati a ɛfɛlɛ me ‘Awulae’ wɔ mekɛ mɔɔ ɛnli me edwɛkɛ zo a? 47,48 Bɛdabɛ mɔɔ bɛba bɛbatie na bɛdi me edwɛkɛ zo la le kɛ nrenyia bie mɔɔ ɛzi ye sua wɔ bolɛ kpole bie azo la. Saa azule yi bonrɛbonra na nzule ne bato si sua ne a, ɔgyi ye kpundii, ɔluakɛ ɔle anwosesebɛ.

49 "Na menli mɔɔ tie na bɛnli zo la le kɛ nrenyia bie mɔɔ si sua na yeanzi ye wɔ bolɛ zo la. Saa azule yi na ɔbafa sua ne a ɔbubu ye ɔgua ye aze."