1 तेखअ बोलअ बिधाता मोसा लै इहअ, "ऐबै लाई मंऐं खिरी मिसर देशे माहा राज़ै अर लोगा लै एक होर सज़ा दैई। एता बाद दैणअ तेऊ तम्हां डेऊणैं, इधी तैणीं कि तेऊ काढणैं तम्हैं ज़ोरा-ज़ोरी मिसर देशा का बागै।

2 "ऐबै डेऊ, संघा बोल सोभी इज़राईली मणछा लै कि हरेक मर्ध अर बेटल़ी मांगै आप्पू संघा रहणैं आल़ै मिसरी संघी का सुन्‍नैं-च़ंदीए गैहणैं।"

3 बिधाते दौलती हुऐ इज़राईली संघा रहणैं आल़ै मिसर देशे लोग भलै। मोसा बी मना तै मिसर देशो माहा राज़अ तेऊए कार-करिंदै संघी अर तेऊओ त सोभी आम लोगा मांझ़ै बी खूब अदर।

4 तेखअ डेऊअ मोसा मिसर देशे माहा राज़ै सेटा लै संघा बोलअ इहअ, "हुंह आअ ताह सेटा इहअ कि ताखा लोल़ी थोघ लागअ कि बिधाता ऐबै किज़ै लाअ करी। बिधाता बोलअ इहअ, ‘मुंह दैणीं आझ़ राची मिसर देशै हांढ, 5 राज़गाद्दी दी बेशणै आल़ै मिसर देशे माहा राज़ै ओर्ही एकी गलामा तैणीं, सारै मिसर देशै ज़ेतरै बी ज़ेठै शोहरू आसा तिंयां मरनै सोभ। इधी तैणीं कि डागै-चैणैं मांझ़ै बी ज़ुंण पैहलै सोए नर पशू आसा, तिंयां बी मरनै।

6 "‘सारै मिसर देशै हणीं लैल़ा-पकारा लागी दी। सारै मिसर देशै हणअ इहअ ज़ुंण आझ़ा का पैहलै कधि निं हुअ, अर नां आजू कधू हणअ।

7 "‘पर इज़राईली मणछे अर तिन्‍नें डागै-धणे निं किछ़ै हान्‍नी हणीं, इधी तैणीं कि तिन्‍नां लै निं कुक्‍कर बी हुघणअ। तेखअ लागणअ तम्हां का थोघ कि हुंह बिधाता करा इज़राईली अर मिसरी लोगा मांझ़ै फरक।’"

8 तेखअ लागअ मोसा रोश्शा संघै इहअ बोली मिसर देशे माहा राज़ै सेटा का हांढदअ कि बिधाता बोला इहअ, "तेरै सोभै कार-करिंदै एछणैं तेखअ मुंह सेटा लै संघा करनी तिन्‍नां मुंह सेटा माथअ टेक्‍की एही अरज़, ‘आपणैं सोभी लोगा संघी डेऊ तूह मिसर देशा का।’ तेभा बाद डेऊणअ हुंह मिसर देशा का।"

9 बिधाता हेरअ त मोसा का पैहलै ई इहअ खोज़ी, "मिसर देशे माहा राज़ै निं थारी गल्‍ल मनणी, तेखअ करनै मुंह मिसर देशै बडै-बडै च़मत्कार।"

10 मिसर देशे माहा राज़ै भाल़ै आपणीं आछी तिंयां च़मत्कार ज़ुंण मोसा अर हारणै किऐ, पर बिधाता किअ तेऊओ मन्‍न होर बी काठअ अर सह निस्सअ इज़राईली मणछा मिसर देशा का छ़ाडी।