1 Kenle ko bie, Gyisɛse vɛlɛle ye ɛdoavolɛma bulu nee nwiɔ ne ɔboale bɛ nloa, na ɔmaanle bɛ anwosesebɛ, akɛnrazilɛ, nee tumi wɔ mbɔnsam nwo zo, tumi mɔɔ bɛfa bɛtu bɛ, ɔ nee mɔɔ eza bɛkola bɛfa bɛtondo ewule ngakyile biala a. 2 Akee ɔzoanle bɛ kɛ bɛhɔha Nana Nyamenle Anwuma belemgbunli maanle ne anwo edwɛkɛ bɛhile aleɛabo amra kosooti, na bɛyɛ wuliravolɛma ayile.

3 Ɔzele bɛ wɔ tumi nu ala kɛ, "Bɛmmafa debie biala, bɔbɔ kpɔma, anzɛɛ kodoku, anzɛɛ aleɛ, anzɛɛ ezukoa bɛdɛ bɛ sa nu. Bɛmmafa adɛladeɛ mɔɔ bo ko bɔbɔ la bɛtu adenle ne. 4 Bɛkɔ sua anzɛɛ namule biala azo a, bɛzokoɛ aako kokye ala anu, na bɛdɛnla ɛkɛ ne ala kɔkpula mekɛ mɔɔ bɛkɛvi ɛkɛ la.

5 "Sua biala mɔɔ bɛkɛhɔ zo mɔɔ ye menli anlie bɛ la, saa bɛvi ɛkɛ ne bɛbahɔ a, bɛkpokpo bɛ gyakɛ abo munlutu bɛgua ɛkɛ ne bɛva bɛli daselɛ bɛtia bɛ."

6 Ɔti bɛbɔle ɔ bo kɛ bɛkpɔsɛkpɔsa namunamu ne mɔ azo, na bɛka Nyamenle edwɛkɛ ne, eza noko bɛyɛ wuliravolɛma ayile.

7 Mɔɔ amɛnlado Hɛlɔdo dele nwanwane ninyɛne mɔɔ Gyisɛse ɛlɛyɛ la, ɔyɛle ye atetee somaa ne ala, na eza ye adwenle yɛle ye kpomgbondee, ɔluakɛ ɛnee menli ɛlɛkeha ye kɛ, "Dwɔn Sɔnevolɛ ne a ɛvi ewule nu ɛdwazo la"; 8 yɛɛ bie mɔɔ noko zele kɛ, "Yilaegya anzɛɛ mɔmoane ngapezoma ne mɔ anu bie a ɛvi ewule ne ɛdwazo la." Mekɛ ne anu ɛnee huhuhuhu ɛhye mɔ amuala ɛlɛkɔ zo wɔ maanle ne anu.

9 Hɛlɔdo hanle kɛ, "Mempɛle Dwɔn ati, na nwane a le sonla ɛhye mɔɔ metɛte ɔ nwo edwɛkɛ ɛzulolɛ ɛzulolɛ zɛhae la?" Na ɔbɔle mɔdenle kɛ ɔbanwu sonla holɛ ko ne.

10 Mɔɔ ɛdoavolɛma ne mɔ ziale rale Gyisɛse anwo ɛkɛ ne rahanle mɔɔ bɛyɛ la hilele ye la, ɔwolole bɛ sa abo nyaa na ɔ nee ye ɛdoavolɛma ne mɔ bɔle bɛ ti wɔ Bɛteseeyeda sua kpole ne azo. 11 Na menli ekpunli ekpunli ne nwunle ɛleka mɔɔ ɔlɛkɔ la, na bɛdoale ye. Ɔliele bɛ ɔ sa amu nwiɔ, ɔhilehilele bɛ Anwuma belemgbunli maanle ne anwo edwɛkɛ, na ɔyɛle nuhua ne mɔ mɔɔ ɛnde kpɔkɛ la ayile.

12 Mɔɔ sɛnzɛne ne ɛlɛba aratolo la, ɛdoavolɛma bulu nee nwiɔ, ne amuala hɔle ɔ nwo ɛkɛ ne, na bɛhɔzele ye kɛ ɔmaa menli ne bie mɔ ɛhɔ namunamu ɔ nee ɛya ɛya mɔɔ bikye bɛ la anu bɛhɔkpondɛ aleɛ nee dabelɛ bɛhendɛ aledwolɛ ne. Bɛhanle kɛ, "Debie biala ɛnle azɛlɛ ye mɔɔ menli ɛdu ɛvi zo la azo mɔɔ menli ne bali a."

13 Gyisɛse buale bɛ zele kɛ, "Bɛmɛ bɛmaa bɛ aleɛ!"

Bɛannyia ye ndelebɛbo, ɔti bɛ nee ye zule kpolera bɛhanle kɛ, "Na duzu ɔ, yɛlɛ kpanwo dolɔfo nnu ɔ nee fɛlɛ nwiɔ wɔ ɛke, na emomu ɔnrɛza menli dɔɔnwo ɛhye; anzɛɛ ɛkulo kɛ yɛkɔ yɛkɔtɔ aleɛ dɔɔnwo yɛmaa bɛ ɔ?" 14 Ɔluakɛ ɛnee menli mɔɔ wɔ ɛkɛ ne la kɛdwu kɛyɛ apenle nnu.

Gyisɛse buale bɛ zele kɛ, "Wɔmɔ ka kile menli ne kɛ bɛdɛnlɛdɛnla aze ekpunli kɛyɛ abulanlu abulanlu." 15 Na bɛyɛle ye zɔ.

16 Gyisɛse vale kpanwo dolɔfo nnu ne boka fɛlɛ nwiɔ ne na ɔnleanle anwomanyunlu ɔyɛle mo. Akee ɔbubule kpanwo ne anu nzokenzoka na ɔvale ɔmaanle ye ɛdoavolɛma ne mɔ kɛ bɛva bɛmaa menli ekpunli ekpunli ne mɔ. 17 Na awie biala lile bie maanle ɔ ko yile tɛkɛɛ; bɔbɔ eza bɛnyianle ɔ bo zo mgbokpoleka ahɛndɛne bulu nee nwiɔ!

18 Kenle ko bie mɔɔ ɛnee ɔ ngome ɔlɛyɛ nzɛlɛlɛ wɔ mekɛ mɔɔ ɛnee ye ɛdoavolɛma ne mɔ bikye ye la, ɔhɔle bɛ nwo ɛkɛ ne na ɔbizale bɛ kɛ, "Kɛ menli si dwenle me ɛ?"

19 Bɛbuale ye bɛzele kɛ, "Dwɔn Sɔnevolɛ ne. Bie mɔ noko se, Yilaegya ɔ, yɛɛ mɔɔ ɛha la se mɔmoane ngapezoma ne mɔ anu ko mɔɔ vi ewule nu ɛdwazo la ɔ."

20 Akee ɔbizale bɛ kɛ, "Bɛdwenle kɛ nwane a le me?"

Pita buale zele kɛ, "Ngoanedievolɛ, Kelaese mɔɔ le Nyamenle Ra ne la ɔ!"

21 Ɔbɔle bɛ nloa kɛ, bɛmmaka ɛhye bɛkile awie biala. 22 Ɔhanle kɛ, "Ɔwɔ kɛ Mame Sonla Ra ne menwu nyane dɔɔnwo, na eza noko Dwuuma mgbanyima mɔɔ li bɛ asɔne ne ati boka maanle mgbanyima, azɛlɛvolɛ mgbanyima, nee Mɛla kilehilevolɛma ne mɔ kpo me, na bɛku me; na ye kenle nsa anzi, mebadwazo meavi ewule nu meara ngoane nu bieko!"

23 Akee ɔhanle ɔhilele bɛ muala kɛ, "Bɛ nuhua ko biala mɔɔ kulo kɛ ɔtoa me bo zo la ɔwɔ kɛ fa ye ɛhulolɛdeɛ nee ye anyelielɛ muala sie ahanle, na ɔsoa ye meanubaka ne dahuu ɔbikye me! 24 Bɛ nuhua biala mɔɔ ɔlua me ti ɔkɛhwele ye ngoane la, ɔ sa baha ye, na emomu nuhua biala mɔɔ kɛbɔ mɔdenle kɛgyinla zo ɛsesebɛ kɛ ɔfa ye ngoane yeazie la ɔkɛhwele ye. 25 Na duzu nvasoɛ yɛɛ awɔ ɛkɛ ne maa sonla, kɛ ɔkɛnyia ewiade ye ninyɛne muala na ɔkɛminli ye ɛkɛla a?

26 "Awie biala mɔɔ kɛze nyiane wɔ me nee me edwɛkɛ ne anwo la, saa medame Sonla Ra ne mesia meba wɔ me anyunlunyia nee Egya ne anyunlunyia nu nee anwumabɔvolɛma nwuanzanwuanzama ne mɔ duma nu a, mebaze ye nyiane zɔhane ala. 27 Nɔhalɛ sikalɛ ne a le kɛ, bɛ nuhua bie mɔ mɔɔ gyigyi ɛke kɛkala la ɛnrɛnwu ewule ɛlɛ, kyesɛ bɛnwu Nana Nyamenle Anwuma belemgbunli maanle ne!"

28 Kenle mɔtwɛ pɛle nu zenle la, ɔvale Pita, Gyemise, nee Dwɔn ɔhɔle awoka ne mɔ azo kɛ ɔkazɛlɛ. 29 Na mɔɔ ɔyɛ nzɛlɛlɛ ne la, ɔ nyunlu bɔle ɔ bo kɛ ɔta, na ye adɛladeɛ ne mɔ dale yɛle fufule nwohyee kɛ asukɔntweaba. 30 Ɛkɛ ne ala, menli nwiɔ, Mosisi nee Yilaegya, vindele ɛkɛ na bɛbɔle ɔ bo kɛ bɛ nee ye tendɛ! 31 Bɛ nwo te bɔkɔɔ wɔ anyunlunyia nu, na ɛnee bɛlɛdi ye ewule ne mɔɔ ɔbawu wɔ Gyɛlusalɛm kɛmɔ Nyamenle ngyehyɛleɛ ne se la anwo adwelie.

32 Ɛnee Pita nee ɔ sa zo bɛmɛ nafelɛ ɛsosɔ bɛ nye kpomgbondee zɛhae ala. Ɔti ɛnee bɛla. Na mɔɔ bɛdwazole la, bɛnwunle kɛ Gyisɛse anyunlu ɛlɛta wienyi wɔ anyunlunyia nu, na menli nwiɔ gyi ɔ nwo ɛkɛ ne. 33 Mɔɔ Mosisi nee Yilaegya bɔle ɔ bo kɛ bɛtwe bɛ nwo la, Pita, mɔɔ ɛnee ye adwenle ɛha ɛbɔ nu na ɔnnwu mɔɔ ɔlɛka la deanle nu zele kɛ, "Awulae, ɛhye yɛ azibɛnwo! Yɛbabɔ kpɔda nsa; wɔ deɛ ko, Mosisi deɛ ko, yɛɛ Yilaegya noko deɛ ko!"

34 Na mɔɔ ɔ nloa wɔ zo ɔtendɛ la, amungu rahedale bɛ ti zo; na ɛzulolɛ kpole hanle bɛ. 35 Na ɛnelɛ bie vi amungu ne anu zele kɛ, "Ɛhye a le me Ra ne mɔɔ mekulo ye la; bɛdie ye."

36 Na mɔɔ ɛnelɛ ne gyakyile la, Gyisɛse nee ye ɛdoavolɛma ne mɔ angome a hale ɛkɛ ne a. Bɛanga edwɛkɛ mɔɔ zile ɛkɛ ne la bɛangile awie biala dedee ɔhyɛle kpalɛ.

37 Aleɛ hyenle mɔɔ bɛvi boka ne azo bɛdwu aze la, menli ekpunli bie nee ye yiale, 38 na nrenyia ko mɔɔ boka menli ekpunli ne anwo la deanle nu zele kɛ, "Kilehilevolɛ, mebodo wɔ, nea me ra ye, menlɛ bɛ nwiɔ, 39 na sunsum evinli bawolo ye nu, ɔmaa ɔkponle, na eza ɔmaa ɔfuandivuandi ɔ nwo kɛ asɛɛ anwuma ɛdɔ ɔ nwo zo la, na eza ɔ nloa pɛ awubue; dahuu biala ɔka ye mɔɔ ɔmmaa ɔnnyia ɔ nwo adenle a. 40 Membodole wɔ ɛdoavolɛma ne mɔ kɛ bɛdu sunsum evinli ne bɛvi ye nu, noko akee bɛangola."

41 Gyisɛse zele ye ɛdoavolɛma ne mɔ kɛ, "Ao, bɛmɛ gyegyeravolɛma mɔɔ bɛnlɛ diedi a! Me nee bɛ ɛdɛnla na menzi bɛ nwo abotane mengɔndwu kenle nzu? Fa ɛ ra ne bɛla ɛke."

42 Mɔɔ kakula ne kɔ la, sunsum evinli ne pɛle ye finle aze, na ɔmaanle ɔvuandivuandinle ɔ nwo kɛ asɛɛ anwuma ɛdɔ ɔ nwo zo la. Gyisɛse deanle sunsum evinli ne nu maanle ɔvile ye nu ɔvindele, na ɔyɛle ye ayile ɛkɛ ne ala ɔvale ye ɔmaanle ɔ ze.

43 Ɛzulolɛ hanle menli ne wɔ mekɛ mɔɔ bɛnwunle kɛ Nyamenle tumi ne ɛlɛyɛ ye gyima la.

Mekɛ mɔɔ bɛkeha nwanwane ninyɛne mɔɔ Gyisɛse ɛlɛyɛ la, ɔzele ye ɛdoavolɛma ne mɔ kɛ, 44 "Bɛdie me, na bɛhakye mɔɔ meka la. Bɛbaye Mame Sonla Ra ne bɛamaa." 45 Ɛdoavolɛma ne mɔ ande mɔɔ ɔka la abo, ɔluakɛ ɛnee bɛ adwenle ɛminli bɛ na eza bɛsulo kɛ bɛkɛbiza ye.

46 Akee kpolera zile bɛ avinli mɔɔ fale bɛ nuhua ko ne mɔɔ bayɛ kpole wɔ Anwuma belemgbunli maanle ne mɔɔ ɛlɛba la anu la. 47 Na kɛmɔ Gyisɛse ze bɛ adwenle la ati, ɔvale kakula ekyi bie ɔziele ɔ nwo ɛkɛ, 48 na ɔzele bɛ kɛ, "Awie biala mɔɔ kɛlie kakula ekyi ɛhye wɔ me duma nu la, ɛnee yelie medame mumua ne! Yɛɛ awie biala noko mɔɔ kɛlie me la, ɛnee yelie Nana Nyamenle ne mɔɔ zoanle me la. Na mɔɔ le bɛ nuhua kakula la yemɔ a le kpole a." 49 Dwɔn, mɔɔ le ɛdoavolɛma ne mɔ anu ko la hɔle ɔ nwo ɛkɛ ne na ɔzele ye kɛ, "Yɛmenle, yɛnwunle awie ko mɔɔ ɛlɛfa wɔ duma adu sunsum evinli evinli avi menli nu a. Na yɛzele ye kɛ ɔgyakyi. Ɔluakɛ ɔyɛ biala a, ɔmboka yɛ ekpunli ne anwo."

50 Na Gyisɛse zele kɛ, "Anrɛɛ ɔnle kɛ bɛyɛ zɔhane! Ɔluakɛ awie ko biala mɔɔ ɛngo ɛntia wɔ la ɛnee ɔwɔ wɔ afoa."

51 Mekɛ mɔɔ ye anwuma maanle nu ɛhɔlɛ ne bikyele la, ɔdule ɔdenrɛle kɛ ɔkɔ Gyɛlusalɛm

52 Ɔzoanle menli lumuale ɔ nyunlu wɔ Samɛlea namule bie azo kɛ bɛhɔkpondɛ sua mɔɔ bɛkɔ a bɛbala nu la bɛzie ye ɛkɛ. 53 Na mɔɔ bɛhɔle la bɛvoanle bɛ! Menli mɔɔ wɔ namule ne azo la amkponle zo kɛ bɛkɛmaa bɛ dabelɛ, ɔluakɛ ɛnee Gyɛlusalɛm yɛɛ bɛlɛkɔ a.

54 Mɔɔ Gyemise nee Dwɔn dele mɔɔ zile la, bɛhanle bɛhilele Gyisɛse kɛ, "Awulae, asoo ɔle kpalɛ kɛ yɛkɛmaa adenle yɛkɛmaa senle vi anwuma kɛrayela menli ne amuala ɔ?" 55 Na Gyisɛse angulo ɛhye, ɔti ɔdeanle bɛ, 56 na bɛhɔle namule gyɛne bieko azo.

57 Mɔɔ bɛlua bɛkɔ la, awie ko hanle hilele Gyisɛse kɛ, "Ɛleka biala mɔɔ ɛbahɔ la mebadoa wɔ."

58 Na Gyisɛse buale ye zele kɛ, "Kakye kɛ, Menlɛ me ti anwo ɛleka bɔbɔ mɔɔ mefa me ti meto a. Nane ɛzonlɛ mɔ lɛ bɛ adunli mɔɔ bɛda nu a, yɛɛ nloma lɛ bɛ sane, na Mame, Sonla Ra ne, menlɛ aako biala fee wɔ azɛlɛ ye azo."

59 Mekɛ guale nu bie la, eza ɔzele nrenyia bie kɛ, "Bɛla badoa me." Na nrenyia ne zele ye kɛ, "Maa menumua mengɔ mengɔnzie egya kolaa."

60 Gyisɛse buale zele kɛ, "Maa sunsum nu mɔwuamra ɛzie bɛ nwo. Na wɔmɔ, kɔ na kɔha Nana Nyamenle Anwuma belemgbunli maanle ne anwo edwɛkɛ kile ewiade amra amuala."

61 Na awie bieko noko ɔdaye ɔhanle kɛ, "Ɛhɛe, Awulae, mebara, na emomu maa menumua menzɛlɛ menli mɔɔ wɔ sua nu la adenle."

62 Gyisɛse zele ye kɛ, "Awie biala mɔɔ kɛmaa ye adwenle kɛvi gyima mɔɔ mehyehyɛ memaa ye la azo la ɛnfɛta kɛ ɔkɛdɛnla Nana Nyamenle belemgbunli maanle ne anu."