1 तेखअ डेऊअ सह दिरबे अर लुस्रा नगरी बी। तिधी त एक तिमोथी नाओं एक च़ेल्‍लअ, सह थिअ एकी विश्वासी यहूदी बेटल़ीओ च़ेल्‍लअ पर तेऊओ बाब त यूनान देशो। 2 तेऊओ त लुस्रा अर इकुनिम नगरीए सोभी विश्वासी भाई मांझ़ै भलअ नाअं। 3 पल़सी च़ाहअ इहअ कि अह निंणअ मुंह आप्पू संघै अर तिन्‍नां ज़ैगा ज़ुंण यहूदी मणछ रहा तै, तिन्‍नें तैणीं किअ पल़सी तिमोथीओ खतैर। किल्हैकि तिन्‍नां का बी त थोघ कि एऊओ बाब आसा यूनान देशो।

4 तिंयां रहा तै नगरी-नगरी डेऊंदी तिन्‍नां बधाना ज़ुंण एरुशलेम नगरी का शधाणूं अर विश्वासी टोलीए सैणैं ज़रूरी समझ़ै तै तिन्‍नां मनणा लै पजैल़ै लागी। 5 इहअ करै रही मसीहा दी विश्वास करनै आल़ेए टोली संघै खास्सै मणछ ज़ुल़दै लागी।

6 तिंयां डेऊऐ फ्रूगिआ अर गलात मुल्खै बाती अर पबित्र आत्मां किअ तिन्‍नां लै एशिया मुल्खै बैण खोज़णा लै नांईं। 7 मुसिआ नगरी नेल़ पुजी किअ तिन्‍नैं बिथूनिया नगरी लै डेऊणेओ बच़ार पर ईशूए आत्मां निं तिन्‍नां तिधा लै डेऊणैं दैनअ। 8 तेखअ डेऊऐ तिंयां मुसिआ बाती हांढ दैई पुजै त्रोआस नगरी।

9 पल़सी भाल़अ राची एक दर्शण कि एक मकिदुनिया मुल्खो मणछ खल़्हुअ अर तेऊ बोलअ अरज़ करी पारा बाखा होथी एछ मकिदुनिया मुल्खा लै अर म्हारी मज़त कर। 10 तेऊए दर्शणा हेरदी च़ाहअ हाम्हैं तेभी मकिदुनिया लै डेऊणअ, इहअ सोठी करै कि परमेशरै आसा हाम्हैं खुशीए समादा खोज़दै शादै दै।

11 तैही खोल्हअ हाम्हैं त्रोआस नगरी का ज़हाज़, संघा पुजै कोहरै सामोथ्रेस टापू अर दुजै धैल़ै पुजै नियापोलिस नगरी। 12 तिधा का पुजै हाम्हैं फलिप्पी नगरी ज़ुंण मकिदुनिया मुल्खै बडी नगरी आसा अर रोमी लोगो बसेरअ आसा। हाम्हैं रहै तैहा नगरी थोल़ै धैल़ै।

13 बशैघे धैल़ी डेऊऐ हाम्हैं नगरी बागै नदीए बाढै इहअ सोठी करै कि तिधी भेटणीं प्राथणां करना लै यहूदीए सभागृहा। संघा लागै तिधी नदीए बाढै बेशी तिधी ज़ुंण बेटल़ी कठा ती हुई दी तिन्‍नां संघै गल्‍ला करदै।

14 लुदिआ नाओंए थुआथिरा नगरीए बैंज़णीं रंगे झिकल़ै बेच़णैं आल़ी एक भगत बेटल़ी ती शूणीं लागी दी अर परमेशरै तेसो मन्‍न खोल्हअ ताकि पल़सीए गल्‍ला दी मन्‍न लाए। 15 ज़ांऊं तैहा पूरै टबरा संघी आपणैं पापो प्राश्त करी पाणीं डुबकी लई, तैहा किई अरज़ कि, ज़ै तम्हैं मुंह प्रभूए विश्वासी समझ़ा, तै रहा तम्हैं मेरै घअरै। तैहा निंयैं हाम्हैं मनैऊंईं आपणैं घअरा लै।

16 ज़ांऊं हाम्हैं प्राथणां करने ज़ैगा लै तै डेऊंदै लागै दै, तिधी भेटी हाम्हां एक ज़ुआन शोहरी ज़ुंण कसरी दासी थिई, अर तैहा दी ती एही आत्मां बस्सी दी, ज़ुंण तैहा लै आजू हणैं आल़ी गल्‍ला खोज़ा ती। तेता करै दैआ ती सह आपणैं मालका लै खास्सै ढब्बै खटी। 17 सह लागी हाम्हां अर पल़सी पिछ़ू एछी लैल़ा लांदी कि ईंयां मणछ आसा परम प्रधान परमेशरे दास, ज़ुंण हाम्हां का उद्धारे कथ्या खोज़ा।

18 सह रही कई धैल़ै तैणीं इहअ ई करदी लागी। पर पल़सी हुअ खास्सअ दुखी। खिरी फिरअ पल़सी पिछ़ू संघा बोलअ तैहा बेटल़ी भितरी बस्सै दै भूता लै, "हुंह बोला ताल्है, मसीहा ईशूए नाओंऐं निखल़ ऐहा बेटल़ी का पोर्ही।" सह भूत निखल़अ तेभी पोर्ही।

19 ज़ांऊं तेसे मालकै भाल़ी कि म्हारी ढब्बै-धेल्‍ले आशा बी हुई ऐबै खतम, तिन्‍नैं ढाकै पल़सी अर सिलास संघा आणै तिंयां च़फै लै अफसरा सम्हनै लै घिशी। 20 तिन्‍नैं बोलअ यहूदी मणछे सैणैं सेटा डेऊई, "ईंयां लोग ज़ुंण यहूदी आसा, इनै लाअ म्हारी नगरी बडअ उल़टफेर करी। 21 इनै लाई एही गल्‍ला खोज़ी कि तिंयां मनणी अर करनी आसा रोमी लोगा लै माल़ी।"

22 ज़ांऊं तिधी कठा हुऐ दै खास्सै मणछ तिन्‍नां लै कठा हई च़िक्‍कदै आऐ, सैणैं धेल़ै तिन्‍नें झिकल़ै अर तिन्‍नां लै दैनअ शोठै करै च़िक्‍कणैओ हुकम। 23 तिंयां च़िक्‍कै शोठै करै खास्सै, संघा डाहै कैद खानै गोटी। दरोगै लै डाहअ इहअ बोली कि इनो डाहै धैन। 24 इहअ हुकम शूणीं डाहै दरोगै डाहै तिंयां भितरली खुडी कैद करी अर तिन्‍नें ज़ांघा डाही दुही बाखा काठा दी बान्हीं ताकि तिंयां च़ुक्‍की बी निं सके।

25 आधी राची तै लागै दै पल़सी अर सिलास परमेशरा का प्राथणां करदी भज़ना बोल्दै अर तिंयां होर कैदी तै शूणैं लागै दै। 26 हेरा-हेरी हुई तिधी ज़ाज़री अर इधी तैणीं कि कैद खाने आथरी सिक्‍की आजू-पिछ़ू अर तेभी दुआर खुल्है अर सारी शांघल़ी चुटी।

27 दरोगअ उझ़ुअ खल़अ, कैद खाने दुआर भाल़ै तेऊ घुआल़ी। तेऊ सोठअ इहअ कि तिंयां कैदी ठुर्है, तेऊ काढी तलबार अर तेऊ लाई ती आप्पू मारना लै आपणैं कैल़ै तलबारै बाही। 28 पर पल़सी बोलअ ज़ोरै हाक पाई, "आप्पू लै निं किछ़ करी, हाम्हैं सोभै आसा इधी।"

29 तेखअ शादअ कहा का तेऊ लाटू अर संघा डेऊअ भितरा लै अर काम्बदी-काम्बदी पल़अ सिलास अर पल़सीए खूरा सेटा उटी बाखा। 30 तेखअ तिंयां बागा लै काढी बोलअ तेऊ दरोगै, "जनाब, हुंह किज़ै करूं कि मुंह उद्धार भेटे?"

31 तिन्‍नैं दैनअ तेऊ लै ज़बाब, "प्रभू ईशू मसीहा दी कर विश्वास, तै भेटणअ ताह अर तेरै घरानै उद्धार।" 32 तेखअ खोज़अ तिन्‍नैं दुही दरोगै अर तेऊए सारै टबरा का परमेशरो बैण। 33 राची तैहा ई घल़ी तेऊ तिंयां निंयैं अर तिन्‍नें ज़खम धोऐ अर पल़सी दैनी तिन्‍नां लै पाणीं दी डुबकी। 34 तेऊ निंयैं पल़सी अर सिलास आपणैं घअरा लै संघा खैऊई तिन्‍नां का रोटी। तिंयां सोभै तै ऐहा गल्‍ला लै खुश कि तिन्‍नैं सोभी टबरै किअ परमेशरा दी विश्वास।

35 ज़ांऊं दुजी धैल़ी हुई ता, सैणैं दैनअ आपणैं सपाही का समाद "तिन्‍नां मणछा छ़ाडा पोर्ही।" 36 दरोगै खोज़ी ईंयां गल्‍ला पल़सी का, "सैणैं दैनअ तम्हां छ़ाडणेंओ हुकम अर ऐबै डेओआ तम्हैं शांती करै।"

37 पर पल़सी बोलअ तेऊ लै, "तिन्‍नैं हाम्हैं रोमी मणछ बाझ़ी दोशै सोभी लोगा सम्हनै च़िक्‍कै अर कैद खानै बी पाऐ, ऐबै बोला कि च़ुप्प-च़ुप्पै डेओआ! इहअ निं हंदअ! पर तिन्‍नां बोला इहअ कि आप्पै एछा इधा लै अर तेखअ निंयां हाम्हां बागा लै!"

38 तिन्‍नैं सपाही बी खोज़ी सारी गल्‍ला सैणैं सेटा, अर तिंयां इहअ शूणीं कि ईंयां आसा रोमी तिंयां डरै। 39 तिंयां आऐ आप्पै अर पल़सी अर सिलास मनैऊंऐं। तेखअ किई बागै निंईं करै एही अरज़, "ऐहा नगरी का डेओआ दूर।"

40 कैद खानै का छ़ुटी डेऊऐ पल़सी अर सिलास लुदिआ नाओंए विश्वासी बैहणी सेटा अर होरी विश्वासी भाई सेटा लै मिलदै तेसे घअरा लै। तिन्‍नैं दैनअ तिन्‍नां सोभी विश्वासी भाई लै हैअ कि प्रभू ईशू दी डाहा भरोस्सअ तेखअ लागै तिंयां फलिप्पी नगरी का हांढदै।