1 Ɛhye mɔ amuala anzi ye, yeangyɛ dɔɔnwo biala, ɔvale ye ɛdoavolɛma bulu nee nwiɔ ne ɔlile ɔ nzi na ɔkpɔsale wɔ azua mgbole nee namunamu mɔɔ wɔ Galeli la azo kɛ, ɔbɔ Nana Nyamenle Belemgbunli maanle ne maleɛ ne anwo nolo. 2 Mraalɛ bie mɔ mɔɔ yedu sunsum evinli evinli yevi bɛ nu anzɛɛ mɔɔ yeyɛ bɛ ayile la nee ye a hɔle a; bɛ nuhua bie mɔ a le Male mɔɔ vi Magedala, mɔɔ Gyisɛse ɔdaye mumua ne ɔdule sunsum evinli ngakyile nsuu ɔvile ye nu la, 3 Dwowana, Twuza mɔɔ ɛnee nea belemgbunli Hɛlɔdo gyima, ye belemgbunli aako nee ye Sua nu edwɛkɛ zo aye ne, Susana, ɔ nee menli dɔɔnwo ne ala mɔɔ fa bɛdabɛ bɛ nwo ezukoa bɛnea Gyisɛse nee ye ɛdoavolɛma ne mɔ la.

4 Kenle ko bie mɔɔ ɛnee menli dɔɔnwo bie ɛyia kɛ bɛbadie ye edwɛkɛ ne bie, wɔ mekɛ mɔɔ ɛnee bɛ nuhua dɔɔnwo noko lua adenle nu, bɛvi azua ngakyile ngakyile zo bɛlɛba la, ɔbule ɛrɛlɛ ɛhye ɔzele kɛ:

5 "Ɛyazonlɛnli bie hɔle ye ɛya nu kɛ ɔkagua ma. Na mɔɔ ɔgua ma ne la, bie guale bɛ gyakɛ abo zo adenle ne anu, na menli tietiale zo; na nloma rale rasusole nuhua ne mɔɔ yemɔ bɛantietia zo la. 6 Ma ne bie mɔ noko guale azɛlɛ sɛhɛlɛɛ bie mɔɔ awolɛ mgbole yɛɛ awɔ ɔ bo la azo. Ma ɛhye mɔ bɔle ɔ bo kɛ bɛfifi, na yeangyɛ biala bɛ nya ne amuala nwosonwosonle na bɛwule, ɔluakɛ bɛannyia nzule. 7 Ma ne bie mɔ guale mbowule nu, na mɔɔ bɛbɔle ɔ bo kɛ bɛfifi la, mbowule ne miemianle bɛ maanle bɛwule. 8 Bie mɔ noko guale azɛlɛ kpalɛ zo, na bɛfifile na bɛzole ma mɔnwo mɔnwo fane ɛya kɛmɔ ɔluale bɛ la." Mekɛ mɔɔ ɔbu bɛ ɛrɛlɛ ɛhye la, ɔhanle ɔzɔle zo kɛ, "Bɛmaa menli mɔɔ lɛ ɛnzolɛ tie edwɛkɛ la ɛdie ye kɛkala!"

9 Ye ɛdoavolɛma ne mɔ bizale ye ɛrɛlɛ ne abo.

10 Ɔbuale bɛ kɛ, "Bɛmɛ Nana Nyamenle ɛmaa bɛ tumi kɛ bɛde mrɛlɛ ɛhye mɔ abo, ɔluakɛ bɛka Nyamenle Anwuma belemgbunli maanle ne anwo edwɛkɛ dɔɔnwo. Na kɛmɔ mɔmoane ngapezoma ne mɔ hanle dole ye ɛkɛ ne la, menli ekpunli ekpunli ɛhye mɔ te edwɛkɛ ne, noko akee bɛnde ɔ bo.

11 "Ɛrɛlɛ ne abo ɛne: Ma ne a le Nyamenle edwɛkɛ ne. 12 Ma ne mɔɔ guale ademgbole ketekete ne azo la gyi ɛkɛ ne maa menli ahonle ɛsesebɛvoma mɔɔ tie Nyamedwɛkɛ ne, na abɔnsam ba baye fi bɛ ahonle ne mɔ anu, na ɔmmaa bɛnlie edwɛkɛ ne bɛnli amaa bɛanyia ngoane mɔɔ ɔnlɛ awieleɛ la. 13 Ma ne mɔɔ guale awolɛ ne azo la gyi ɛkɛ ne maa menli mɔɔ fa fɛlɛkolilɛ tie edwɛkɛ ne, na edwɛkɛ ne ɛngola ɛndɛnla bɛ ahonle ne mɔ anu bɛnva bɛmbɔ bɛ ɛbɛla la. Bɛze kɛ edwɛkɛ ne le nɔhalɛ, na bɛdie bɛdi mekɛ ezinraa bie, na saa sɔnea kpole bie ba bɛ nwo zo ala a, ɛnee bɛkpo aze. 14 Ma ne mɔɔ guale mbowule nu la a le bɛdabɛ mɔɔ bɛtie na bɛdie Nyamedwɛkɛ ne bɛdi, na nzinlii ye, nyanelilɛ nee anyiabɛnwo boka gyinlabelɛnyialɛ nee ewiade fɛlɛkolilɛ bayeye fi bɛ ahonle nu la. Ɔlua ɛhye ati bɛngola bɛmboa awie biala bɛmmaa ɔnlie Nyamedwɛkɛ ne ɔnli.

15 "Na ma ne mɔɔ guale azɛlɛ kpalɛ ne azo la a le bɛdabɛ mɔɔ bɛfa nɔhalɛ, nee ahonle kpalɛ bɛtie edwɛkɛ ne na bɛsɔ nuhua kpundii bɛfa bɛbɔ bɛ ɛbɛla la."

16 Akee Gyisɛse bizale kɛ, "Nwane a ɛde ye ɛlɛ kɛ awie ɛzɔ kɛnlaneɛ na yeva debie yeheda zolɛ ammaa yeanda a? Kyɛkyɛ, bɛsie kɛnlaneɛ wɔ anwuma ɛleka wienyi nu amaa awie biala anwu ye. 17 Ɛhye kile nɔhalɛ ne kɛ, kenle bie debie biala mɔɔ wɔ menli ahonle nu la bala ali. 18 Ɔti bɛnlea bɛ nwo boɛ wɔ kɛ bɛsi bɛtie edwɛkɛ la; ɔluakɛ awie ko biala mɔɔ lɛ bie la, yemɔ yɛɛ bɛbamaa ye bie dɔɔnwo a; na mɔɔ ɛnlɛ bie la, ekyi ne bɔbɔ mɔɔ ɔlɛ ye la bɛbaza ye bɛalie."

19 Na ɔrale kɛ, kenle ko bie, mɔɔ ɔ nli nee ɔ mediema mrenyia ne mɔ hɔle kɛ bɛkanlea ye la, bɛangola bɛangɔ ɔ nwo ɛkɛ ne, ɔluakɛ ɛnee menli ekpunli ekpunli dɔɔnwo wɔ ɔ nwo ɛkɛ. 20 Bɛzele ye kɛ, "Ɛ nli nee ɛ mediema ne mɔ gyigyi alie nwo nehane ɛlɛkpondɛ wɔ." 21 Ɔbuale bɛ ɔzele kɛ, "Ɔmɔ nee me mediema a le menli mɔɔ tie Nyamedwɛkɛ ne na bɛdi zolɛ la."

22 Kenle ko bie, Gyisɛse nee ye ɛdoavolɛma ne mɔ vole ɛlɛne nu, na ɔzele bɛ kɛ, "Bɛmaa yɛpɛ azule tandane ne yɛhɔ ɔ nzi nehane." 23 Mɔɔ bɛpɛ azule ne la nafelɛ vale ye, na mekɛ mɔɔ ɔwɔ nafelɛ nu la, ahumu kpole bie bɔle ɔ bo kɛ ɔtu. Na bɛ ɛlɛne ne bɔle ɔ bo kɛ ɔsia.

24 Bɛdule bɛhɔle ɔ nwo zo bɛhɔdunwuele ye bɛdeɛdeanle nu bɛzele kɛ, "Yɛmenle, Yɛmenle, yɛlɛnoma!"

Ɔdwazole ɔdendɛle na ɔbɛlale anwoma ne nu ɔzele kɛ, "Ka aze fɛɛnye," na anwoma ne nee azɛlɛkye ne mɔ hanle aze na ɛkɛ ne yɛle kɛnlanana zɛhae! 25 Akee ɔbizale bɛ kɛ, "Bɛ diedi wɔ nienwu?"

Ɛzulolɛ kpole hanle bɛ eza ɔyɛle bɛ azibɛnwo na bɛbizale bɛ nwo ngoko ngoko kɛ, "Duzu sonla a le ɛhye, mɔɔ anwoma nee ahumu nee azɛlɛkye bɔbɔ tie ye a?"

26 Amozi ye, bɛpɛle azule tandane ne bɛvile Galeli bɛhɔle Gɛlasa maanle nu, na bɛhɔdwule ɔ nzi. 27 Mekɛ mɔɔ ɔvi ɛlɛne ne anu ɔdwu aze la, nrenyia bie mɔɔ sunsum evinli ɛva ye ɛhye na ɔvi sua kpole bie mɔɔ bɛfɛlɛ ye Gɛlasa la azo la yiale ye. Nrenyia ɛhye ɛnlɛ aako biala; yɛɛ eza ɔlɛ ɔ nwo zɔ. Yeanga ye zɔ, ɔde aziezo. 28 Ɔ nye bɔle Gyisɛse anwo zo ala la, ɔdeɛdeanle nu na ɔbutule aze wɔ ɔ nyunlu ɛkɛ ne ɔzele kɛ, "Duzu debie a ɛkpondɛ wɔavi me ɛkɛ a, Gyisɛse, Anwuma Nyamenle Bedevinli Ra? Yɛmenle, mebodo wɔ, mmayɛ me ayɛkayɛkadeɛ!"

29 Ɛnee Gyisɛse ɛlɛtu sunsum evinli ne mɔɔ wɔ ye nu la. Saa ɔdwu mekɛ ne bie na sunsum evinli zɔhane bawolo nrenyia ne nu wɔ mekɛ mɔɔ ɛnee bɛgua ye nwɔnzɔnwɔnzɔ bɔbɔ la a, ɔtete nu ɔdie ɔ nwo na ɔriandi ɔkɔtɔ fiemgbole ne azo. 30 Gyisɛse bizale sunsum evinli ne kɛ, "Kɛ bɛfɛlɛ wɔ ɛ?" Sunsum evinli ne buale zele kɛ, "Ɛlɔne", ɔluakɛ ɛnee sunsum evinli dɔɔnwo ɛwolo ye nu. 31 Mbɔnsam ne mɔ bodole ye kɛ ɔmmatu bɛ ɔgua kuma kulongulo ne anu.

32 Ɛnee agbolike kpolane bie wɔ adidi wɔ awoka bie mɔɔ bikye ɛkɛ ne la agye nu, ɛhye ati sunsum evinli ne mɔ bodole ye kɛ ɔmaa bɛhɔwolowolo agbolike kpolane ne mɔ anu. Ɔti Gyisɛse zele bɛ kɛ, "Wioo, bɛhɔ." 33 Ɛkɛ ne ala bɛvile nrenyia ne nu, na bɛhɔwolole agbolike kpolane ne mɔ anu, na ɛkɛ ne ala agbolike kpolane ne amuala dule twi bɛwulule pemgbɛne ne na bɛguale nyevile ne anu bɛwule. 34 Agbolikeneavolɛma ne mɔ vale ɛnriandinlɛ hɔle sua kpole ne mɔɔ bikye bɛ la nee awoka ne mɔ azo, na mɔɔ bɛkɔ la ɛnee bɛlɛka mɔɔ bɛnwu ye la anwo edwɛkɛ.

35 Yeangyɛ biala menli ekpunli dɔɔnwo bie rale kɛ bɛbanlea mɔɔ ɛzi la bɛ nye zo, na mɔɔ amgba noko bɛnwunle ye la a le kɛ, nrenyia ne mɔɔ ɛnee sunsum evinli ne ɛwolo ye nuhua la heda ɛdanlɛ, yezia yera ye dɛba nu, na ɔde Gyisɛse anyunlu ɛkɛ ne koonwu. 36 Menli mɔɔ ze ye na bɛnwunle kɛsi mɔɔ bɛyɛle ye ayile la hanle ɔ nwo edwɛkɛ hilele menli mɔɔ rale amozi ye la. 37 Akee menli ne bodole Gyisɛse kɛ ɔvi bɛ maanle ne anu ɔhɔ ɔluakɛ ɛnee ɛzulolɛ kpole ɛha bɛ. Ɔti ɔziale ɔ nzi ɔhɔvole ɛlɛne ne anu ɔpɛle azule tandane ne ɔhɔle ɔ nzi lɔ.

38 Nrenyia ne mɔɔ sunsum evinli ne vile ye nu minlinle la, bodole ye kɛ ɔ nee ye kɔ na Gyisɛse amkponle zolɛ.

39 Gyisɛse gyakyile ye adenle, na ɔzele ye kɛ, "Sia ɛ nzi kɔ wɔ mbusuafo anwo lɔ, na kɔha nwanwanedeɛ kpole ɛhye mɔɔ Nana Nyamenle ɛyɛ ɛmaa wɔ la kile bɛ."

Ɛhye ati ɔzile nu ɔhɔle, na ɔhɔhanle nwanwanedeɛ bedevinli ne mɔɔ Gyisɛse ɛyɛ ɛmaa ye la wɔ sua ne azo amuala.

40 Wɔ azule tandane ne anzi nehane, menli ekpunli ekpunli ne mɔɔ ɛnee ɛhendɛ ye ɛhyɛ la liele ye awawatuu.

41 Ɔrale ye kɛ, nrenyia bie mɔɔ bɛfɛlɛ ye Gyeeyaelɛse, mɔɔ le Dwuuma ayiasua ne anu kpanyinli la rale, na ɔdule ɔdɔle aze wɔ Gyisɛse anyunlu ɔzɛlɛle ye kɛ, ɔ nee ye ɛhɔ ye sua nu, 42 ɔluakɛ ɔ ra ralɛ raalɛ ekyi kokye, mɔɔ ɛli ɛvolɛ bulu nee nwiɔ la, ɛlɛdie ewule awu. Gyisɛse vale menli ekpunli ekpunli ne avinli na ɔ nee ye hɔle.

43,44 Na mɔɔ bɛkɔ la, raalɛ bie mɔɔ mogya ɛdu ye dedee ɛvolɛ bulu nee nwiɔ, na awie biala ɛngola ye ayile yɛ la lile ɔ nzi; ɔzɔle Gyisɛse tɛladeɛ ne anloa, na ɛkɛ ne ala mogya ne mɔɔ tu ye la gyakyile.

45 Gyisɛse bizale kɛ, "Nwane a zɔle me la?"

Awie ko biala zale ɔ ne kɛ tɛ ɔdaye ɔ. Pita hanle kɛ, "Yɛmenle, ɛdawɔ ɛze kɛ menli pemgbenlamgbe ɛhomo yɛ nwo zo."

46 Gyisɛse zele ye kɛ, "Kyɛkyɛ, awie anyefuu a zɔle me a, ɔluakɛ mete ye wɔ me nu kɛ me tumi ne azo ɛde."

47 Mɔɔ raalɛ ne nwunle kɛ Gyisɛse ɛnwu mɔɔ ɛzi la, ɔvale anwowozolɛ ɔrahotole aze wɔ Gyisɛse anyunlu, na ɔhanle deɛmɔti mɔɔ ɔzɔle ye nu la, na ɔhanle kɛsi mɔɔ akee yede kpɔkɛ arɛlevilɛ nu la ɔhile ye wɔ menli ne kpokpoti anyunlu.

48 Gyisɛse zele ye kɛ, "Bɛlɛra, wɔ diedi ɛmaa wɔde kpɔkɛ. Kɔ anzondwolɛ nu."

49 Mɔɔ ɔ nloa wɔ zo ɔtendɛ ɔkile ye la, awie vi Gyeeyaelɛse aako nu rale rabɔle ye amaneɛ zele kɛ, "Ɛ ra raalɛ ne ɛwu. Ɔngyia kɛ ɛkɛgyegye Kilehilevolɛ ne bieko."

50 Mɔɔ Gyisɛse dele ɛhye la, ɔzele kɛ, "Mmasulo! Wɔmɔ die me di, na ɔbade kpɔkɛ."

51 Mɔɔ bɛhɔdwule Gyeeyaelɛse aako ne anu la, Gyisɛse ammaa awie biala adenle ammaa ɔ nee ye angɔ ekpumgbunli ne anu, kyesɛ Pita, Dwɔn nee Gyemise, boka kakula ne ɔ ze nee ɔ nli. 52 Mekɛ ɛhye anu ɛnee menli ne amuala mɔɔ wɔ aako ne anu la ɛlɛsu ye awolɛ. Gyisɛse zele bɛ kɛ, "Bɛmmasu! Ɔtɛwule; yela ala!" 53 Ɛhye maanle bɛzile ye amgbu na bɛzelele ye, ɔluakɛ bɛ muala bɛze kɛ yewu.

54 Gyisɛse zɔle bɛlɛra ne asa na ɔzele ye kɛ, "Bɛlɛra, dwazo!" 55 Na ɛkɛ ne ala ɔ nye zo tetele ye, na ɔwulule ɔgyinlanle! Akee Gyisɛse zele kɛ, "Bɛmaa ye aleɛ ɔli!" 56 Edwɛkɛ ne yɛle bɛlɛra ne ye awovolɛma ne mɔ azibɛnwo totohyia, na akee bɛnyianle ahomeka molozo, na emomu Gyisɛse bɔle be nloa kɛ bɛmmaka mɔɔ yeyɛ mɔɔ bɛnwu ye la bɛkile awie biala.