लुआह 28

माहा प्रोहते झिकल़ै

1 "आपणैं भाई हारण अर तेऊए शोहरू नादाब, अबीहू, एलीआजर अर ईतामारा शाद, इज़राईली मांझ़ै छ़ांटै तिंयां मंऐं प्रोहतो काम करना लै।✝28:1 लुआ. 39:1-7 2 हारणा लै बणाऐं इहै झिकल़ै ज़ेता करै तेऊए शोभा अर अदर बढे।

3 "हारण लै आसा मेरै माहा प्रोहतो काम, तेऊए झिकल़ै दैऐ तिन्‍नां सज़ाण कारीगीरा का बणाणैं ज़हा लै मंऐं एऊ कामां लै बरदान आसा दैनअ द। 4 तिन्‍नां का बझ़ैल़ै माहा प्रोहते हिक्‍का लै च़ौकी, सदरी, च़ोल़अ, भितरो कुर्तअ, साफअ अर गाची बणाणैं। इना पबित्र झिकल़ै बझ़ैल़ै आपणैं भाई हारण अर तेऊए शोहरू लै बणाणैं ज़हा प्रोहतो काम करनअ।

5 "इना झिकल़ै बणाऐं सुन्‍नैं अर निली, बैंज़णीं, लाला रांगे ऊना करै बूणै दै बाछे झिकल़ै करै।

माहा प्रोहते सदरी

6-8 "माहा प्रोहते सदरी बणाऐं बाछे झिकल़ै करै। तेता सज़ाऊंणा लै लोल़ी निली, बैंज़णीं, लाला रांगे भींन ऊने धागै अर सुन्‍नैं करै बूणती पाई। तेते आगलै-पिछ़लै पाल्‍लै ज़ोल़णा लै लाऐ दोहरी कान्हा बूणी करै फिथी अर कुछी बान्हणां लै बणाऐं गाची।

9-12 "सदरीए दोहरी कान्हा तिन्‍नां फिथी दी लाऐ दूई सुलैमानी किम्मती पात्थरे मणीं। तिन्‍नां दुही मणीं दी बझ़ैल़ै कारीगीरा का इज़राईले बारा शोहरूए नाअं तिन्‍नें पैईदा हणें साबै ज़ेठै का कान्हैं तैणीं बाढै छ़ापणै, छ़हा शोहरूए नाअं एकी दी अर छ़ह दुजी दी। इहअ करै ज़ेभै-ज़ेभै हारण पबित्र ज़ैगा भितरी एछे तेभै-तेभै हणैं इज़राईले बारा गोत्रे नाअं तेऊ संघा कबल्‍लै, अर हुंह बिधाता निं आपणैं लोगा कधि बिस्सरदअ।

13,14 "तेखअ लाऐ कान्हा दूई सुन्‍नें च़ाक, संघा लाऐ तेथ धागै ज़ेही बूणी दी च़ोखै सुन्‍नें दूई शांघल़ी।

माहा प्रोहते च़ौकी

15 "ज़ेही निली, बैंज़णीं, लाल रांगा करै रांगी दी ऊना अर सुन्‍नें धागै बूणी करै बाछे झिकल़ै करै सदरी बणाईं, तेही ई बणाऐं माहा प्रोहता लै नसाफ करने च़ौकी। 16 सह च़ौकी लोल़ी च़कूणी अर दोहरी बणी। तेता बणाऐं एक बैथ लाम्मी अर एक बैथ बिरली। 17 तेथ पाऐ च़ार धारी, पैहली धारी दी लाऐ मानिक नाओं लाल किम्मती पात्थरो नघ, पुखराज़ नाओं हरअ किम्मती नघ, पेरोज़ नाओं पिंऊंल़ै किम्मती पात्थरो नघ। 18 दुजी धारी दी लाऐ मरकत नाओं शेतअ किम्मती नघ, नीलमणीं अर हीरै, 19 चिऊथी धारी दी लाऐ लशम नाओंए लाल-नरंगी रांगे किम्मती मणीं, शेतै-भौंरै रांगे सुलैमानी मणीं अर नीलम नाओं घणैं बैंज़णीं रंगो किम्मती नघ, 20 च़ौथी धारी दी पेरोज़ नाओं निलै-हरै रंगो नघ, सुलैमानी किम्मती पात्थरो नघ अर यशब नाओं निलै रंगो नघ।

"इना सोभी किम्मती पात्थरा लाणा लै बणाऐं तिन्‍नां धारी दी चअन-चअन सुन्‍नें खानै 21 अर तिन्‍नां किम्मती पात्थरे मणीं दी छ़ापै इज़राईले बारा गोत्रे नाअं तिन्‍नें पैईदा हणें साबै बाढै।

22-25 "च़ौकी दी लाऐ उपरा बाखा दोहरै कूणैं दी च़ोखै सुन्‍नें दूई सनांगणूं, संघा लाऐ तेता का सुन्‍नें शांघल़ अर उपर चैल़ै तेता दोहरी कान्हा सदरी दी लागी दी फिथी दी पिड्डी।

26 "तेखअ लाऐ च़ौकी दी हेठै भितरी सदरी बाखा दोहरै कूणैं दी सुन्‍नें दूई सनांगणूं होर, 27 संघा बणाऐं दूई सनांगणूं होर अर तिन्‍नां चैल़ै गाची प्रैंदै कान्हे फिथी दी लाऐ दै सनांगणूंए सिधा सदरी दी। 28 तेखअ बान्हैं च़ौकी हेठै लागै दै सनांगणूं का दोहरी बाखा निली डोरी गाची प्रैंदै सदरी दी लागै दै तिन्‍नां सनांगणूं दी, एता करै रहणीं सह च़ौकी एकी ज़ैगा पिड्डी टेक्‍की।

29 "इहअ करै हणैं हारणे हिक्‍का प्रैंदै इज़राईले बारा गोत्रे नाअं तेभै हर बगत लिखै दै ज़ेभै सह बिधाते खिम्भा भितरी पबित्र ज़ैगा लै एछे अर मुंह सेटा हणैं तिंयां कबल्‍लै आद डाहणां लै। 30 हारण डाहै नसाफ करने च़ौकी दी ऊरीम अर तूरीम*28:30 ऊरीम अर तूरीम ईंयां सका किज़ै किम्मती पात्थर, काठ या किज़ै होर धातू हई, ज़ेता करै बिधाता का उतर भेटा हंदअ ज़रूर। तिंयां लोल़ी तेभै हारणे दिला नेल़ हुऐ ज़ेभै सह मुंह बिधाता सेटा पबित्र ज़ैगा एछे, तेता करै लागणअ तेऊ का थोघ कि हुंह इज़राईली मणछा लै किज़ै बोला।✝28:30 गण. 27:21; बधा. 33:8; एज्रा 2:63; नहे. 7:65

माहा प्रोहते होर झिकल़ै

31 "सदरी हेठै बान्हैं निलै रांगे ऊना करै बणाअं द च़ोल़अ। 32 तेथ बणाऐं गअल़, तेऊ गल़ा फेर पाऐ ज़ाल़ीदार बूणती ताकि सह धेल़्हिए निं।

33,34 "गल़े ज़ाल़ीदार घेरै हेठै लाऐ निलै, बैंज़णीं अर लाला रांगे झिकल़े नारदाणैं ज़िहै फूल सारै घेरै दी, संघा लाऐ तिन्‍नां सोभी फूला जैंदरी एक-एक सुन्‍नें शल़्हुम्हणूं।

35 "किल्हैकि ज़ेभै-ज़ेभै हारण एऊ च़ोल़ै बान्हीं माहा प्रोहते कामां करदअ मुंह बिधाता सेटा लै पबित्र ज़ैगा भितरी एछे अर तिधा का डेऊंदी बारी लोल़ी इना शल़्हुम्हणूंए छ़ेल़ शुण्हुंई, तै निं सह मरनअ।

36 "तेखअ बणाऐं च़ोखै सुन्‍नेंओ एक बिंदू तेथ छ़ापै टिप्पी करै इहअ, ‘बिधाता लै पबित्र।’

37 "तेता बान्हैं निली डोरी करै हारणे साफै दी अर सह बिंदू लोल़ी साफै दी आजू बाखा माथै दी लागअ। 38 हारण बान्हैं तेऊ आपणैं माथै दी, सह हणअ एतो नछ़ैण कि इज़राईली आपणैं पाप-दोशा लै ज़ुंण पबित्र भैंट मुंह बिधाता लै दैणीं, तिंयां आणनीं हारणा आप्पै मुंह सेटा, च़ाऐ तेथ भूल-च़ूक बी रहे तेता लै करनै मुंह तिंयां माफ।

39 "हारणो च़ोल़अ अर साफअ बणाऐं बाछे झिकल़ै करै अर तेऊए गाची दी लोल़ी खिला-फूले बूणती हुई पाई दी।

होरी प्रोहता लै झिकल़ै

40 "हारणे शोहरू लै बी बणाऐं खास च़ोल़ै, गाची अर साफै ज़ेता करै प्रोहते शोभा अर अदर बढे। 41 इना झिकल़ै बन्हैऊंईं करै आपणैं भाई हारणे शोहरूओ बी तिन्‍नें मुंडै जैतूनो तेल तरैल़ी अभिषेक अर संस्कार ताकि तिंयां मुंह सेटा प्रोहतो काम करी सके।

42 "तिन्‍नां लै बणाऐं बाछे झिकल़ै करै ज़ांघिऐ, ज़ुंण तिन्‍नें कुछी का ज़ान्हूं प्रैंदै तैणीं होए ताकि तिंयां नांगै निं शुझिए। 43 ज़ेभै-ज़ेभै तिंयां मेल़-ज़ोल़े खिम्भा भितरी पबित्र ज़ैगा बेदी सेटा प्रोहते कामां करदै डेओए, तेभै डाहै तिंयां तिन्‍नां ज़ांघिऐ बान्हीं, इहअ निं हआ कि तिन्‍नां का पाप होए अर तिंयां मरे।

"एता बान्हैं हारण, तेऊए शोहरू अर तिन्‍नें पोस्ती दर पोस्ती आजू ज़ुंण बी प्रोहतो काम करे, तिन्‍नां लै बी आसा अह बिधी सदा लै।"