Atos 12

पतरासो कैद खानै का छ़ुटणअ

1 तेऊ ज़मानैं छ़ाडी हेरोदेस राज़ै सैना एरुशलेम नगरीए विश्वासी च़ेल्‍लै कैद खानै कैद करना लै। तेऊ किऐ कई विश्वासी टोलीए सैणैं कैद सह तिन्‍नां लै ज़ुल्म करे। 2 तेऊ पाअ जोहन्‍ना शधाणूंओ भाई याकब बी तलबारा करै मारी।

3 ज़ांऊं तेऊ भाल़अ कि यहूदी मणछ हआ एता करै खुशी, तेऊ ढाकअ पतरास बी, तिंयां थिऐ आखरी रोटीए थैरे धैल़ै। 4 तेऊ बझ़ैल़अ पतरास ढाकणैं संघा डाहअ कैद खानै गोटी। बागै डाहै खास्सै धैल़ै तैणीं पहरै लै च़ऊ बाखा च़ार-च़ार सपाही इहअ सोठी लाई कि ऊवार्णे थैरा बाद निंणअ सह लोगा सम्हनै।

5 कैद खानै बागै त पतरासा लै पहरअ पाअ द अर विश्वासी टोलीए सोभै भाई-बैहण तै एक मन्‍न हई कबल्‍लै परमेशरा का प्राथणां करदै लागै दै।

6 हेरोदेस राज़ै सम्हनै पतरासा लै मकदमैं हणैं धैल़ी का पैहली राची थिअ पतरास दूई शांघल़ी करै बान्हीं कैद किअ द, संघा त दूई सपाही मांझ़ै सुत्तअ द। पहरी तै राची दुआरै पहरै दैंदै लागै दै। 7 हेरा, तिधी खुडी आअ एक प्रभूओ स्वर्ग दूत अर सह तिधी खल़्हुअ अर तैहा खुडी च़मकअ प्रैश्शअ। तेऊ बाही पतरासे कुछी हाथा करै संघा झ़ैऊअ खल़अ, तेखअ बोलअ इहअ, "उझ़ू, छ़ेक्‍कअ कर!" पतरासे हाथै बान्हीं दी शांघल़ी पल़ी धरनीं।

8 तेखअ बोलअ स्वर्ग दूतै तेऊ लै, "आपणअ च़ोल़अ अर पोलल़ै बान्ह।" पतरासै किअ तिहअ ई। तेखअ बोलअ स्वर्ग दूतै, "आपणैं झिकल़ै बान्हीं एछ मुंह पिछ़ू।"

9 पतरास निखल़अ कैद खानै का तेऊ संघै बागै संघा लागअ तेऊ पिछ़ू हांढदअ। पर तेऊ का निं इहअ थोघ बी थिअ कि ज़ुंण अह स्वर्ग दूत आसा आअ द, अह सच्च़ी आसा कि नांईं। तेऊ सोठअ इहअ कि हुंह आसा सुपनै भाल़अ लागअ द? 10 तेखअ पुजै तिंयां दुजै पहरै निखल़ी लोहे प्रऊल़ी सेटा, ज़ुंण नगरी बाखा खुल्हा ती, सह खुल्ही तिन्‍नां लै आप्पै अर तिंयां डेऊऐ एकी घाटी बाता बाती आजू अर ज़ांऊं तिंयां तैहा बाता का आजू निखल़ै, स्वर्ग दूत डेऊअ पतरासा छ़ाडी।

11 तेखअ ज़ांऊं पतरासा शाह फिरअ, तेऊ बोलअ, "ऐबै गअ मुखा थोघ लागी कि प्रभू छ़ाडअ मुल्है हेरोदेस राज़ेए हाथा का बच़ाऊंणा लै स्वर्ग दूत अर यहूदी ज़िहअ हणें आशा थिऐ रहै दै, सह निं तिहअ हुअ।"

12 तेखअ आअ सह इहअ सोठी करै परमेशरै बच़ाऊअ हुंह आझ़, जोहन्‍ने ईज मरिअमे घअरा लै, ज़हा लै मार्कुस बोला, तिधी थिऐ खास्सै ज़ण्हैं बेठै दै प्राथणां करदै। 13 ज़ांऊं तेऊ दुआर टोक्‍कदअ लागअ, एक रुदा नाओंए दासी आई शूणीं। 14 पतरासे हाक शूणीं ठुर्ही सह बडी खुशी-खुशी भितरा लै अर खुशीए मारै बिस्सरुई सह दुआरा खोल्हणैं बी अर तैहा खोज़अ सोभी का, "पतरास आसा दुआरै खल़्हुअ द।"

15 तिन्‍नैं होरी बोलअ तैहा लै, "तूह निं होशा दी आथी।" पर तैहा बोलअ होर बी विश्वासा संघै, "पतरास ई आसा।" पर होरी बोलअ इहअ कि तेऊओ स्वर्ग दूत हणअ।

16 पर पतरास रहअ दुआरा टोक्‍कदअ लागी, ज़ांऊं तिन्‍नैं दुआर घुआल़अ, तिंयां हुऐ रहैन। 17 तेखअ किअ पतरासै तिन्‍नां लै हाथा करै शारअ कि च़ुप्पी रहा अर तिन्‍नां का खोज़अ कि प्रभू किहअ करै काढअ हुंह कैद खानै का बागै। तेखअ बोलअ तेऊ इहअ, "याकब अर होरी भाई का बी खोज़ै ऐहा गल्‍ला।" तेखअ डेऊअ पतरास तिधा का दुजी ज़ैगा लै।

18 दोत्ती-दोत्थी हुऐ सपाही परशैन कि पतरास केस्सी डेऊअ! 19 ज़ांऊं हेरोदेस तेऊ लोल़अ लागअ, तेऊ निं सह भेटअ। तेखअ दैनी तेऊ पहरीए ज़ाच़-भाल़ करी तिन्‍नां लै सज़ा अर तिंयां पाऐ मारी अर हेरोदेस डेऊअ थोल़ै धैल़ै यहूदा छ़ाडी कैसरिया मुल्खा लै।

हेरोदेस राज़ेए मौत

20 हेरोदेस राज़अ थिअ सूर अर सदोन नगरी रहणैं आल़ै लोगा का नराज़। तिंयां आऐ सोभै कठा हई तेऊ सेटा अर राज़ेए दरबारी बलास्तुसा मनैऊंईं करै च़ाहा तै तिंयां मेल़-ज़ोल़ करनअ। किल्हैकि नाज़ा लै लागा त तिन्‍नां हेरोदेस राज़ेए मुल्खे आसरै रहणअ।✝12:20 1 राज़. 5:11; एज. 27:17

21 राज़ै खोज़ी डाहै दै धैल़ै बेठअ हेरोदेस राज़अ आपणअ सुआब अर हार-शंगार बान्हीं राज़गाद्दी दी संघा लागअ बोल्दअ।

22 ज़ुंण तिधी शूणैं तै लागै दै, तिन्‍नैं बोली एही गल्‍ल, "अह निं मणछ आथी अह आसा परमेशर लागअ द बोल्दअ।"

23 किल्हैकि लोग लागै परमेशरा छ़ाडी हेरोदेस राज़ेए प्रतप्पा खोज़दै। तेभी परमेशरो स्वर्ग दूत आअ अर हेरोदेस हुअ खास्सअ बमार। तेऊ पल़ै किल़ै अर थोल़ै बाद मूंअ सह किर्ही-किर्ही करै।✝12:23 दान. 5:20

24 पर परमेशरो बैण लागअ बढदअ अर सारै दी पुजदअ।

25 ज़ांऊं बरनबास अर शाऊल आपणीं च़ाकरी पूरी करी मुक्‍कै, जोहन्‍ना ज़हा लै मार्कुस बोला, तेऊ संघा आणी फिरै एरुशलेम नगरी लै बापस।